ຕົວເລກການຕິດເຊື້ອໂຄວິດ-19 ຢູ່ ສປປ ລາວ ວັນທີ 6 ສິງຫາມີ 267 ຄົນ ໃນນີ້ຈາກໃນຊຸມຊົນ 10 ຄົນ ແລະ ນໍາເຂົ້າ 257 ຄົນ ເຮັດໃຫ້ຍອດຜູ້ຕິດເຊື້ອສະສົມ 7.778 ຄົນ

357

ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຖະແຫຼງຂ່າວກ່ຽວກັບສະພາບໂຄວິດ-19 ປະຈໍາວັນທີ 6 ສິງງຫາ 2021 ຢູ່ ສປປ ລາວ ມາຮອດວັນທີ 5 ສິງຫາຜ່ານມາ ໄດ້ກວດວິເຄາະທັງໝົດ 2.200 ຄົນ, ໃນນັ້ນ ກວດພົບຜູ້ຕິດເຊື້ອໃໝ່ 267 ຄົນ ເຊິ່ງຕິດເຊື້ອໃນຊຸມຊົນ 10 ຄົນ ຄືຢູ່ແຂວງບໍ່ແກ້ວ 8 ຄົນ (ເມືອງຕົ້ນເຜີ້ງ), ສະຫວັນນະເຂດ 1 ຄົນ ແລະ ຈຳປາສັກ 1 ຄົນ.

ຕິດຈາກກໍລະນີນໍາເຂົ້າ 257 ຄົນ ຈາກ ນະຄອນຫຼວງວຽງຈັນ 35 ຄົນ, ວຽງຈັນ 1 ຄົນ, ໄຊຍະບູລີ 2 ຄົນ, ຫຼວງພະບາງ 1 ຄົນ, ບໍລິຄຳໄຊ 1 ຄົນ, ຄຳມ່ວນ 15 ຄົນ, ສະຫວັນນະເຂດ 73 ຄົນ, ສາລະວັນ 52 ຄົນ ແລະ ຈຳປາສັກ 77 ຄົນ ເຊິ່ງກວດພົບຈາກແຮງງານລາວ ທີ່ກັບມາແຕ່ປະເທດເພື່ອນບ້ານ ເຂົ້າຕາມຈຸດຜ່ານແດນສາກົນ. ມາຮອດມື້ນີ້ ສປປ ລາວ ມີຕົວເລກຜູ້ຕິດເຊື້ອສະສົມທັງໝົດ 7.778 ຄົນ, ຄົນເຈັບເສຍຊີວິດສະສົມ 7 ຄົນ (ໃໝ່ 0) ແລະ ກໍາລັງປິ່ນປົວ ທັງໝົດ 3.887 ຄົນ.


ສ່ວນຜູ້ເດີນທາງເຂົ້າມາ ສປປ ລາວ ຜ່ານດ່ານຕ່າງໆ ໃນວັນທີ 5 ສິງຫາຜ່ານມາ ມີທັງໝົດ 3.651 ຄົນ ທັງໝົດແມ່ນໄດ້ເກັບຕົວຢ່າງກວດ ແລະ ນຳສົ່ງເຂົ້າສູນຈຳກັດບໍລິເວນ 14 ວັນ ເຊິ່ງປັດຈຸບັນ ທົ່ວປະເທດ ມີສູນຈຳກັດບໍລິເວນ ທີ່ຍັງເປີດຢູ່ 79 ສູນ ແລະ 43 ໂຮງແຮມ ມີຜູ້ຈຳກັດບໍລິເວນ 13.398 ຄົນ.

["]


ໃນຂະນະທີ່ສະພາບການຕິດເຊື້ອໃນທົ່ວໂລກ: ປັດຈຸບັນ ທົ່ວໂລກມີລາຍງານຜູ້ຕິດເຊື້ອສະສົມ 201 ລ້ານກວ່າຄົນ (680.649 ໃໝ່), ເສຍຊິວິດ 4,2 ລ້ານກວ່າຄົນ (9.663 ໃໝ່), ປີ່ນປົວຫາຍດີ 181 ລ້ານກວ່າຄົນ (415.948 ໃໝ່) ໂດຍ 3 ອັນດັບປະເທດທີ່ມີຜູ້ຕິດເຊື້ອ ແລະ ເສຍຊິວິດຫຼາຍກວ່າໝູ່ໃນໂລກ ກໍ່ຍັງແມ່ນ ສະຫະລັດອາເມລິກາ (ຕິດເຊື້ອໃໝ່ສູງກວ່າໝູ່ 113,447 ຄົນ), ອິນເດຍ ແລະ ບຣາຊິວ ແລະ ປະເທດທີ່ມີຊາຍແດນຕິດກັບ ສປປ ລາວ ແມ່ນປະເທດໄທ ມີລາຍງານຜູ້ຕິດເຊື້ອໃໝ່ ສູງກວ່າໝູ່ 20.920 ຄົນມື້ດຽວ, ຮອງລົງມາແມ່ນ ມຽນມາ ຕິດເຊື້ອໃໝ່ 4.132 ກໍລະນີ ແລະ ຜູ້ເສຍຊີວິດໃໝ່ ສູງກວ່າໝູ່ 293 ຄົນມື້ດຽວ.


