ປັບປ່ຽນພຶດຕິກຳການໃຊ້ຊີວິດໃຫ້ເໝາະສົມ ຊ່ວຍຫຼຸດ ຄວາມສ່ຽງຫ່າງໄກພະຍາດ ຄວາມດັນເລືອດສູງໄດ້.
ສັນຍານອັນຕະລາຍ “ ຄວາມດັນເລືອດສູງ ”
ໃນກໍລະນີທີ່ມີຄວາມດັນເລືອດສູງຫຼາຍຄົນເຈັບອາດຈະມີອາການທີ່ສະແດງໃຫ້ເຫັນໄດ້ດັ່ງນີ້:
1 ປວດ ຫຼື ມຶນຫົວບໍລິເວນງ່ອນ
2 ວິນຫົວ
3 ແໜ້ນໜ້າເອິກ
4 ປຸ້ນທ້ອງ ປວດຮາກ
ອັນຕະລາຍຂອງຄວາມດັນເລືອດສູງ ຖ້າຫາກບໍ່ຟ້າວປິ່ນປົວ
ຜູ້ມີຄວາມດັນເລືອດສູງຊ້ຳເຮື້ອທີ່ບໍ່ສາມາດຄວບຄຸມຄວາມດັນເລືອດໃຫ້ຢູ່ໃນລະດັບປົກກະຕິເປັນໄລຍະເວລາດົນ ອາດສົ່ງຜົນໃຫ້ເກີດພາວະແຊກຊ້ອນຕໍ່ອະໄວຍະວະສຳຄັນ ເຊັ່ນ:
ກ້າມຊີ້ນຫົວໃຈໜາຂຶ້ນ
ຫຼອດເລືອດແດງແຂງ
ຈໍປະສາດຕາເສື່ອມ
ໝາກໄຂ່ຫຼັງເສື່ອມ
ພະຍາດຫຼອດເລືອດສະໝອງ ເຊິ່ງເປັນພາວະແຊກຊ້ອນທີ່ອັນຕະລາຍຢ່າງຍິ່ງ
ສ່ຽງຕໍ່ການເກີດອຳມະພາດ
ພະຍາດກ້າມຊີ້ນຫົວໃຈຂາດເລືອດ
ພະຍາດຫຼອດເລືອດແດງສ່ວນປາຍຕີບຕັນ
ຫົວໃຈຫຼົ້ມແຫຼວ
ຖ້າຫາກວ່າມີພາວະຄວາມດັນເລືອດສູງດົນໆ ບໍ່ໄດ້ຮັບການປິ່ນປົວຢ່າງສະໝ່ຳສະເໝີ ແລະ ຖືກຕ້ອງເໝາະສົມ ຫົວໃຈຕ້ອງເຮັດວຽກໜັກຫຼາຍຂຶ້ນ ກ້າມຊີ້ນຂອງຫົວໃຈຈະໜາຂຶ້ນ ຫົວໃຈຈະໃຫຍ່ຂຶ້ນ ອາດເຮັດໃຫ້ຫົວໃຈເຕັ້ນຜິດຈັງຫວະ ຫຼື ເກີດພາວະຫົວໃຈຫຼົ້ມແຫຼວໄດ້. ດັ່ງນັ້ນ, ເຮົາຄວນໃຫ້ຄວາມສຳຄັນກັບການເກີດພາວະຄວາມດັນເລືອດສູງ ການປ້ອງກັນ ແລະ ການປິ່ນປົວາ ເພື່ອທີ່ຈະສາມາດຊະລໍການເກີດພາວະແຊກຊ້ອນຕ່າງໆ.
ປັດໄຈສ່ຽງພະຍາດຄວາມດັນເລືອດສູງ
ຄວາມດັນເລືອດສູງມັກຈະພົບເຫັນຮ່ວມກັບປັດໄຈສ່ຽງອື່ນໆຂອງກຸ່ມອາການຜິດປົກກະຕິທາງເມຕາບໍລິຊຶມ ເຊັ່ນ:
ໄຂມັນໃນເລືອດສູງ ຫຼື ລະດັບນ້ຳຕານໃນເລືອດສູງ
ຂາດການອອກກຳລັງກາຍ
ພະຍາດຕຸ້ຍ
ມີພາວະຄຽດຊ້ຳເຮື້ອ
ດື່ມເຄື່ອງດື່ມແອວກໍຮໍ
ສູບຢາ
ຮັບປະທານອາຫານທີ່ມີລົດຊາດເຄັມເປັນປະຈຳ
ນອກຈາກນີ້, ພະຍາດຄວາມດັນເລືອດສູງອາດມີສາເຫດມາຈາກພາວະໝາກໄຂ່ຫຼັງວາຍ ເນື້ອງອກຂອງຕ່ອມໝວກໝາກໄຂ່ຫຼັງ, ພະຍາດຕ່ອມໄທຣອຍ ຫຼື ຕ່ອມພາຣາໄທຣອຍ ພະຍາດທາງເດີນຫາຍໃຈຖືກອັດຕັນຂະນະນອນຫຼັບ ຫຼື ການໃຊ້ຮໍໂມນບາງຊະນິດ.
ວິທີຮັກສາພະຍາດຄວາມດັນເລືອດສູງ
ໃນການຮັກສາຄົນເຈັບພະຍາດຄວາມດັນເລືອດສູງ ຄວນມີການປະເມີນຄວາມສ່ຽງໃນການເກີດພະຍາດຫຼອດເລືອດຫົວໃຈ ແລະ ຜົນກະທົບຕໍ່ອະໄວຍະວະຕ່າງໆ ທີ່ເປັນຜົນມາຈາກຄວາມດັນເລືອດສູງເປັນໄລຍະເວລາດົນ ເຊັ່ນ: ກ້າມຊີ້ນຫົວໃຈໜາ, ພາວະຫຼອດເລືອດແດງແຂງ, ໝາກໄຂ່ຫຼັງເສື່ອມ ຫຼື ມີໂປຣຕິນຮົ່ວໃນຍ່ຽວ ແລະ ຈໍປະສາດຕາເສື່ອມຈາກຄວາມດັນເລືອດສູງ.
ດັ່ງນັ້ນ, ເພື່ອປ້ອງກັນການເກີດພະຍາດຄວາມດັນເລືອດສູງ ເຮົາຄວນເບິ່ງແຍງຕົນເອງປັບປ່ຽນພຶດຕິກຳການໃຊ້ຊີວິດໃຫ້ເໝາະສົມ ໂດຍການງົດສູບຢາ ແລະ ເຄື່ອງດື່ມແອວກໍຮໍທຸກຊະນິດ ຫັນມາໃສ່ໃຈສຸຂະພາບໂດຍການອອກກຳລັງກາຍໃຫ້ເໝາະສົມ ຮູ້ຈັດເສີມສ້າງສຸຂະພາບຈິດທີ່ດີເປັນຫົນທາງສູ່ການມີສຸຂະພາບດີ ຍ່ອມຊ່ວຍໃຫ້ຕົວເຮົາຫ່າງໄກຈາກພະຍາດຄວາມດັນເລືອດສູງໄດ້ເຊັ່ນກັນ.
ທີ່ມາ: https://www.sanook.com/health/30165/
