25 ກໍລະກົດ ພົບຜູ້ຕິດເຊື້ອພະຍາດໂຄວິດ-19 ໃໝ່ 142 ຄົນ ກໍລະນີນໍາເຂົ້າທັງໝົດ

344

ຫົວໜ້າກົມຄວບຄຸມພະຍາດຕິດຕໍ່ ກ່າວວ່າ ປັດຈຸບັນ ສປປ ລາວ ໄດ້ມີການຕິດຕາມເຝົ້າລະວັງການລະບາດຂອງພະຍາດໂຄວິດ-19 ສາຍພັນທີ່ແຮງງານລາວຕິດເຊື້ອນໍາເຂົ້າມາ ໂດຍພົບສາຍພັນເດວຕ້າ ສູງເຖິງ 35%. ໃນຂະນະທີ່ບັນດາປະເທດອ້ອມຂ້າງ ມີລາຍງານພົບສາຍພັນເດວຕ້າສູງເຖິງ 63%.


ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ກ່າວໃນພິທີຖະແຫຼງຂ່າວຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ປະຈໍາວັນທີ 25 ກໍລະກົດ 2021 ໃຫ້ຮູ້ວ່າ: ໃນວັນທີ 24 ກໍລະກົດ ໄດ້ກວດວິເຄາະທັງໝົດ 1.353 ຄົນ ກວດພົບຜູ້ຕິດເຊື້ອໃໝ່ 142 ຄົນ. ໃນນັ້ນ ຈາກ ນະຄອນຫຼວງວຽງຈັນ 11 ຄົນ, ຈໍາປາສັກ 45 ຄົນ, ສະຫວັນນະເຂດ 83 ຄົນ, ສາລະວັນ 1 ຄົນ, ບໍລິຄຳໄຊ 1 ຄົນ ແລະ ຄໍາມ່ວນ 1 ຄົນ ເຊິ່ງທັງໝົດແມ່ນກໍລະນີນຳເຂົ້າ ເຊິ່ງກວດພົບຈາກແຮງງານລາວ ທີ່ກັບມາແຕ່ປະເທດເພື່ອນບ້ານ ໂດຍຖືກຕ້ອງຕາມກົດໝາຍ.

ມາຮອດມື້ນີ້ ພວກເຮົາມີຕົວເລກຜູ້ຕິດເຊື້ອສະສົມທັງໝົດ 4.762 ຄົນ, ເສຍຊີວິດສະສົມ 5 ຄົນ ແລະ ກໍາລັງປິ່ນປົວ ທັງໝົດ 2.018 ຄົນ.

["]


ດ້ານການເຝົ້າລະວັງຢູ່ຕາມຈຸດຜ່ານແດນ ໃນຂອບເຂດທົ່ວປະເທດ ວັນທີ 24 ກໍລະກົດ ມີຜູ້ເດີນທາງເຂົ້າມາ ຕາມຈຸດຜ່ານດ່ານຕ່າງໆ ໃນ ສປປ ລາວ ທັງໝົດ 1.324 ຄົນ ເຊິ່ງທັງໝົດ ແມ່ນຖືກເກັບຕົວຢ່າງກວດຊອກຫາເຊື້ອ ແລະ ເຂ້ົ້າໄປຈຳກັດບໍລິເວນຢູ່ສູນທີ່ຄະນະສະເພາະກິດກຳນົດໄວ້ 14 ວັນ, ມາຮອດປັດຈຸບັນ ທົ່ວປະເທດ ມີສູນຈຳກັດບໍລິເວນ ທີ່ຍັງເປີດຢູ່ 49 ສູນ ແລະ ມີຜູ້ຈຳກັດບໍລິເວນ 9.083 ຄົນ.


