ວາລະສານ FORTUNE ໄດ້ເປີດເຜີຍລາຍຊື່ FORTUNE Global 500 ຫຼື 500 ບໍລິສັດທີ່ໃຫຍ່ທີ່ສຸດໃນໂລກ ໂດຍ ບໍລິສັດຈາກ ຈີນ ຕິດອັນດັບ 143 ບໍລິສັດ, ຈາກສະຫະລັດອາເມຣິກາ 122 ແຫ່ງ ແລະ ຍີ່ປຸ່ນ 53 ແຫ່ງ ໂດຍບໍລິສັດ Walmart ຍັງຢຶດອັນດັບ 1 ຂອງໂລກເປັນປີທີ 8 ຕິດຕໍ່ກັນ.
ລາຍງານລະບຸວ່າ: ບໍລິສັດຈາກ ສປ ຈີນ ລວມທັງຮົງກົງ ມີບໍລິສັດໃຫຍ່ຕິດອັນດັບຫຼາຍທີ່ສຸດມີເຖິງ 135 ບໍລິສັດ ເພີ່ມຂຶ້ນ 11 ບໍລິສັດເມື່ອທຽບໃສ່ປີຜ່ານມາ ແລະ ເມື່ອລວມໄຕ້ຫວັນໃສ່ແລ້ວ ເຮັດໃຫ້ບໍລິສັດຈາກເກຣທເຕີຣ໌ ຊາຍນາລວມເປັນ 143 ບໍລິສັດ.
ໃນຂະນະທີ່ສະຫະລັດອາເມຣິກາມີລາຍຊື່ຕິດ 122 ບໍລິສັດ ເພີ່ມຂຶ້ນພຽງ 1 ບໍລິສັດຈາກປີຜ່ານມາ, ຍີ່ປຸ່ນຍັງມີບໍລິສັດຕິດອັນດັບ 53 ແຫ່ງ ຍັງຄົງທີ່ (ບໍ່ເພີ່ມຂຶ້ນ), ທັງນີ້ 500 ບໍລິສັດທີ່ໃຫຍ່ທີ່ສຸດໃນໂລກປີ 2021 ມາຈາກ 220 ເມືອງ, ຈາກ 31 ປະເທດ ທົ່ວໂລກ ແລະ FORTUNE Global 500 ປີນີ້ ມີຜູ້ຍິງເປັນຜູ້ບໍລິຫານ (CEO) ລວມມີ 23 ຄົນ ເພີ່ມຂຶ້ນ 9 ຄົນ ຈາກປີຜ່ານມາ.
ທັງນີ້ ບໍລິສັດ FORTUNE Global 500 ມີລາຍໄດ້ລວມກັນເທົ່າກັບ 1/3 ຂອງຈີດີພີໂລກ ໂດຍມີລາຍໄດ້ 31,7 ລ້ານລ້ານໂດລາສະຫະລັດ ຫຼື 31,7 ພັນຕື້ໂດລາສະຫະລັດ ຫຼຸດລົງ 5% ແລະ ມີກຳໄລ 1,6 ພັນຕື້ໂດລາສະຫະລັດ ຫຼຸດລົງ 20% ເມື່ອທຽບໃສ່ປີ 2019 ແລະ ສາມາດສ້າງວຽກເຮັດງານທຳໃຫ້ແກ່ປະຊາຊົນ 69,7 ລ້ານຄົນທົ່ວໂລກ.
ທັງນີ້ ບໍລິສັດແອັບເປີ້ລ ເຊິ່ງເປັນບໍລິສັດໃຫຍ່ອັນດັບ 6 ຂອງໂລກ ແຕ່ມີກຳໄລສູງເຖິງ 57 ຕື້ໂດລາສະຫະລັດ ແລະ ເປັນບໍລິສັດສ້າງກຳໄລສູງທີ່ສຸດຂອງ FORTUNE Global 500 ຫຼື ບໍລິສັດໃຫຍ່ທີ່ສຸດ 500 ອັນດັບທຳອິດຂອງໂລກ, ລົ້ມແຊັມເກົ່າ 2 ສະໄໝຢ່າງ Saudi Aramco ທີ່ຫຼຸດລົງໄປຢູ່ອັນດັບທີ 14 ຂອງໂລກ.
ທ່ານ ສະກ໊ອດ ເດຄາໂລ ບັນນາທິການຈັດອັນດັບລາຍຊື່ FORTUNE Global 500 ປະຈຳປີ 2021 ກ່າວວ່າ: ການແຜ່ລະບາດຂອງພະຍາດໂຄວິດ-19 ໄດ້ເຮັດໃຫ້ເກີດການປ່ຽນແປງຄັ້ງໃຫຍ່ ແລະ ຈະສົ່ງຜົນໄລຍະຍາວຕໍ່ພາກທຸລະກິດທົ່ວໂລກ ແຕ່ຫາກຍົກບັນຫາດັ່ງກ່າວມາເປັນຕົວເລັ່ງປະຕິກິລິຍາ FORTUNE Global 500 ຈະສະແດງໃຫ້ໂລກເຫັນວິທີການປັບຕົວ, ວິວັດທະນາການ ແລະ ການສ້າງຕົວຕົນຂຶ້ນມາໃໝ່, FORTUNE Global 500 ເປັນພາບຂອງໂລກທີ່ພວກເຮົາປະໄວ້ຂ້າງຫຼັງ ແລະ ເປັນແນວທາງສຳລັບສະພາບແວດລ້ອມໃໝ່ທີ່ກຳລັງກໍ່ຕົວ.
ສຳລັບບໍລິສັດຂະໜາດໃຫຍ່ 10 ອັນດັບທຳອິດຂອງ FORTUNE Global 500 ປະກອບມີ: Walmart (ສະຫະລັດ), State Grid (ຈີນ), Amazon.com (ສະຫະລັດ), China National Petroleum (ຈີນ), Sinopec (ຈີນ), Apple (ສະຫະລັດ), CVS Health (ສະຫະລັດ), UnitedHealth Group (ສະຫະລັດ), Toyota Motor (ຍີ່ປຸ່ນ) ແລະ Volkswagen (ເຢຍລະມັນ).
