ຂໍຄວາມຮ່ວມມືທຸກຄົນທີ່ໄປກວດຫາເຊື້ອໂຄວິດ19 ຄວນໃຫ້ຂໍ້ມູນທີ່ຊັດເຈນ ແລະ ປະຕິບັດຕາມນີ້

184

ດັ່ງທີ່ທຸກຄົນຮູ້ແລ້ວວ່າ ການລະບາດຂອງພະຍາດໂຄວິດຢູ່ລາວເຮົາ ສະຖານະການໜ້າເປັນຫ່ວງ ແລະ ມີຍອດຜູ້ຕິດເຊື້ອໂຄວິດເພີ່ມຂຶ້ນ ໂດຍສະເພາະຜູ້ຕິດເຊື້ອໃຊຸມຊົນທີ່ເພີ່ມຂຶ້ນຫຼາຍນັບມື້ ລວມທັງສະຖານທີ່ສ່ຽງຕ່າງໆທີ່ຜູ້ຕິດເຊື້ອໄດ້ເດີນທາງໄປ

ຈົນປັດຈຸບັນຫຼາຍແຂວງ ໂດຍສະເພາະໃນນະຄອນຫຼວງວຽງຈັນກໍໄດ້ລ໊ອກດາວ ແລະ ອອກຄໍາສັ່ງຫ້າມຫຼາຍຂໍ້ທີ່ອາດຈະສົ່ງຜົນໃນການກະຈາຍເຊື້ອເປັນວົງກວ້າງໄປຕື່ມ ໂດຍການປິດຮ້ານຄ້າທີ່ບໍ່ຈໍາເປັນ, ຫ້າມເດີນທາງໄປມາ, ໃຫ້ເຮັດວຽກຢູ່ເຮືອນແຕ່ນີ້ຮອດວັນທີ 30 ກັນຍາ, ໃຜທີ່ຮູ້ສຶກມີອາການໄຂ້, ເປັນຫວັດ, ຫາຍໃຈຍາກ, ແໜ້ນໜ້າເອິກ, ບໍ່ຮູ້ກິ່ນ ຫຼື ລົດຊາດ ຫຼື ຮູ້ສຶກວ່າຕົນເອງໄປສະກຖານທີ່ສ່ຽງມາ ຕ້ອງການທີ່ຈະໄປກວດຫາເຊື້ອ ກໍສາມາດໄປກວດຫາເຊື້ອພະຍາດຕາມຈຸດທີ່ເພິ່ນກວດໄດ້ເລີຍ

["]

ແລະ ທາງສູນຂ່າວສານການແພດສຸຂະສຶກສາ Centre of Information and Education for Health ກໍໄດ້ໂພສແນະນໍາ ສໍາລັບໃຜທີ່ຈະໄປກວດຫາເຊື້ອວ່າ

ພວກເຮົາຂໍຄວາມຮ່ວມມືກັບທຸກຄົນທີ່ໄດ້ໄປກວດ ຫຼື ກຳລັງຈະໄປກວດຫາເຊື້ອພະຍາດໂຄວິດ-19 ດັ່ງນີ້
ໃຫ້ຂໍ້ມູນທີ່ຖືກຕ້ອງ ແລະ ຊັດເຈນຕໍ່ເຈົ້າໜ້າທີ່
ຖືເອກະສານຢັ້ງຢືນຕົນເອງເຊັ່ນ ສຳເນົາບັດປະຈຳຕົວ, ສຳມະໂນຄົວ ຫຼື ໜັງສືເດີນທາງ
ໃຫ້ຂໍ້ມູນການເຄື່ອນໄຫວຂອງທ່ານໃນໄລຍະຜ່ານມາ

ເມື່ອທ່ານໄດ້ກວດຫາເຊື້ອພະຍາດໂຄວິດ-19 ແລ້ວ ໃຫ້ທ່ານກັບທີ່ພັກທັນທີ ແລະ ແຍກຕົນເອງອອກຈາກຄົນອື່ນ
ບໍ່ວ່າຜົນກວດຈະເປັນແນວໃດກໍຕາມ ທ່ານຕ້ອງຈຳກັດບໍລິເວນຕົນເອງໃຫ້ຄົບ 14 ວັນ, ນັບຈາກມື້ທີ່ໄດ້ໄປກວດຫາເຊື້ອ
ປ້ອງກັນໂຕເອງຢ່າງເຂັ້ມງວດເພື່ອບໍ່ໃຫ້ຜູ້ອື່ນໆສ່ຽງທີ່ຈະຕິດເຊື້ອຈາກທ່ານ
ບໍ່ອອກໄປນອກທີ່ພັກຂອງທ່ານຢ່າງເດັດຂາດ

ຕິດຕາມອາການຂອງຕົນເອງທຸກໆມື້, ຖ້າທ່ານຮູ້ສຶກບໍ່ສະບາຍ, ມີອາການໄຂ້, ໄອ, ເຈັບຄໍ ຫຼື ຫາຍໃຈລຳບາກໃນໄລຍະຈຳກັດບໍລິເວນ ໃຫ້ທ່ານຕິດຕໍ່ຫາສາຍດ່ວນ 165, 166 ຫຼື ສາຍດ່ວນຂອງແຂວງທັນທີ

ຜູ້ທີ່ມີຈຸດປະສົງຢາກກວດຊອກຫາເຊື້ອໂຄວິດ-19 ສໍາລັບ ນະຄອນຫຼວງວຽງຈັນແມ່ນມີ ສອງຈຸດ: 1) ຈຸດເກັບຕົວຢ່າງ ເດີ່ນກິລາໃນຮົ່ມ ບຶງຂະຫຍອງ, 2) ຈຸດເກັບຕົວຢ່າງ ໂຮງຮຽນມໍປາຍສີໂຄດ. ເຊິ່ງທັງສອງບ່ອນເປີດໃຫ້ບໍລິການບັນດາທ່ານທຸກວັນ (ວັນຈັນ ຫາ ວັນອາທິດ) ໃນຕອນເຊົ້າ ເວລາ 9:00-12:00 ໂມງ ແລະ ຍັງມີທີມງານເກັບຕົວຢ່າງເຄື່ອນທີ່ໄປເກັບໃນສະຖານທີ່ທີ່ມີການລາຍງານຄົນຕິດເຊື້ອ.

ສຳລັບແຂວງ ແມ່ນທ່ານສາມາດໄປກວດຊອກຫາເຊື້ອໄດ້ຢູ່ໂຮງໝໍແຂວງ ຫຼື ສະ
ຖານທີ່ທີ່ກຳນົດໄວ້ ຫຼື ທີມງານໜ່ວຍເຄື່ອນທີ່ ທີ່ລົງເກັບຕົວຢ່າງ ໃນເຂດທີ່ມີການລະບາດໃນຊຸມຊົນ.