1 ສິງຫາ ລາວ ມີຜູ້ຕິດເຊື້ອ 267 ຄົນ ຕິດເຊື້ອໃນຊຸມຊົນ 5 ຢູ່ຫຼວງນໍ້າທາ ຂະນະທີ່ ນວ ມີບ້ານແດງ 1 ບ້ານ

710

ໃນວັນທີ 1 ສິງຫາ 2021 ທ່ານ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຕາງໜ້າກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ໄດ້ຖະແຫຼງຂ່າວປະຈຳວັນ ທີ່ກະຊວງສາທາລະນະສຸກ.

ທ່ານ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກ່າວວ່າ: ສະພາບການລະບາດພະຍາດໂຄວິດ-19 ຢູ່ ສປປ ລາວ, ມາຮອດມື້ນີ້ ພວກເຮົາມີຕົວເລກຜູ້ຕິດເຊື້ອສະສົມທັງໝົດ 6.566 ຄົນ, ມີຕົວເລກຜູ້ເສຍຊີວິດສະສົມ 7 ຄົນ, ກໍາລັງປິ່ນປົວ ທັງໝົດ 3.030 ຄົນ ແລະ ປິ່ນປົວຫາຍດີ 3.529 ຄົນ (ກວມເອົາ 53.7% ຂອງຄົນເຈັບຕິດເຊື້ອທັງໝົດ) ມາຮອດ ວັນທີ 31 ກໍລະກົດ 2021 ໄດ້ກວດວິເຄາະທັງໝົດ 2.025 ຄົນ, ໃນນັ້ນ ກວດພົບຜູ້ຕິດເຊື້ອໃໝ່ ທັງໝົດ 267 ຄົນ (ແຂວງຫຼວງນໍ້າທາ ຕິດເຊື້ອໃນຊຸມຊົນ 5 ຄົນ ແມ່ນຜູ້ທີ່ເດີນທາງມາແຕ່ເມືອງຕົ້ນເຜິ້ງ, ແຂວງບໍ່ແກ້ວ) ແລະ ກໍລະນີນໍາເຂົ້າ 262 ຄົນ ຈາກ ນະຄອນຫຼວງ: 6 ຄົນ, ບໍ່ແກ້ວ: 1 ຄົນ, ບໍລິຄໍາໄຊ: 4 ຄົນ, ຄໍາມ່ວນ: 6 ຄົນ, ສະຫວັນນະເຂດ: 143 ຄົນ, ສາລະວັນ: 54 ຄົນ ແລະ ຈໍາປາສັກ: 48 ຄົນ, ສ່ວນຫຼາຍແມ່ນ ກວດພົບຈາກແຮງງານລາວ ທີ່ກັບມາແຕ່ປະເທດເພື່ອນບ້ານເຂົ້າຕາມຈຸດຜ່ານແດນສາກົນ.

["]

ການເຝົ້າລະວັງຢູ່ຕາມຈຸດຜ່ານແດນ ໃນຂອບເຂດທົ່ວປະເທດປັດຈຸບັນ ທົ່ວປະເທດ ມີສູນຈໍາກັດບໍລິເວນ ທີ່ຍັງເປີດຢູ່ 60 ສູນ ແລະ 44 ໂຮງແຮມ ມີຜູ້ຈຳກັດບໍລິເວນ 9.828 ຄົນ ການເຝົ້າລະວັງບ້ານເຂດແດງໃນນະຄອນຫຼວງວຽງຈັນ, ບ້ານໃໝ່ທີ່ກຳນົດເປັນເຂດແດງ ໃນນະຄອນຫຼວງວຽງຈັນ ແມ່ນບ້ານ ສໍາພັນນາ, ເມືອງ ສັງທອງ, ນະຄອນຫຼວງວຽງຈັນ ເຊິ່ງໄດ້ກຳນົດເປັນບ້ານເຂດແດງນັບແຕ່ວັນທີ 31 ກໍລະກົດ2021 ຈົນຮອດວັນທີ 13 ສິງຫາ 2021 ຖ້າບໍ່ມີກໍລະນີໃໝ່ເກີດຂຶ້ນໃນບ້ານຈຶ່ງຈະສິ້ນສຸດການເປັນບ້ານແດງ.

