ເປັນເລື່ອງໜ້າປະທັບໃຈທີ່ບໍ່ມີໃຫ້ເຫັນກັນດົນໆ ໃນລະຫວ່າງການແຂ່ງຂັນກະໂດດສູງຊາຍຮອບຊີງຊະນະເລີດ ປະຈໍາການແຂ່ງຂັນ ໂອແລມປິກ 2020 ເມື່ອ ມູຕາຊ ເອັສຊາ ບາຊິນ ຈາກປະເທດກາຕ້າ ແລະ ຈິອັນມາໂກ ທໍາເບຣີ ຈາກອິຕາລີ ຕັດສິນໃຈຄອງຫຼຽນຄໍາຮ່ວມກັນ ຫຼັງຈາກທີ່ສ້າງສະຖິຕິເທົ່າກັນ.
ເຫດການດັ່ງກ່າວເກີດຂຶ້ນ ຫຼັງຈາກທີ່ທັງສອງສ້າງສະຖິຕິ 2,37 ແມັດເທົ່າກັນ ຈາກຜົນງານທີ່ບໍ່ພາດກັນເລີຍ ກ່ອນທີ່ຈະບໍ່ສາມາດຜ່ານຄວາມສູງໃນການຕັດສິນ 2,39 ເພື່ອຫາຜູ້ຊະນະ ເຮັດໃຫ້ຝ່າຍຈັດການແຂ່ງຂັນສະເໜີຕົວເລືອກສອງທາງຄື: ແຂ່ງຂັນຕໍ່ ຫຼື ຄອງຫຼຽນຄໍາຮ່ວມກັນ ເຊິ່ງທັງສອງເລືອກຄອງຫຼຽນຄໍາຮ່ວມກັນ ກ່ອນກອດຄໍກັນສະແດງຄວາມດີໃຈເຊິ່ງກັນ ແລະ ກັນ, ສ່ວນຫຼຽນທອງ ເປັນຂອງ ແມັກຊິນ ເນດາເຊເກົາ ຈາກເບລາຣຸສຊີ ທີ່ສ້າງສະຖິຕິໄດ້ເທົ່າກັນ 2,37 ແມັດ ແຕ່ມີການກະໂດດພາດຫຼາຍກວ່າ.
ສໍາລັບ ບາຊິນ ຈາກກາຕ້າ ເຄີຍເປັນແຊັມໂລກ 2 ສະໄໝ ແລະ ນີ້ເປັນແຊັມຄັ້ງທໍາອິດໃນໂອແລມປິກ, ສ່ວນ ທໍາເບຣີ ຈາກອິຕາລີ ຄວ້າຫຼຽນຄໍາຄັ້ງທໍາອິດໃນໂອແລມປິກ ແລະ ເປັນລາຍການໃຫຍ່ຄັ້ງທໍາອິດອີກດ້ວຍ.