ລມຕ ອຄ ລົງຕິດຕາມການດໍາເນີນທຸລະກິດ ບໍລິສັດ ພີທີທີ ( ລາວ ) ຈຳກັດ

452

ເພື່ອຕິດຕາມຊຸກຍູ້ການຈັດຕັ້ງປະຕິບັດນະໂຍບາຍໃນການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ – 19 ພາຍໃນບໍລິສັດ ແລະ ບັນດາຮ້ານຄ້າໃນປໍ້ານໍ້າມັນຂອງ ບໍລິສັດ ພີທີທີ ( ລາວ ) ຈຳກັດ, ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ລົງເຄື່ອນໄຫວຢ້ຽມຢາມ ບໍລິສັດ ພີທີທີ ( ລາວ ) ຈໍາກັດ.

ໃນວັນທີ 30 ກໍລະກົດ 2021 ນີ້ ທ່ານ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກຳ ແລະ ການຄ້າ ( ລມຕ ອຄ ) ພ້ອມຄະນະ ໄດ້ລົງເຄື່ອນໄຫວຢ້ຽມຢາມ ບໍລິສັດ ພີທີທີ ( ລາວ ) ຈໍາກັດ ໂດຍຈຸດປະສົງໃນການລົງເຄື່ອນໄຫວຢ້ຽມຢາມ ບໍລິສັດ ພີທີທີ ( ລາວ ) ຈຳກັດ ໃນຄັ້ງນີ້ ແມ່ນເພື່ອຕິດຕາມຊຸກຍູ້ການຈັດຕັ້ງປະຕິບັດວຽກງານການຄຸ້ມຄອງຄຸນນະພາບ ແລະ ມາດຕະຖານ, ດ້ານລາຄາ, ການບໍລິການ, ດ້ານການປົກປ້ອງຜູ້ຊົມໃຊ້, ການຈັດສັນຄວາມສະອາດ ແລະ ການປະຕິບັດນະໂຍບາຍປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ – 19 ຂອງບໍລິສັດ ພາຍໃນປໍ້ານໍ້າມັນ ແລະ ບັນດາຮ້ານຄ້າໃນປໍ້ານໍ້າມັນຂອງ ບໍລິສັດ ພີທີທີ ( ລາວ ) ຈຳກັດ. ພ້ອມກັນນີ້, ກໍເພື່ອຮັບຟັງການລາຍງານສະພາບການຈັດຕັ້ງປະຕິບັດທຸລະກິດຂອງບໍລິສັດ ແລະ ລົງຢ້ຽມຢາມສາງນໍ້າມັນຂອງ ບໍລິສັດ ພີທີທີ ( ລາວ ) ກວດເບິ່ງສະພາບການດຳເນີນງານຂອງສາງນໍ້າມັນ ແລະ ເບິ່ງການກວດສອບຄຸນນະພາບນໍ້າມັນຂອງບໍລິສັດ.

["]

ໃນການລົງຢ້ຽມຢາມໃນຄັ້ງນີ້ ທ່ານ ວັນສະຫວ່າງ ສ່ອງແສ່ງ ຮັກສາການຜູ້ອໍານວຍການ ພ້ອມດ້ວຍພະນັກງານຂອງ ບໍລິສັດ ພີທີທີ ( ລາວ ) ຈຳກັດ ໄດ້ຕ້ອນຮັບ ແລະ ລາຍງານສະພາບການຈັດຕັ້ງປະຕິບັດ ແລະ ການດໍາເນີນທຸລະກິດຂອງບໍລິສັດໃນໄລຍະຜ່ານມາ ເຊິ່ງບໍລິສັດ PTT ( Lao ) CO.,LTD ຫຼື ບໍລິສັດ ພີທີທີ ( ລາວ ) ຈໍາກັດ ຕັ້ງຢູ່ບ້ານຮ່ອງແກ ເມືອງໄຊເສດຖາ ນະຄອນຫຼວງວຽງຈັນ ໄດ້ສ້າງຕັ້ງຂຶ້ນໃນປີ 1993 ປັດຈຸບັນມີພະນັກງານປະຈໍາ 139 ຄົນ.

