ຈັດສັນເປັນລະບຽບ ເອົາຕະຫຼາດດຽວສະໜອງອາຫານໃຫ້ປະຊາຊົນໃນຊ່ວງລັອກດາວຢູ່ ສາລະວັນ

140

ເມືອງສາລະວັນ ໄດ້ປະກາດປິດການເຂົ້າ-ອອກ ຫຼື ລັອກດາວເປັນທີ່ຮຽບຮ້ອຍ ຫຼັງພົບຜູ້ຕິດເຊື້ອໃນຊຸມຊົນຢ່າງຕໍ່ເນື່ອງ ເພື່ອເປັນການຄວບຄຸມບໍ່ໃຫ້ເຊື້ອໂຄວິດກະຈາຍໄປຫຼາຍ ຕອນນີ້ຄົນໃນເມືອງສາລະວັນແມ່ນໃຫ້ແຕ່ລະຄອບຄົວຈຳກັດບໍລິເວນຕົນເອງ ບໍ່ຈຳເປັນບໍ່ໃຫ້ອອກໄປທາງໃດ ເລື່ອງອາຫານການກິນກໍ່ຈັດໃຫ້ຕະຫຼາດເອບີໂຊກໄຊ ເປັນສູນກາງສະໜອງໃຫ້ປະຊາຊົນ ເພື່ອສະດວກໃນການຄວບຄຸມ.


ເມືອງສາລະວັນ ໄດ້ອອກແຈ້ງການເພີ່ມເຕີມ ສະບັບເລກທີ 51/ຈມ.ສວ ກ່ຽວກັບການຜ່ອນຜັນບາງມາດຕະການ ທີ່ມີຄວາມຈຳເປັນ ແລະ ສຳຄັນຕໍ່ກັບການດຳລົງຊີວິດປະຈຳວັນຂອງປະຊາຊົນ ໂດຍສະເພາະໃນເທສະບານເມືອງ ເປັນຕົ້ນ: ດ້ານສະບຽງອາຫານ, ການບໍລິການຂອງກິດຈະການບາງດ້ານ ທີ່ຕິດພັນກັບການໃຊ້ຊີວິດປະຈຳວັນ, ພາຍຫຼັງປະຕິບັດຕາມມາດຕະການປິດການເຂົ້າ-ອອກ ເມືອງ ຂັ້ນສູງ ແລະ ໄດ້ອະນຸຍາດເປີດການສັນຈອນເຂົ້າ-ອອກ ບ້ານໂພນບົກ ຫຼັງຄົບກຳນົດ 14 ວັນ.

ໂດຍແນໃສ່ແກ້ໄຂການດຳລົງຊີວິດຂອງປະຊາຊົນ ໃນເທສະບານເມືອງສາລະວັນ ໄດ້ອະນຸຍາດເປີດຕະຫຼາດເອບີໂຊກໄຊ ສະໜອງອາຫານປະເພດ ຊີ້ນ-ປາ, ເຂົ້າສານ-ນໍ້າດື່ມ, ເຄື່ອງອຸປະໂພກ-ບໍລິໂພກ ທີ່ຈຳເປັນ ພ້ອມທັງໃຫ້ເຂັ້ມງວດໃນການຈັດຕັ້ງປະຕິບັດມາດຕະການ, ສຳລັບຈຸດບໍລິການຕະຫຼາດເກົ່າ ແມ່ນສືບຕໍ່ປິດ ເພື່ອທຳຄວາມສະອາດ, ພົ່ນຢາຂ້າເຊື້ອໃຫ້ຄົບຕາມກຳນົດ ເລີ່ມແຕ່ວັນທີ 14-28 ກັນຍາ 2021.

["]

ພ້ອມນີ້ໄດ້ອະນຸຍາດບາງກິດຈະການ ເປັນຕົ້ນ: ອະນຸຍາດໃຫ້ເປີດຂາຍວັດສະດຸກໍ່ສ້າງ 2 ຮ້ານ ຄື: ຮ້ານຂາຍວັດສະດຸກໍ່ສ້າງບົງດາວ ແລະ ມະຫາໄຊວັດສະດຸກໍ່ສ້າງອະນຸຍາດເປີດຮ້ານສ້ອມແປງພາຫະນະ ແລະຮ້ານຕາບຢາງລົດຄື: ຮ້ານພວງ ຕາບຢາງ ແລະຮ້ານສະເຫຼີມໄຊ ສ້ອມແປງ ເພື່ອແກ້ໄຂບາງບັນຫາຂອງປະຊາຊົນທີ່ມີຄວາມຈຳເປັນ.

ຫຼັງຈາກການປະເມີນສະຖານະການຂອງຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການແຜ່ລະບາດພະຍາດໂຄວິດ-19 ຂັ້ນແຂວງ ແລະ ເມືອງ. ສຳລັບມາດຕະການອື່ນໆ ແມ່ນຍັງສືບຕໍ່ຈັດຕັ້ງປະຕິບັດຕາມສຳສັ່ງ, ແຈ້ງການຂອງຂັ້ນເທິງ ວາງອອກ ຢ່າງເຂັ້ມງວດ.

ຂ່າວຈາກ: SALAVAN Newspaper