ໃນວັນທີ 18 ກັນຍາ 2021 ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ແລະ ທ່ານ ດຣ. ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ໄດ້ຖະແຫຼງປະຈຳວັນ ທີ່ກະຊວງສາທາລະນະສຸກ.
ທ່ານ ດຣ. ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກ່າວວ່າ: ມາຮອດປະຈຸບັນ ສປປລາວ ເຮົາສາມາດສັກວັກຊີນໄດ້ຄືແນວໃດ ດັ່ງທີ່ທ່ານຮູ້ດີແລ້ວວ່າຢູ່ໃນສປປລາວ ມີວັກຊີນທີ່ໄດ້ນຳເຂົ້າມາສັກໃນປະຈຸບັນມີຢູ່ 5 ຊະນິດ ເຊິ່ງປະກອບມີ: ຊີໂນຟາມ, ອັດສະຕາຊີນີ້ກາ, ສະປູນິກ, ຟາຍເຊີ, ຈອນສັນ ແອນ ຈອນສັນ.
ລວມມີທັງໝົດ 5.567,490 ໂດສ, ເຊິ່ງຢາດັ່ງກ່າວກໍ່ໄດ້ມີການແຈກຈ່າຍໄປໃຫ້ກັບແຕ່ລະແຂວງ ໃນຂອບເຂດທົ່ວປະເທດ ເພື່ອສັກໃຫ້ກັບກຸ່ມປະຊາກອນເຊິ່ງມີອາຍຸ ແຕ່ 18 ປີຂື້ນໄປ ມາຮອດປະຈຸບັນ ເຂັ້ມທີ1 ສັກໄດ້ 2.788,830 ໂດສ ກວມເອົາ 38,01% ຂອງປະຊາກອນ ແລະ ເຂັມທີ 2 ສັກໄດ້ 1.007,657 ໂດສ ກວມເອົາ 26% ຂອງປະຊາກອນ, ໃນນັ້ນແຂວງທີ່ສັກກາຍ 50% ຂຶ້ນໄປແລ້ວກໍມີ ນະຄອນຫຼວງ ແລະບໍ່ແກ້ວ ແລະ ແຂວງອື່ນໆກໍແມ່ນສະເລ່ຍຢູ່ໃນ 38% ຂອງເຂັ້ມທີ1. ສະນັ້ນປະຈຸບັນຢູ່ໃນແຕ່ລະແຂວງກໍພວມຕະລຸມບອນໃສ່ກັບການສັກເຂັມທີສອງ ຂອງ ຊີໂນຟາມ ແລະ ອັດສະຕາຊີນິກາ ກໍຂໍໃຫ້ພໍ່ແມ່ປະຊາຊົນບັນດາເຜົ່າຈົ່ງໄດ້ຮີບຮ້ອນເຂົ້າໄປບໍລິການ ເພື່ອສ້າງພູມຕ້ານທານໃຫ້ກັບຕົນເອງ.
