ພິທີເຊັນບົດບັນທຶກຄວາມເຂົ້າໃຈ ລະຫວ່າງ ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ແລະ ອົງການ CHAI ປະຈຳ ສປປ ລາວ ຈຳນວນ 2 ໂຄງການ ໄດ້ຈັດຂຶ້ນໃນວັນທີ 27 ສິງຫານີ້ ທີ່ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ.
ຮ່ວມລົງນາມໃນຄັ້ງນີ້ມີຄື ທ່ານ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ແລະ ທ່ານ ກາແຣັດຍັງ ຫົວໜ້າໂຄງການ CHAI ປະຈຳ ສປປ ລາວ ໂດຍຊ້ອງໜ້າມີພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ຈຸດປະສົງໃນຄັ້ງນີ້ແມ່ນເພື່ອເຊັນບົດບັນທຶກຄວາມເຂົ້າໃຈ ລະຫວ່າງກົມຄວບຄຸມພະຍາດຕິດຕໍ່ ແລະ ອົງການ CHAI ປະຈຳ ສປປ ລາວ ຈຳນວນ 2 ໂຄງການຄື: ໂຄງການເສີມສ້າງລະບົບການຄວບຄຸມໃຫ້ມີຄວາມເຂັ້ມແຂງ ແລະ ເລັ່ງລັດການກຳຈັດພະຍາດໄຂ້ມາລາເຣຍ ຢູ່ ສປປ ລາວ ແລະ ໂຄງການປັບປຸງແຜນປະຕິບັດງານແຫ່ງຊາດທີ່ສົມບູນແບບ ເພື່ອສ້າງຄວາມເຂັ້ມແຂງ ແລະ ຄວາມອາດສາມາດໃນການປ້ອງກັນຄວບຄຸມວັນນະໂລກ ເຊື້ອເຮສໄອວີ ພະຍາດເອດ ແລະ ພະຍາດຕິດຕໍ່ທາງເພດສຳພັນ (ພຕພ) ຢູ່ ສປປ ລາວ.
ສຳລັບໂຄງການດັ່ງກ່າວແມ່ນຈະໄດ້ປະຕິບັດຢູ່ໃນ ຂັ້ນສູນກາງ, ຂັ້ນແຂວງ ແລະ ເມືອງ ຢູ່ໃນ 5 ແຂວງພາກພາກໃຕ້ຄື: ແຂວງສາລະວັນ, ເຊກອງ, ຈຳປາສັກ, ອັດຕະປື, ສະຫວັນນະເຂດ ແລະ ໜຶ່ງເມືອງຄື ມືອງບົວລະພາ ແຂວງຄຳມ່ວນ ແມ່ນເພື່ອຊ່ວຍເຫຼືອທາງດ້ານເຕັກນິກວິຊາການຢູ່ໃນຂັ້ນແຂວງ ແລະ ຂັ້ນເມືອງ.
