ວິກເຕີ ອະເຊລເຊັນ ນັກກີລາດອກປີກໄກ່ມື 2 ຂອງໂລກຈາກດານມາກ ສ້າງຜົນງານໂດດເດັ່ນເອົາຊະນະ ເສິນ ຫຼົງ ມື 6 ຂອງໂລກ ທີ່ເປັນທັງແຊັມເກົ່າຈາກ ສປ ຈີນ ໄປ 2-0 ເຊັດ ຄວ້າຫຼຽນຄໍາກີລາດອກປີກໄກ່ປະເພດຊາຍດ່ຽວ ໂອແລມປິກ 2020 ໄປຄອງເມື່ອວັນທີ 2 ສິງຫາ 2021.
ສະຖິຕິການພົບກັນທີ່ຜ່ານມາ 19 ຄັ້ງ ເສິນ ຫຼົງ ເຮັດໄດ້ດີກວ່າເອົາຊະນະໄດ້ເຖິງ 14 ຄັ້ງ ໂດຍສະເພາະໃນໂອແລມປິກ 2016 ທີ່ປະເທດບຣາຊິນ ເສິນ ຫຼົງ ເອົາຊະນະ ອະເຊລເຊັນ 2-0 ເຊັດໃນຮອບຮອງຊະນະເລີດ ກ່ອນທີ່ ເສິນ ຫຼົງ ຈະຍາດໄດ້ຫຼຽນຄໍາໃນທີ່ສຸດ, ສ່ວນ ອະເຊລເຊັນ ຍາດໄດ້ຫຼຽນທອງ.
ແຕ່ໃນໂອແລມປິກ 2020 ອະເຊລເຊັນ ສາມາດລ້າງຕາໄດ້ສໍາເລັດ ດ້ວຍການເອົາຊະນະໄປ 2-0 ເຊັດ 21-15 ແລະ 21-12 ດ້ວຍເວລາ 51 ນາທີ ຄວ້າຫຼຽນຄໍາໄປຄອງ ພ້ອມທັງເຮັດໃຫ້ ອະເຊລເຊັນ ຄວ້າຫຼຽນຄໍາເປັນສະໄໝທໍາອິດ ແລະ ເປັນນັກກີລາດອກປີກໄກ່ ຄົນທີ 2 ຂອງປະເທດໃນຮອບ 25 ປີທີ່ສາມາດຄວ້າຫຼຽນຄໍາຕໍ່ຈາກ ພອລ ອີຣິກ ໂຮລເຢີ ທີ່ເຮັດໄດ້ໃນປີ 1996 ເຊິ່ງປັດຈຸບັນເປັນປະທານ ສະຫະພັນເທັນນິສໂລກ ( BWF ).
ສ່ວນຫຼຽນທອງເປັນຂອງ ແອນໂທນີ ຊິນນິຊຸກະ ກິນຕິ້ງ ຈາກອິນໂດເນເຊຍ ເອົາຊະນະ ເຄລວິນ ຄໍດອນ ຈາກກົວເຕມາລາ 2-0 ເຊັດ 21-12 ແລະ 21-13 ໃຊ້ເວລາໄປ 38 ນາທີ.
ຮູບຈາກ: AP