ທ່ານກ່າວຕື່ມວ່າ ຕາມແຜນການຈັດສັນວັກຊີນໃນໄຕມາດທີ 4 ນີ້ ຍັງຈະມີວັກຊີນເຂົ້າມາຕື່ມ 2.434,580 ໂດສ ໃນນັ້ນຈະໄດ້ຮັບຈາກລັດຖະບານ ສປຈີນ, ອົດສະຕາລີ, ກາແດງຈີນ ແລະການລະດົມທືນຈັດຊື້ຈາກພາກສ່ວນເອກະຊົນ. ສະນັ້ນວັກຊີນດັ່ງກ່າວໄດ້ມາກໍຈະໄດ້ມີການຈັດສັນໄປໃສ່ພື້ນທີ່ ທີ່ມີການລະບາດໃນບັນດາແຂວງພາກໃຕ້ ເປັນບູລິມະສິດ ເພື່ອຍົກລະດັບອັດຕາພູມຄຸ້ມກັນໃນໝູ່ປະຊາກອນໃຫ້ສູງຂື້ນເລື້ອຍເຮົາຈຶ່ງຈະຢັບຢັ້ງການລະບາດໄດ້
ເຊິ່ງບົດຮຽນຂອງຫຼາຍປະເທດເພີ່ນສາມາດສັກວັກຊີນໃຫ້ກັບປະຊາກອນກວມຫຼາຍກວ່າ 50% ຂອງປະຊາກອນ ເພີ່ນກໍສາມາດຢັບຢັ້ງເຮັດໃຫ້ການລະບາດນັບມື້ນັບຖອຍລົງ. ສະນັ້ນປະເທດເຮົາກໍເຊັ່ນດຽວກັນ ໃນທ້າຍປີນີ້ທາງລັດຖະບານກໍມີແຜນທີ່ຈະເປີດເສັ້ນທາງລົດໄຟຄວາມໄວສູງ ລາວ-ຈີນ ມາດຕະການສັກຢາວັກຊີນຄົບ 2 ເຂັມຈະເປັນເງື່ອນໄຂໜຶ່ງທີ່ຈະຕ້ອງໄດ້ມີການກວດສອບ ຄືກັນກັບການ
ເດີນທາງຢູ່ພາຍໃນປະເທດຂອງເຮົາ ສະນັ້ນບັນດາທ່ານກໍຈະຕ້ອງມີການກຽມພ້ອມໃຫ້ໄດ້ສັກວັກຊີນໃຫ້ຄົບ2ເຂັມເຊັ່ນດຽວກັນ.
ພ້ອມນີ້ໃນໄຕມາດ 4 ນີ້ ທາງລັດຖະມົນຕີກະຊວງສາທາລະນະສຸກ ກໍໄດ້ອອກແຈ້ງ
ການສະບັບເລກທີ 1079 ສະບັບລົງວັນທີ 16 ກັນຍາ 2021 ວ່າດ້ວຍການໃຫ້ບໍລິການ ວັກຊີນໂຄວິດ-19 ແລະ ຫ້າມການໃຫ້ບໍລິການວັກຊີນໂຄວິດ-19 ເຂັມ3.
ສະນັ້ນຂໍແຈ້ງໃຫ້ກັບນ້ອງທີ່ຈົບມໍປາຍປີນີ້ ທີ່ມີອາຍຸ 17 ປີ ຈົ່ງໄດ້ໄປສັກວັກຊີນກັນພະຍາດໂຄວິດ-19 ເພື່ອຈະໄດ້ມີຄວາມສະດວກໃນການເດີນທາງແລະເຂົ້າຫ້ອງສອບເສັງເຂົ້າມະຫາວິທະຍາໄລ, ພ້ອມນັ້ນແມ່ຍິງທີ່ຖືພາ ທີ່ມີອາຍຸຂອງການຕັ້ງຄັນ 12 ອາທິດຂື້ນໄປກໍແມ່ນສາມາດສັກໄດ້ ເພາະກອງປະຊຸມທາງດ້ານວິຊາການຂອງອົງການອະນາໄມໂລກ ປະຈຳລາວ ແລະ ຄະນະກຳມະການແຫ່ງຊາດ ທາງດ້ານວິຊາການກ່ຽວກັບການສ້າງພູມຄຸ້ມກັນ NITAC ໄດ້ມີການຄົ້ນຄົ້ວແລະເຫັນດີເປັນເອກະພາບ ແລະຍັງບໍ່ອະນຸຍາດໃຫ້ມີການສັກເຂັມທີ 3 ເຊິ່ງເອີ້ນວ່າ ບຸດສະເຕີ, ເຫດຜົນກໍຍ້ອນຍັງບໍ່ມີການວິໄຈທີ່ມາອ້າງອີງໄດ້ເທື່ອ ແລະ ຢາຢູ່ປະເທດເຮົາກໍຍັງມີຢູ່ໃນຂອບເຂດຈໍາກັດສະນັ້ນຂໍໃຫ້ທຸກຄົນໄດ້ເຂົ້າເຖິງຢ່າງທົ່ວເຖິງເສຍກ່ອນ.
