ເຂດພັດທະນາກວມລວມໄຊເຊດຖາ ເປີດຈ່າຍໄຟວົງຈອນທີ 2 ສະຖານີໄຟຟ້າ 115kV ຢ່າງສໍາເລັດຜົນ

742

ໃນ 17 ໂມງ 32 ນາທີ ຂອງວັນທີ 11 ສິງຫາ 2021 ທ່ານ ຂຽງຄໍາ ພຸດຈັນທະວົງສາ ຮອງຜູ້ອໍານວຍການ ບໍລິສັດ ຮ່ວມທຶນລາວ-ຈີນ ຈໍາກັດ(LCC) ແລະ ທ່ານ ສົມສະນິດ ສະເດັດຕັນ ຫົວໜ້າຝ່າຍວາງແຜນລະບົບສາຍສົ່ງ ລັດວິສາຫະກິດໄຟຟ້າລາວ ໄດ້ພ້ອມກັນຄລິກເມົ້າຄອມພີວເຕີ້ ໄຟຟ້າ 115 kV ຈ່າຍເຂົ້າສູ່ສາຍສົ່ງ 115 kV ສາຍສົ່ງວົງຈອນທີສອງຂອງເຂດພັດທະນາກວມລວມໄຊເຊດຖາ ຢ່າງປະສົບຜົນສໍາເລັດ.


ໃນຊຸມປີມໍ່ໆມານີ້, ດ້ວຍການພັດທະນາຢ່າງວ່ອງໄວຂອງເຂດພັດທະນາກວມລວມໄຊເຊດຖາ  ຈໍານວນວິສາຫະກິດໃນເຂດພັດທະນາໄດ້ມີການເພີ່ມຂຶ້ນຢ່າງບໍ່ຢຸດຢັ້ງ, ໃນປັດຈຸບັນ ມີຫຼາຍກວ່າ 100 ບໍລິສັດໄດ້ເຊັນສັນຍາ ເພື່ອມາລົງທຶນຢູ່ພາຍໃນເຂດພັດທະນາ ເຊັນ: ບໍລິສັດ ເສັ້ນທາງລົດໄຟ ລາວ-ຈີນ ຈໍາກັດ, ບໍລິສັດ ໂຮຢາ ລາວ ຈໍາກັດ, ບໍລິສັດ ເປໂຕຣເຄມີ ລາວ ຈໍາກັດ ແລະບໍລິສັດອື່ນໆທີ່ໃຫຍ່ ແລະ ມີຊື່ສຽງຈາກຫຼາຍປະເທດ.

ເພື່ອຕອບສະໜອງຄວາມຕ້ອງການການຊົມໃຊ້ໄຟຟ້າ ທີ່ນັບມື້ນັບເພີ່ມຂຶ້ນ ຂອງບັນດາວິສາຫະກິດ ຢູ່ພາຍໃນເຂດພັດທະນາກວມລວມໄຊເຊດຖາ ຮັບປະກັນການສະໜອງພະລັງງານໄຟຟ້າທີ່ປອດໄພ, ໝັ້ັ້ນຄົງ ແລະໜ້າເຊື່ອຖືໄດ້, ບໍລິສັດ LCC ຜູ້ລົງທຶນພັດທະນາ ແລະ ບໍລິຫານ ເຂດພັດທະນາກວມລວມໄຊເຊດຖາ ໄດ້ພະຍາຍາມສ້າງພື້ນຖານໂຄງລ່າງການສະໜອງພະລັງງານໄຟຟ້າຢູ່ພາຍໃນເຂດໃຫ້ດີກວ່າເກົ່າ ໃນຕະຫຼອດໄລຍະທີ່ຜ່ານມາ ເພື່ອປັບປຸງຄວາມສາມາດໃນການສະໜອງພະລັງງານໄຟຟ້າ.

ດ້ວຍຄວາມພະຍາຍາມຮ່ວມກັນຂອງບໍລິສັດ LCC ແລະ ບໍລິສັດ EDL ໃນວັນທີ 11 ເດືອນ 8 ປີ 2021 ໄຟຟ້າວົງຈອນທີ່ສອງ 115kV ຂອງເຂດພັດທະນາກວມລວມໄຊເຊດຖາ ໄດ້ເຊື່ອມຕໍ່ເຂົ້າຕາຂ່າຍໄຟຟ້າແຫ່ງຊາດລາວ ແລະ ໄດ້ຮັບການຈ່າຍໄຟ ປະສົບຜົນສໍາເລັດ. ຄວາມຍາວທັງໝົດຂອງສາຍສົ່ງມີ 26,9 ກິໂລແມັດ, ເສົາສົ່ງໄຟຟ້າແຮງສູງທີ່ສ້າງໃໝ່ມີ 24 ເສົາ ໄດ້ເຊື່ອມຕໍ່ກັບສະຖານີໄຟຟ້າ ທ່ານາແລ້ງກັບສະຖານີໄຟຟ້າ ໂຄກສະອາດ ແລະ ໄດ້ຮັບການປົກປ້ອງໃນການສົ່ງຕໍ່ພະລັງງານລະຫວ່າງສະຖານີ ໂດຍຜ່ານອຸປະກອນປ້ອງກັນ, ມີລະບົບສື່ສານທີ່ສາມາດຕິດຕໍ່ພົວພັນກັບສະຖານີທ່ານາແລ້ງ, ສະຖານີໂຄກສະອາດ ແລະ ສູນບັນຊາລະບົບໄຟຟ້າແຫ່ງຊາດ.


