ຊົມເຊີຍນ້ຳໃຈເຈົ້າເດ ຕະຫຼາດປິດເລີຍເອົາເຄື່ອງມາແຈກແບ່ງສຸກ

3350

ເຊື່ອວ່າຫຼາຍຄົນຄົງຈະເຄີຍໄດ້ຍິນກັບຄຳວ່າ: ນ້ຳໃຈ ຍິ່ງໃຫຍ່ກວ່າການຊະນະ ສະເໝີ ເນື່ອງຈາກນ້ຳໃຈຄົນສາມາດປ່ຽນແປງຄວາມຄິດຂອງຄົນຝ່າຍກົງກັນຂ້າມໄດ້ ດັ່ງທີ່ມີແມ່ຄ້າຕະຫຼາດອົດຊີທ່ານໜຶ່ງທີ່ນຳເອົາເຄື່ອງຂາຍຂອງຕົນປະເພດຜັກ, ມັນ ຫຼາຍຊະນິດນຳມາແຈກຢາຍແກ່ປະຊາຊົນ ຫຼັງຈາກຕະຫຼາດດັ່ງກ່າວໄດ້ແຈ້ງປິດໄປເປັນເວລາ 2 ວັນ.

ຫຼັງຈາກທີ່ທາງຕະຫຼາດອົດຊີແຈ້ງກ່ຽວກັບການປິດບໍລິການເປັນເວລາ 2 ວັນເລີ່ມແຕ່ວັນທີ 14-15 ກັນຍາ 2021 ເນື່ອງຈາກການແຜ່ລະບາດຂອງໂຄວິດ-19 ເລີຍເຮັດໃຫ້ທາງຕະຫຼາດຕ້ອງໄດ້ປິດເພື່ອທຳຄວາມສະອາດພົ່ນຢາຂ້າເຊື້ອ ແລະ ຈະກັບມາເປີດໃຫ້ບໍລິການອີກຄັ້ງໃນວັນທີ 16 ກັນຍາ 2021

["]

ແຕ່ສຳຄັນໄປກວ່ານັ້ນ, ຫຼັງຈາກທີ່ທາງຕະຫຼາດແຈ້ງປິດ 2 ວັນ ດັ່ງທີ່ກ່າວມາ ໃນຕອນແລງ ຂອງວັນທີ 14 ກັນຍາ ນັ້ນກໍ່ໄດ້ມີແມ່ຄ້າທ່ານໜຶ່ງ ເຊິ່ງເປັນແມ່ຄ້າທີ່ຂາຍເຄື່ອງປະຈຳຕະຫຼາດອົດຊີນັ້ນ ໄດ້ນຳເອົາເຄື່ອງທີ່ຕົນເອງຈະຂາຍ ມາແຈກຢາຍແກ່ປະຊາຊົນຜູ້ທີ່ກາຍໄປມາຕາມແຄມທາງ ທີ່ບ້ານ ຊ້າງຄູ້ ເຊິ່ງຕ້ອງນັບຖືນ້ຳໃຈໃນຄວາມເສຍສະຫຼະຊ່ວຍເຫຼືອເພື່ອນມະນຸດດ້ວຍກັນໃນຍາມວິກິດແບບນີ້

ເພາະເຖິງວ່າຕະຫຼາດຈະປິດເປັນເວລາ 2 ວັນແຕ່ວ່າເຄື່ອງຂາຍດັ່ງກ່າວກໍ່ ອາດຈະຍັງບໍ່ໄດ້ຮັບເສຍຫາຍຫຍັງທັງຊິ້ນ ແຕ່ດ້ວຍຄວາມມີນ້ຳໃຈ ເລີຍຕັດສິນໃຈເອົາເຄື່ອງດັ່ງກ່າວມາແບ່ງປັນຄວາມສຸກໃຫ້ແກ່ສັງຄົມເທົ່າທີ່ກັບຄົນໆໜຶ່ງຈະຊ່ວຍສັງຄົມໄດ້.
ຕໍ່ກັບເຫດການດັ່ງກ່າວ ກໍ່ໄດ້ຮັບຄວາມຊົມເຊີຍຈາກສັງຄົມເປັນຈຳນວນຫຼວງຫຼາຍທີ່ເຂົ້າມາສະແດງຄວາມຂອບໃຈຕໍ່ແມ່ຄ້າທ່ານນັ້ນ ດັ່ງກັບທີມຂ່າວເສດຖະກິດການຄ້າກໍ່ເຊັ່ນດຽວກັນ ຂໍຊົມເຊີຍໃນນ້ຳໃຈ ເພາະສິ່ງນັ້ນຈະສາມາດຕໍ່ຍອດໃຫ້ກັບອີກຫຼາຍຫົວໃຈຫຼາຍໆດວງ ທີ່ຈະມີກຳລັງໃຈໃນການໃຊ້ຊີວິດຕໍ່.