ເສດຖະກິດຄອບຄົວດີຂຶ້ນ ຍ້ອນການປູກໝາກເງາະເປັນສິນຄ້າ

285

ໝາກເງາະ ເປັນໝາກໄມ້ອີກຊະນິດໜຶ່ງທີ່ມີລົດຫວານ ແລະ ມີຄຸນຄ່າສູງທາງໂພຊະນາການ ເຊິ່ງສັງຄົມນິຍົມບໍລິໂພກໝາກໄມ້ຊະນິດນີ້ເປັນອັນດັບຕົ້ນໆກໍວ່າໄດ້. ນອກນີ້, ບັນດາຕະຫຼາດຕ່າງໆໃນຂອບເຂດທົ່ວປະເທດ ກໍມີຄວາມຕ້ອງການຢ່າງກວ້າງຂວາງ ເຊິ່ງປັດຈຸບັນໝາກເງາະ ໄດ້ກາຍເປັນພືດທີ່ປະຊາຊົນລາວບັນດາເຜົ່າໃຫ້ຄວາມສົນໃຈໃນການບໍລິໂພກ ແລະ ແຂ່ງຂັນກັນປູກ ເພື່ອຜະລິດເປັນສິນຄ້າຢ່າງແຜ່ຫຼາຍ ທັງສາມາດສ້າງລາຍຮັບເຂົ້າຄອບຄົວ ແລະ ແກ້ໄຂຄວາມທຸກຍາກໄດ້ເປັນຢ່າງດີ.

ດັ່ງຄອບຄົວຂອງອ້າຍ ຊົ່ງຢ່າງ ເຊ່ຍເຢັ້ງຢ່າງ ປະຊາຊົນບ້ານຄອນວັດ ເມືອງລ້ອງຊານ ແຂວງໄຊສົມບູນ ທີ່ໄດ້ຢຶດຖືເອົາການປູກໝາກເງາະເປັນສິນຄ້າ ເຮັດໃຫ້ເສດຖະກິດຄອບຄົວໄດ້ຮັບການພັດທະນາດີຂຶ້ນຢ່າງຕໍ່ເນື່ອງ.

ອ້າຍຊົ່ງຢ່າງ ເຊ່ຍເຢັ້ງຢ່າງ ໃຫ້ຮູ້ວ່າ: ສຳລັບແຮງບັນດານໃຈທີ່ເຮັດໃຫ້ຢາກປູກໝາກເງາະເປັນສິນຄ້າ ກໍເນື່ອງຈາກວ່າໃນໄລຍະຜ່ານມາ ເມືອງລ້ອງຊານ ກໍຄືແຂວງ ໄຊສົມບູນ ຍັງບໍ່ທັນມີໝາກເງາະຂາຍເທື່ອ ແລະ ກໍມີການນຳມາຈາກທ້ອງຖິ່ນອື່ນ. ດັ່ງນັ້ນ, ຈຶ່ງໄດ້ຕັດສິນໃຈໝູນໃຊ້ເນື້ອທີ່ດິນທີ່ເປົ່າວ່າງພຽງເລັກໜ້ອຍໃຫ້ເກີດປະໂຫຍດສູງສຸດ ໂດຍນຳໃຊ້ເຂົ້າໃນການບຸກເບີກເປັນສວນໝາກເງາະ ສວນທີ 1 ໃນໄລຍະປີ 2012 ເຊິ່ງນໍາແນວພັນມາຈາກປະເທດໄທ ເບື້ອງຕົ້ນເປັນພຽງການທົດລອງເທົ່ານັ້ນ, ແຕ່ຜ່ານການດຳເນີນການປູກຕົວຈິງ ສັງເກດເຫັນວ່າໄດ້ຮັບຜົນຜະລິດດີໂດຍພື້ນຖານ, ສັງຄົມກໍໃຫ້ຄວາມຍອມຮັບເປັນຢ່າງດີ ແລະ ຕະຫຼາດກໍມີຄວາມຕ້ອງການຢ່າງກວ້າງຂວາງ, ດັ່ງນັ້ນຈຶ່ງໄດ້ສືບຕໍ່ນຳໃຊ້ເນື້ອທີ່ດິນອີກ 1 ເຮັກຕາກວ່າ ເຂົ້າໃນການບຸກເບີກເປັນສວນໝາກເງາະ ສວນທີ 2 ຢ່າງຈິງຈັງ ນັບແຕ່ໄລຍະປີ 2016 ເປັນຕົ້ນມາ ເຊິ່ງການປູກແມ່ນໃຊ້ເວລາ 3 ປີ ຈຶ່ງໄດ້ຮັບຜົນຜະລິດ, ໃນນີ້ລາຍຮັບຈາກການຂາຍຕົວຈິງແມ່ນຕົກຢູ່ໃນຈຳນວນເງິນ 50 ລ້ານກວ່າກີບຕໍ່ລະດູ ເວົ້າໄດ້ວ່າເປັນລາຍຮັບທີ່ເປັນກອບເປັນກຳ ແລະ ຫຼາຍພໍສົມຄວນ ສົມກັບເຫື່ອແຮງທີ່ໄດ້ທຸ່ມເທ ແລະ ໃຫ້ຄວາມສຳຄັນຢູ່ກັບການປູກໝາກເງາະຕະຫຼອດມາ.
ສຳລັບການຂາຍສ່ວນໃຫຍ່ແມ່ນໄດ້ນຳໄປສົ່ງຂາຍຕາມທ້ອງຕະຫຼາດຢູ່ບັນດາເມືອງຕ່າງໆໃນທົ່ວແຂວງ ແລະ ບາງຄັ້ງກໍເປີດໃຫ້ຄົນທົ່ວໄປເຂົ້າທ່ອງທ່ຽວພາຍໃນສວນແລ້ວຊື້ກັບທີ່ກິນກັບທີ່. ສ່ວນລາຄາຂາຍຖ້າຂາຍສົ່ງ ຫາກລູກຄ້າຍສັ່ງຊື້ໃນລະດັບ 500 ກິໂລຂຶ້ນໄປ ແມ່ນຂາຍຢູ່ໃນລາຄາ 10.000 ກີບຕໍ່ກິໂລກຣາມ, ໃນນີ້ຖ້າຂາຍຍ່ອຍໂດຍການສົ່ງໃຫ້ແມ່ຄ້າພາຍໃນບ້ານເທສະບານເມືອງ ແມ່ນຕົກຢູ່ໃນລາຄາ 12.000 ກີບຕໍ່ກິໂລກຣາມ ແລະ ຫາກມາສັ່ງຊື້ກັບສວນແມ່ນຂາຍຢູ່ໃນລາຄາ 13.000 ກີບຕໍ່ກິໂລກຣາມ.

