ພາຍຫຼັງຝົນຕົກຕິດຕໍ່ກັນເປັນເວລາຫຼາຍວັນ ແຕ່ວັນທີ 18 ຫາ 21 ກໍລະກົດ 2021 ຜ່ານມາ ໄດ້ເຮັດໃຫ້ຫ້ວຍນໍ້າ ແລະ ແມ່ນໍ້າສາຍຕ່າງໆ ມີປະລິມານເພີ່ມຂຶ້ນຢ່າງກະທັນຫັນ ໄດ້ເຮັດໃຫ້ພື້ນຖານໂຄງລ່າງມີຄວາມເສຍຫາຍຫຼາຍພໍສົມຄວນ ແລະ ໄດ້ເຮັດໃຫ້ແມ່ນໍ້າມະ, ນໍ້າລອງເພີ່ມສູງຂຶ້ນ, ຖ້ວມເນື້ອທີ່ທໍາການຜະລິດດເຂົ້ານາປີ, ສວນອ້ອຍ ແລະ ຊົນລະປະທານເສຍຫຼາຍແຫ່ງ. ພ້ອມນີ້ ຍັງມີເຮືອນຂອງປະຊາຊົນ ຈໍານວນ 10 ຫຼັງຄາເຮືອນທີ່ຂຶ້ນກັບບ້ານສະ, ບ້ານໂພຄໍາ ແລະ ບ້ານຄົກຫີນ ໄດ້ຖືກນໍ້າຖ້ວມ.
ຕາມການລົງເກັບກໍາຂໍ້ມູນໃນເບື້ອງຕົ້ນຂອງພາກສ່ວນທີ່ກ່ຽວຂ້ອງຂອງເມືອງເຫັນວ່າ: ປັດຈຸບັນເສັ້ນທາງເລກທີ 17B ໄດ້ຖືກນໍ້າເສາະເຈື່ອນ 5 ຈຸດ; ໃນນີ້ ຈຸດບ້ານສີວິໄລ ລົດບັນທຸກໜັກບໍ່ສາມາດແລ່ນຜ່ານໄດ້, ຊົນລະປະທານ 70 ແຫ່ງໄດ້ຮັບຄວາມເສຍຫາຍ, ເນື້ອທີ່ຜະລິດເຂົ້ານາປີ 30 ເຮັກຕາ ແລະ ສວນອ້ອຍຂອງປະຊາຊົນ 10 ເຮັກຕາ ໄດ້ຖືກນໍ້າຖ້ວມ ແລະ ເສາະເຈື່ອນ; ຕໍ່ກັບບັນຫານໍ້າຖ້ວມໃນຄັ້ງນີ້, ທາງຄະນະນໍາຂັ້ນເມືອງ ກໍໄດ້ສົ່ງ ກອງກໍາລັງປ້ອງກັນຊາດ ແລະ ພາກສ່ວນທີ່ກ່ຽວຂ້ອງຂອງເມືອງ ລົງຊ່ວຍປະຊາຊົນ ທີ່ໄດ້ຮັບຜົນກະທົບໃນຄັ້ງນີ້.
ນອກຈາກນີ້,ບໍລີສັດຈຸງຫຽວທີ່ຮັບເໝົາການກໍ່ສ້າງເຂື່ອນໄຟຟ້ານໍາລອງ 2 ກໍໄດ້ຮັບຜົນກະທົບເຊັນດຽວກັນ, ໃນນີ້ ມີໂຮງງານຄົບຫີນ 1 ຊຸດ, ລົດດາມ ຈໍານວນ 3 ຄັນ, ລົດຈົກ 2 ຄັນ, ລົດຕັກ 1 ຄັນ, ເຄື່ອງເຈາະຫີນ 6 ເຄື່ອງ, ຖັງເກັບນໍ້າມັນ 4.000 ລິດ, ພັດລົມດູດອາກາດ 4 ເຄື່ອງ, ແຄ້ມພັກຂອງພະນັກງານ ແລະ ອຸປະກອນອີກຈໍານວນໜື່ງ ໄດ້ຖືກກະແສ່ນໍ້າພັດໄຫຼ ແລະ ຖ້ວມເຂດກໍ່ສ້າງເຂື່ອນໄຟຟ້ານໍ້າລອງ 2 ລວມມູນຄ່າຄວາມເສຍຫາຍ ປະມານ 5ແສນ ໂດລາສະຫະລັດ ຫຼື ປະມານ 4,7 ຕື້ກວ່າກີບ.
ສໍາລັບເນື້ອທີ່ທໍາການຜະລິດຂອງປະຊາຊົນ ທີ່ໄດ້ຮັບຜົນກະທົບ ຍັງບໍ່ສາມາດປະເມີນມູນຄ່າເສຍຫາຍຕົວຈິງໄດ້ .
ຂ່າວ: ສົມພອນ ຂຸນດາວົງ