ສ່ວນການລະບາດຂອງພະຍາດໂຄວິດ-19 ຢູ່ທົ່ວໂລກ ມີລາຍງານຜູ້ຕິດເຊື້ອສະສົມທັງໝົດ 194 ລ້ານກວ່າຄົນ (472.424 ໃໝ່), ເສຍຊິວິດທັງໝົດ 4 ລ້ານກວ່າຄົນ (7.723 ໃໝ່), ປີ່ນປົວຫາຍດີ 176 ລ້ານກວ່າຄົນ (416.681 ໃໝ່) ເຊິ່ງ 3 ອັນດັບ ປະເທດທີ່ມີຜູ້ຕິດເຊື້ອ ແລະ ເສຍຊິວິດຫຼາຍກວ່າໝູ່ໃນໂລກ ແມ່ນ ສະຫະລັດອາເມລິກາ, ອິນເດຍ (ລາຍງານຕິດເຊື້ອໃໝ່ ສູງກວ່າໝູ່ 40.284 ຄົນ) ແລະ ເບຣຊິນ (ລາຍງານເສຍຊີວິດເຊື້ອໃໝ່ ສູງກວ່າໝູ່ 1.080 ຄົນ).  ສຳລັບບັນດາປະເທດທີ່ມີຊາຍແດນຕິດກັບ ສປປ ລາວ ລາຍງານຜູ້ຕິດເຊື້ອໃໝ່ ສູງກວ່າໝູ່ ແມ່ນ ປະເທດໄທ ສູງເຖິງ 14.260 ຄົນ; ລາຍງານເສຍຊີວິດໃໝ່ ສູງກວ່າໝູ່ ແມ່ນ ປະເທດມຽນມາ ສູງເຖິງ 297 ຄົນ.

ທ່ານ ດຣ ຣັດຕະນະໄຊ ເພັດສຸວັນ ໃຫ້ຮູ້ຕື່ມອີກວ່າ: ມາຮອດປັດຈຸບັນ ການລະບາດຮອບໃໝ່ ຈາກສາຍພັນເດວຕ້າ ໃນບັນດາປະເທດອ້ອມຂ້າງ ສປປ ລາວ ມີລາຍງານພົບສາຍພັນເດວຕ້າສູງເຖິງ 63% ຈຶ່ງເປັນສາເຫດໃຫ້ມີແຮງງານລາວຈຳນວນຫຼວງຫຼາຍ ກັບຄືນມາປະເທດຕາມຈຸດຜ່ານແດນຕ່າງໆ ໃນຂອບເຂດທົ່ວປະເທ.  ສຳລັບປະເທດຂອງພວກເຮົາ ກໍໄດ້ມີການຕິດຕາມເຝົ້າລະວັງ ສາຍພັນທີ່ແຮງງານລາວຕິດເຊື້ອນຳເຂົ້າມາ ພົບສາຍພັນເດວຕ້າ ສູງເຖິງ 35% ເຊິ່ງແຮງງານທີ່ຕິດເຊື້ອດັ່ງກ່າວທັງໝົດ ແມ່ນໄດ້ຮັບການປິ່ນປົວໃນໂຮງໝໍ ເຊິ່ງພາຍຫຼັງປິ່ນປົວຫາຍດີ 14 ວັນ ແມ່ນຈະຍັງສືບຕໍ່ຈຳກັດບໍລິເວນຕົນເອງຕື່ມອີກ 7 ວັນ.

ພ້ອມນີ້, ສຳລັບແຮງງານທີ່ກັບມາແຕ່ປະເທດເພື່ອນບ້ານທີ່ກວດບໍ່ພົບເຊື້ອນັ້ນ ແມ່ນໄດ້ຖືກນຳສົ່ງຈຳກັດບໍລິເວນ ເປັນເວລາ 14 ວັນ ນຳບັນດາສູນຕ່າງໆ ພາຍໃນແຂວງຂອງຕົນ ແລະ ຈະມີການກວດຫາເຊື້ອ 2 ຄັ້ງ ກ່ອນຈະໃຫ້ອອກຈາກສູນ ເພື່ອໃຫ້ພວກກ່ຽວໄປສືບຕໍ່ຈຳກັດບໍລິເວນຕື່ມອີກ 7 ວັນ ຢູ່ເຮືອນຕົນເອງ (ສຳລັບຜູ້ມີເງື່ອນໄຂ) ແລະ ທີ່ສູນຈຳກັດບໍລິເວນຂອງເມືອງ ສຳລັບຜູ້ບໍ່ມີເງື່ອນໄຂ.

 

ຂ່າວ: ສັນຕິ, ພາບ: ສຸກສະຫວັນ