["]

ນອກຈາກຢຶດຖືການປູກໝາກເງາະເປັນລາຍໄດ້ຕົ້ນຕໍແລ້ວ ຄອບຄົວ ທ່ານ ຊົ່ງຢ່າງ ເຊ່ຍເຢັ້ງຢ່າງ ຍັງໄດ້ຕັ້ງຮ້ານສ້ອມແປງເຄື່ອງໄຟຟ້າເປັນລາຍຮັບເພີ່ມຕື່ມອີກ.

ອ້າຍຊົ່ງຢ່າງ ເຊ່ຍເຢັ້ງຢ່າງ ໃຫ້ຮູ້ຕື່ມອີກວ່າ: ຜ່ານຈາກການຢຶດຖືການປູກໝາກເງາະເປັນອາຊີບຫຼັກໃນການຜະລິດເປັນສິນຄ້າ ເຮັດໃຫ້ເສດຖະກິດຄອບຄົວມີບາດກ້າວຂະຫຍາຍຕົວດີຂຶ້ນຢ່າງຕໍ່ເນື່ອງ, ຖານະການເງິນພາຍໃນຄອບຄົວມີຄວາມໝັ້ນຄົງ, ຊີວິດການເປັນຢູ່ນັບມື້ມີທ່າກ້າວພົ້ນເດັ່ນ ແລະ ຫຼຸດພົ້ນອອກຈາກ ຄວາມທຸກຍາກເທື່ອລະກ້າວ; ສຳລັບລາຍຮັບທີ່ໄດ້ຈາກການຂາຍໝາກເງາະ ນອກຈາກຈະໝູນໃຊ້ເຂົ້າໃນວຽກງານທີ່ຈຳເປັນພາຍໃນຄອບຄົວແລ້ວ ຍັງສາມາດຊຸກຍູ້ສົ່ງເສີມໃຫ້ບັນດາລູກໆໄດ້ຮັບການຮໍ່າຮຽນເພື່ອອະນາຄົດທີ່ດີນຳອີກ.

ດັ່ງນັ້ນ, ຈຶ່ງສາມາດເວົ້າໄດ້ວ່າ: ທ່ານ ຊົ່ງຢ່າງ ເຊ່ຍເຢັ້ງຢ່າງ ໄດ້ກາຍເປັນບຸກຄົນ ແລະ ຄອບຄົວແບບຢ່າງຂອງບ້ານຄອນວັດ ເມືອງລ້ອງຊານ ແຂວງໄຊສົມບູນ ໃນການປະກອບອາຊີບ ແລະ ທຳມາຫາກິນທີ່ບໍ່ຂັດກັບລະບຽບກົດໝາຍຂອງບ້ານເມືອງ. ອີກຢ່າງໜຶ່ງ, ກໍຍ້ອນເຫັນໄດ້ແນວທາງອັນຖືກຕ້ອງຂອງພັກ – ລັດຖະບານ ເຊິ່ງຍາມໃດກໍຖືເອົາການແກ້ໄຂ ຄວາມທຸກຍາກຂອງປະຊາຊົນລາວບັນດາເຜົ່າເປັນບັນຫາກົກ ແລະ ຕໍ່ເນື່ອງຢ່າງສະເໝີຕົ້ນສະເໝີປາຍຕະຫຼອດມາ ແລະ ຍ້ອນຄວາມດຸໝັ່ນ, ຊື່ສັດ, ປະຢັດ ແລະ ອົດທົນ ບວກກັບຄວາມມີຫົວຄິດປະດິດສ້າງໃນການປະກອບອາຊີບ, ກ້າຄິດ, ກ້າເຮັດ ແລະ ກ້າຕັດສິນໃຈ ຈຶ່ງເຮັດໃຫ້ເສດຖະກິດຄອບຄົວຂອງ ທ່ານ ຊົ່ງຢ່າງ ເຊ່ຍເຢັ້ງຢ່າງ ໄດ້ຮັບການຂະຫຍາຍຕົວເປັນກ້າວໆ ແລະ ມີຊີວິດການເປັນຢູ່ທີ່ດີຂຶ້ນ.