ສໍາລັບແຮງງານທີ່ກັບມາແຕ່ປະເທດເພື່ອນບ້ານ ທີ່ກໍາລັງຈໍາກັດບໍລິເວນຢູ່ບັນດາສູນຕ່າງໆ ໃນຂອບເຂດທົ່ວປະເທດ ກໍ່ຂໍໃຫ້ປະຕິບັດຕາມຄໍາແນະນໍາຂອງຄະນະສະເພາະກິດ ສະບັບເລກທີ 4646/ສພກ ລົງວັນທີ 30 ກໍລະກົດ 2021 ເຊັ່ນວ່າ: ຜູ້ທີ່ຈໍາກັດບໍລິເວນ ຕ້ອງຢູ່ແຕ່ໃນສະຖານທີ່ຈໍາກັດບໍລິເວນເປັນເວລາ 14 ວັນ, ຫ້າມບໍ່ໃຫ້ອອກໄປຂ້າງນອກ, ປະຕິບັດມາດຕະການກັນ ແລະ ຄວບຄຸມການຕິດເຊື້ອເຊັ່ນ: ຮັກສາໄລຍະຫ່າງ, ໃສຜ້າປິດປາກ-ດັງ, ໝັ່ນລ້າງມືດ້ວຍນໍ້າສະອາດໃສ່ສະບູ ຫຼື ເຈວລ້າງມີທີ່ມີເຊື້ອເຫຼົ່າສູງກ່ວາ 70% ຂື້ນໄປ, ພາຍຫຼັງຄົບກໍານົດ 14 ວັນແລ້ວ ແລະ ຜົນກວດວິເຄາະ 2 ຄັ້ງບໍ່ພົບເຊື້ອ ແມ່ນໃຫ້ໄປສືບຕໍ່ຈໍາກັດບໍລິເວນຢູ່ສະຖານທີ່ຄະນະສະເພາະກິດ ກໍານົດໄວ້ ຫຼື ບ້ານຕົນເອງຈົນກ່ວາຈະຄົບກໍານົດ 7 ວັນ.

ອີກເທື່ອໜຶ່ງ ຂໍຮຽກຮ້ອງມາຍັງພໍ່ແມ່ປະຊາຊົນ, ພະນັກງານ, ທະຫານ, ຕຳຫຼວດ ເພື່ອປ້ອງກັນບໍ່ໃຫ້ມີການແຜ່ລະບາດໃນຊຸມຊົນ, ພວກເຮົາ ຕ້ອງເອົາໃຈໃສ່ ປະຕິບັດມາດຕະການປ້ອງກັນການຕິດເຊື້ອ ທີ່ທາງຄະນະສະເພາະກິດວາງອອກຢ່າງເຂັ້ມງວດ ເພາະ ສັງເກດເຫັນວ່າປັດຈຸບັນ ປະຊາຊົນສ່ວນຫຼາຍຍັງຖືເບົາຕໍ່ການປະຕິບັດມາດຕະການເປັນຕົ້ນແມ່ນ ມີການຊຸມແຊວຢູ່ຮ້ານອາຫານກີນດື່ມ, ສັງສັນໝູ່ເພື່ອນ ແລະ ຄອບຄົວ ເຊິ່ງມີຄວາມສ່ຽງສູງທີ່ຈະເກີດການຕິດເຊື້ອ ແລະ ແຜ່ລະບາດໃນຊຸມຊົນ. ພ້ອມດຽວກັນນັ້ນ ຂໍແຈ້ງມາຍັງ ພໍ່ແມ່ປະຊາຊົນ, ພະນັກງານ, ທະຫານ ຕໍາຫຼວດພາຍໃນນະຄອນຫຼວງວຽງຈັນ ແລະ ບາງແຂວງຈົ່ງພ້ອມກັນໄປສັກຢາວັກຊີນປ້ອງກັນພະຍາດໂຄວິດ-19 ຕາມຈຸດຕ່າງໆ ທີ່ໄດ້ກໍານົດໄວ້ .