ທ່ານ ດຣ. ສີສະຫວາດ ສຸດທານີລະໄຊ ກ່າວຕື່ມວ່າ: ປັດຈຸບັນ ສະພາບການລະບາດຂອງພະຍາດໂຄວິດ-19 ໃນອາຊຽນ ຍັງຄົງໜ້າເປັນຫ່ວງໃນຫຼາຍປະເທດ ມີຜູ້ຕິດເຊື້ອສະສົມເພິ່ມສູງຂຶ້ນ ຍ້ອນ ສາຍພັນເດວຕ້າ ຈຶ່ງເຮັດໃຫ້ບາງປະເທດກັບມາໃຊ້ມາດຕະການລ໋ອກດາວຄືນອີກ; ສໍາລັບ ສປປ ລາວ ຜູ້ທີ່ເດີນທາງເຂົ້າມາ ພາຍຫຼັງຈຳກັດບໍລິເວນຄົບກຳນົດ 14 ວັນ ຢູ່ສູນຂອງສູນກາງ/ແຂວງ ແລ້ວ ຈະໄດ້ສືບຕໍ່ໄປຈຳກັດບໍລິເວນຢູ່ສູນຂອງເມືອງ/ບ້ານ ຕື່ມອີກ 14 ວັນ ເພື່ອສະກັດກັ້ນ ການແຜ່ລະບາດໃນຊຸມຊົນບໍ່ໃຫ້ເປັນວົງກວ້າງ ຕ້ອງປະຕິບັດຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ສະບັບເລກທີ 956/ຫສນຍ, ລົງວັນທີ 3 ສິງຫາ 2021. ນອກຈາກນັ້ນ, ສັງເກດເຫັນວ່າ ຍັງມີບາງຮ້ານກິນດື່ມ ເປີດໃຫ້ບໍລິການແກ່ລູກຄ້າ ບໍ່ປະຕິບັດຕາມແຈ້ງການທີ່ຄະນະສະເພາະກິດວາງອອກ ເຊິ່ງມີຄວາມສ່ຽງສູງທີ່ຈະເກີດການລະບາດຮອບໃໝ່.

ໃນອາທິດນີ້ ພວກເຮົາໄດ້ຮັບວັກຊີນ AstraZeneca ຈຳນວນ 1 ລ້ານກວ່າໂດສ (ຈາກການຊ່ວຍເຫຼືອຂອງລັດຖະບານອັງກິດ ແລະ ລັດຖະບານຍີ່ປຸ່ນ) ມາສັກໃຫ້ແກ່ພໍ່ແມ່, ປະຊາຊົນບັນດາເຜົ່າ ໃນຂອບເຂດທົ່ວປະເທດ ຈຶ່ງບໍ່ໃຫ້ບັນດາທ່ານກັງວົນວ່າວັກຊີນຈະບໍ່ພຽງພໍ ແລະ ຈະໄດ້ສັກໃຫ້ກຸ່ມເປົ້າໝາຍ ໃຫ້ໄດ້ຄາດໝາຍ 50% ຂຶ້ນໄປ ພາຍໃນປີ 2021 ນີ້. ເມື່ອທ່ານໄປຮັບວັກຊີນ ຢູ່ຈຸດບໍລິການໃກ້ບ້ານທ່ານ ຕ້ອງຊ່ວຍກັນຮັກສາຄວາມເປັນລະບຽບຮຽບຮ້ອຍ, ບໍ່ໃຫ້ແຊງຄິວກັນ, ໃຫ້ກຽດຜູ້ອາວຸໂສ, ມາຕາມນັດຂອງແພດໝໍ.


ເພື່ອກ້າວຂ້າມຜ່ານວິກິດນີ້ໄປດ້ວຍກັນ ຈຶ່ງຂໍຮຽກຮ້ອງມາຍັງທຸກພາກສ່ວນໃນສັງຄົມ ຈົ່ງເຂັ້ມງວດໃນການປ້ອງກັນຕົນເອງ, ບໍ່ເອົາມືສຳຜັດໃບໜ້າ, ໃສ່ຜ້າປິດປາກ-ດັງ, ຫຼີກລ້ຽງການອອກຈາກບ້ານ ຖ້າບໍ່ຈຳເປັນ, ຮັກສາໄລຍະຫ່າງ, ໝັ່ນລ້າງມືເລື້ອຍໆດ້ວຍນ້ຳສະອາດໃສ່ສະບູ ຫຼື ເຈວລ້າງມືຂ້າເຊື້ອ, ບໍ່ຈັດງານສັງສັນກັບໝູ່ຄູ່, ຖ້າທ່ານຮູ້ສຶກບໍ່ສະບາຍ ຫຼື ສຳຜັດໃກ້ຊິດນຳຜູ້ຕິດເຊື້ອ ຕ້ອງຮີບໄປພົບແພດ ເພື່ອເກັບຕົວຢ່າງກວດ ແລະ ຮັບການປິ່ນປົວທັນການ.

ຂ່າວ: ສັນຕິ