ຍອດຕິດເຊື້ອໃນນະຄອນຫຼວງວຽງຈັນເພີ່ມຂຶ້ນທຸກວັນ ມື້ນີ້ພົບໃໝ່ 17 ຄົນ ໃນຈຳນວນ 60 ຄົນທີ່ຕິດເຊື້ອໃນຊຸມຊົນທົ່ວປະເທດ ນັ້ນບົ່ງບອກໃຫ້ຮູ້ວ່າ ພວກເຮົາບໍ່ຄວນເຫຼີງຕໍ່ການນຳໃຊ້ຊີວິດປົກກະຕິແບບໃໝ່ ແຕ່ຕ້ອງເຄັ່ງຄັດກັບມັນໃຫ້ຫຼາຍຂຶ້ນ ການຮັກສາໄລຍະຫ່າງທາງສັງຄົມສຳຄັນທີ່ສຸດ.
ຕາມການຖະແຫຼງຂ່າວຂອງທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ປະຈຳວັນທີ 28 ສິງຫາ 2021 ໃຫ້ຮູ້ວ່າ: ສະພາບການລະບາດຂອງພະຍາດໂຄວິດ-19 ຢູ່ ສປປ ລາວ, ມາຮອດວັນທີ 27 ສິງຫາ 2021 ທົ່ວປະເທດໄດ້ກວດວິເຄາະທັງໝົດ 2.839 ຄົນ, ໃນນັ້ນ ກວດພົບຜູ້ຕິດເຊື້ອໃໝ່ ທັງໝົດ 115 ຄົນ ເຊິ່ງຕິດເຊື້ອໃນຊຸມຊົນເຖິງ 60 ຄົນ ເປັນຜູ້ສຳຜັດໃກ້ຊິດນຳຜູ້ຕິດເຊື້ອທີ່ຜ່ານມາ.
ໃນຈຳນວນຜູ້ຕິດເຊື້ອໃນຊຸມຊົນປະກອບດ້ວຍ 5 ແຂວງ ແລະ 1 ນະຄອນຫຼວງດັ່ງນີ້: ນະຄອນຫຼວງ 17 ຄົນ (ເປັນຜູ້ສຳຜັດໃກ້ຊິດກັບຜູ້ຕິດເຊື້ອຜ່ານມາ), ບໍ່ແກ້ວ 20 ຄົນ, ຫຼວງພະບາງ 2 ຄົນ, ຫຼວງນ້ຳທາ 1 ຄົນ, ຄຳມ່ວນ 2 ຄົນ, ສະຫວັນນະເຂດ 18 ຄົນ.
ສ່ວນກໍລະນີນໍາເຂົ້າ ມີ 55 ຄົນ ຈາກ ສາລະວັນ 15 ຄົນ, ສະຫວັນນະເຂດ 12 ຄົນ, ຈຳປາສັກ 12 ຄົນ, ຄຳມ່ວນ 9 ຄົນ, ນະຄອນຫຼວງ 4 ຄົນ, ແຂວງວຽງຈັນ 1 ຄົນ, ໄຊຍະບູລີ 1 ຄົນ ແລະ ບໍລິຄຳໄຊ 1 ຄົນ ເຊິ່ງກວດພົບຈາກແຮງງານລາວ ຫຼື ຜູ້ທີ່ເດີນທາງມາຈາກປະເທດເພື່ອນບ້ານ ເຂົ້າຕາມຈຸດຜ່ານແດນສາກົນ.
ການຕິດເຊື້ອໃໝ່ມື້ນີ້ມາເພີ່ມໃສ່ຈຳນວນທີ່ຜ່ານມາ ເຮັດໃຫ້ມາຮອດມື້ນີ້ ພວກເຮົາມີຕົວເລກຜູ້ຕິດເຊື້ອສະສົມທັງໝົດ 14.466 ຄົນ, ຄົນເຈັບເສຍຊີວິດສະສົມ 12 ຄົນ (ໃໝ່ 0 ຄົນ) ແລະ ຄົນເຈັບກໍາລັງປິ່ນປົວ ທັງໝົດ 4.843 ຄົນ.
ພ້ອມນີ້ຂໍແຈ້ງໃຫ້ຜູ້ທີ່ມີຈຸດປະສົງຢາກກວດຊອກຫາເຊື້ອໂຄວິດ-19 ສຳລັບ ນະຄອນຫຼວງວຽງຈັນນີ້ ແມ່ນຢູ່ຈຸດເກັບຕົວຢ່າງບຶງຂະຫຍອງ ເຊິ່ງເປີດໃຫ້ບໍລິການບັນດາທ່ານທຸກວັນ ໃນຕອນເຊົ້າ ເວລາ 9:00-12:00 ໂມງ. ສຳລັບແຂວງອື່ນ ແມ່ນທ່ານສາມາດໄປກວດຊອກຫາເຊື້ອໄດ້ຢູ່ໂຮງໝໍແຂວງ ຫຼື ສະຖານທີ່ທີ່ກຳນົດໄວ້.