ຫຼັງຈາກໄດ້ທີ່ຊົມໃຊ້ພະລັງງານໄຟຟ້າ ຈາກສາຍສົ່ງໄຟຟ້າວົງຈອນທີສອງ ເຂດພັດທະນາກວມລວມໄຊເຊດຖາ ກໍໄດ້ມີສາຍສົ່ງສະໜອງໄຟຟ້າແຮງສູງ 115kV ສອງສາຍທີ່ເປັນເອກະລາດ, ສາມາດຫຼຸດຜ່ອນໂອກາດຂອງໄຟຟ້າຕັດ, ແລະໄດ້ມີການປັບປຸງຄວາມໝັ້ນຄົງ ແລະ ຄວາມໜ້າເຊື່ອຖືຂອງການສະໜອງພະລັງງານໄຟຟ້າຢູ່ເຂດພັດທະນາ ຢ່າງຫຼວງຫຼາຍ, ໃຫ້ຄວາມຮັບປະກັນແກ່ການຜະລິດຕະຫຼອດ 24ຊົ່ວໂມງຢ່າງຕໍ່ເນື່ອງຂອງວິສາຫະກິດພາຍໃນເຂດພັດທະນາ.


ເຂດພັດທະນາກວມລວມໄຊເຊດຖານະຄອນຫຼວງວຽງຈັນ  ເປັນການຮ່ວມທຶນສ້າງຕັ້ງລະຫວ່າງ ອົງການປົກຄອງນະຄອນຫຼວງວຽງຈັນ ແລະ ກຸ່ມບໍລິສັດ ກໍ່ສ້າງ ແລະ ລົງທຶນແຂວງຢູນນານຮຸ້ນສ່ວນຈໍາກັດ ເປັນເຂດທີ່ທັງສອງລັດຖະບານກໍານົດເປັນໂຄງການຮ່ວມມືລະດັບຊາດ, ເປັນເຂດຮ່ວມມືເສດຖະກິດການຄ້າຕ່າງປະເທດຂອງສປຈີນແຫ່ງດຽວຢູ່ໃນລາວ, ຍັງເປັນເຂດເສດຖະກິດພິເສດຂອງສປປ ລາວ, ເຊິ່ງຖືກບັນທຶກໃນ “ການຈັດຕັ້ງປະຕິບັດເນື້ອໃນຈິດໃຈແຜນແມ່ບົດການສ້າງຄູ່ຮ່ວມຊາຕາກໍາລາວ-ຈີນ” ຮູບແບບການພັດທະນາແມ່ນຖືເອົາ (ການປະສົມປະສານກັນລະຫວ່າງອຸດສະຫະກໍາ ແລະ ຕົວເມືອງ), ວາງແຜນຄຸນລັກສະນະຂອງເຂດອຸດສະຫະກໍາ ແລະ ຕົວເມືອງໃໝນະຄອນຫຼວງວຽງຈັນ  ໂດຍມີແຜນການລົງທຶນມູນຄ່າ 5 ຕື້ ໂດລາສະຫາລັດ.

ມາຮອດປະຈຸບັນ ເຂດພັດທະນາໄດ້ສໍາເລັດວຽກງານການກໍ່ສ້າງພື້ນຖານໂຄງລ່າງໄລຍະທີ1 ໃນເນື້ອທີ່ 400ເຮັກຕາ, ພ້ອມທັງສາມາດດຶງດູດນັກລົງທຶນເຂົ້າມາລົງທຶນພາຍໃນເຂດໄດ້ 100 ບໍລິສັດ. ປະຈຸບັນ ເຂດພັດທະນາ ແມ່ນກໍາລັງຜັກດັນສຸມໃສ່ ການລົງທຶນກໍ່ສ້າງໂຄງລ່າງພື້ນຖານໄລຍະທີສອງ ແລະ ກໍ່ສ້າງເຂດຕົວເມືອງໃໝ່ນະຄອນຫຼວງວຽງຈັນຄົບຊຸດ, ເພື່ອສ້າງໃຫ້ກາຍເປັນຕົວເມືອງໃໝ່ນະຄອນຫຼວງວຽງຈັນ, ເປັນເມືອງທີ່ມີເຂດພັກຜ່ອນສີຂຽວ, ເມືອງພັດທະນານິເວດວິທະຍາ, ເມືອງທີ່ມີຊຸມຊົນທີ່ສະຫງົບ ແລະ ເປັນເມືອງຕົວແບບທີ່ທັນສະໄໝ.