ບໍລິສັດ ພີທີທີ ( ລາວ ) ຈຳກັດ ເຊິ່ງເປັນບໍລິສັດໃນເຄືອຂອງ ບໍລິສັດ ພີທີທີໂອອາ ນ້ຳມັນ ແລະ ການຄ້າປີກ ຈຳກັດ ມະຫາຊົນ ດຳເນີນທຸລະກິດຕ່າງໆ ເປັນຕົ້ນແມ່ນສະຖານີບໍລິການນ້ຳມັນ, ທຸລະກິດກຸ່ມອຸດສາຫະກຳ, ໂຮງງານ/ໂຄງການ/ກໍ່ສ້າງຕ່າງໆ, ທຸລະກິດ Non-oil, ສູນບໍລິການກວດເຊັກລົດ Procheck & Fit Auto, Cafe Amazon, ຮ້ານເຂົ້າປຽກປູ ປາກເຊ ແລະ ຮ້ານຊານົມໄຂ່ມຸກ Pearly Tea ເຊິ່ງໄດ້ດໍາເນີນທຸລະກິດພາຍໃຕ້ໂລໂກ້ຂອງກຸ່ມບໍລິສັດ ພີທີທີໂອອາ ຈຳກັດ ມະຫາຊົນ ທີ່ເປັນເລີດທາງທຸລະກິດ ແລະ ຍັງຄົງຢຶດໝັ້ນພັນທະສັນຍາຄວາມຮັບຜິດຊອບຕໍ່ສັງຄົມ ແລະ ສິ່ງແວດລ້ອມໃນຕໍ່ໜ້າສະພາບແວດລ້ອມທາງການຕະຫຼາດຈະມຸ່ງໝັ້ນທີ່ຈະດຳເນີນທຸລະກິດຢ່າງມີປະສິດທິພາບດ້ວຍການເບິ່ງແຍງດູແລກິດຈະການທີ່ດີ.

ພາຍຫຼັງຮັບຟັງການລາຍງານ, ທ່ານລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍໄດ້ຍ້ອງຍໍຊົມເຊີຍ ບໍລິສັດ ແລະ ໄດ້ໃຫ້ທິດຊີ້ນໍາເນັ້ນໜັກໃຫ້ບໍລິສັດ ເອົາໃຈໃສ່ສືບຕໍ່ປະຕິບັດບັນດາມາດຕະຖານທີ່ດີຂອງບໍລິສັດທີ່ມີມາແລ້ວນັ້ນ ເພື່ອຮັບໃຊ້ສັງຄົມໃຫ້ດີຍິ່ງຂຶ້ນ; ໃຫ້ມີການກວດເຊັກປະລິມານ ແລະ ຄຸນນະພາບນໍ້າມັນຢ່າງມີຄຸນນະພາບສະໝໍ່າສະເໝີ, ປະຕິບັດມາດຕະການໃນການປ້ອງກັນພະຍາດໂຄວິດ – 19, ສືບຕໍ່ປະກອບສ່ວນຊ່ວຍເຫຼືອສັງຄົມ, ຮັກສາສິ່ງແວດລ້ອມ ແລະ ສໍາຄັນແມ່ນປະກອບສ່ວນພັນທະຕ່າງໆໃຫ້ລັດຖະບານທັນຕາມເວລາ ຖືກຕ້ອງຕາມລະບຽບກົດໝາຍ.

ຫຼັງຈາກຮັບຟັງການລາຍງານ ທ່ານລັດຖະມົນຕີ ພ້ອມດ້ວຍຄະນະ ກໍໄດ້ລົງໄປຢ້ຽມຢາມເບິ່ງສາງນໍ້າມັນ ບໍລິສັດ ພີທີທີ ( ລາວ ) ຈໍາກັດ ເພື່ອກວດກາສະພາບການດຳເນີນງານຂອງສ້າງນໍ້າມັນ ແລະ ຊົມການກວດສອບຄຸນນະພາບນໍ້າມັນຂອງ ບໍລິສັດ ພີທີທີ ( ລາວ ), ສະຖານທີ່ຕັ້ງຢູ່ຫຼັກ 28 ຖະໜົນເລກທີ 13 ໃຕ້ ນະຄອນຫຼວງວຽງຈັນ.