ນ້ຳຝົນແຮງເກີນ ນ້ຳຖ້ວມຫຼາຍບ້ານໃນແຂວງຫຼວງນ້ຳທາ

335

ດັ່ງທີ່ກົມອຸຕິນິຍົມໄດ້ແຈ້ງເຕືອນປະຊາຊົນແລ້ວກ່ອນໜ້ານີ້ ຈະມີຝົນຕົກໜັກ ເນື່ອງຈາກພາຍຸເຈີມປາກ່າພັດມາແຕ່ທະເລຈີນໃຕ້ ຈະກະທົບຫຼາຍແຂວງທົ່ວປະເທດ ໂດຍສະເພາະບັນດາແຂວງທາງພາກເໜືອ ໃນລະຫວ່າງວັນທີ 19-20 ກໍລະກົດ ຕາມລາຍງານເຊົ້າມື້ນີ້ ແຂວງຫຼວງນ້ຳທາຫຼາຍບ້ານແມ່ນໄດ້ຮັບຜົນກະທົບໜັກ.

ຕາມຂ່າວໃຫ້ຮູ້ວ່າ: ເນື່ອງຈາກໃນ 2-3 ມື້ຜ່ານມານີ້ເກີດມີຝົນຕົກໜັກຕິດຕໍ່ກັນ ຈຶ່ງເກີດມີນ້ຳປ່າໄຫຼຢ່າງຮຸນແຮງ ລະດັບນ້ຳແມ່ນ້ຳຫຼາຍສາຍກໍ່ເພີ່ມຂຶ້ນຢ່າງຕໍ່ເນື່ອງຈົນເຮັດໃຫ້ເກີດມີໄພນ້ຳຖ້ວມຫຼາຍບ້ານໃນແຂວງຫຼວງນ້ຳທາ ຈາກການວັດລະດັບນ້ຳໃນວັນທີ 21 ກໍລະກົດ ປີ2021 ເວລາ 08:30 ໂມງ ຢູ່ ແຂວງຫຼວງນ້ຳທາ ແມ່ນຂຶ້ນສູງຫຼາຍ  ຖ້າທຽບໃສ່ 2-3 ວັນຜ່ານມາ ເປັນຕົ້ນແມ່ນ ແມ່ນ້ຳທາ ທີ່ວັດແທກໄດ້ແມ່ນສູງເຖິງ 7,92 ແມັດ ເຊິ່ງຖືວ່າເປັນໂຕເລກທີ່ສູງເຖິງຂັ້ນອັນຕະລາຍ.

/>

["]

ກະແສນ້ຳປ່າໄດ້ໄຫຼໄປໂຮມຕາມພື້ນທີ່ຕ່ຳ ແລະ ລົ້ນຝັ່ງອອກຖ້ວມບ້ານເຮືອນປະຊາຊົນ, ໄຮ່ນາ, ໜອງປາ, ຮົ້ວສວນ ຕອນນີ້ຍັງບໍ່ສາມາດປະເມີນມູນຄ່າໄດ້ ຂ່າວລາຍງານຮູ້ພຽງວ່າຈຳນວນບ້ານທີ່ໄດ້ຮັບຜົນກະທົບປະກອບມີ: ເຂດບ້ານໃໝ່, ບ້ານຂອນ, ບ້ານຫຼວງ, ບ້ານວຽງໃຕ້, ບ້ານປ່າສັກ, ດອນຄູນ, ທ່າອໍ້, ນໍ້າແງ້ນ, ນາລື ແລະ ບ້ານໃໝ່ແລະ ບ້ານອື່ນໆທີ່ຢູ່ໃກ້ກັບແມ່ນ້ຳທາ.

ປັດຈຸບັນລະດັບນ້ຳກໍ່ຍັງຄົງເພີ່ມຂຶ້ນຢ່າງຕໍ່ເນື່ອງ ແລະ ໃນເວລາ 10:00 ໂມງ ຂອງວັນດຽວກັນລະດັບນ້ຳທາແມ່ນເພີ່ມຂຶ້ນເປັນ 8,20 ແມັດ ແລະ ຍັງມີຝົນຕົກກະຈາຍໄປທົ່ວ ໃນທົ່ວແຂວງຢ່າງບໍ່ຂາດສາຍ ແນວໃດກໍ່ຕາມເພື່ອປ້ອງກັນບໍ່ໃຫ້ເກີດຄວາມເສຍຫາຍຕໍ່ຊີວິດ ແລະຊັບສິນຂອງປະຊາຊົນ ໃນຕອນເຊົ້າຂອງວັນທີ 21 ກໍລະກົດນີ້ ກອງບັນຊາການທະຫານແຂວງຫຼວງນໍ້າທາ ໄດ້ນໍາເອົາກໍາລັງອ້າຍນ້ອງກອງຮ້ອຍ 28, ກອງຮ້ອຍ 25 ແລະ ນັກຮຽນນາຍສີບ ຈໍານວນ 150 ກວ່າສະຫາຍ ເຂົ້າຂົນເຄື່ອງຊ່ວຍເຫລືອພໍ່ແມ່ປະຊາຊົນທີໄດ້ຮັບຜົນກະທົບຈາກໄພພິບັດນໍ້າຖ້ວມໃນຄັ້ງນີ້ ເຊີ່ງນໍາພາໂດຍ ສະຫາຍ ພັນໂທ ບຸນຄໍາ ຈັນວິວັນຕໍ ຮອງຫົວໜ້າຫ້ອງເສນາທິການທະຫານແຂວງຫຼວງນໍ້າທາ. ສ່ວນຜົນເສຍຫາຍໃນຄັ້ງນີ້ ຍັງບໍ່ສາມາດປະເມີນມຸນຄ່າໄດ້.