ຂອງຫວານ ເປັນອາຫານທີ່ຈະຢຽວຢາຈິດໃຈຂອງໃຜຫຼາຍຄົນໃນເວລາທີ່ຄຽດ ຫຼື ມີບັນຫາຫຍັງຕ່າງໆ ພໍໄດ້ກິນຂອງຫວານກໍຈະເຮັດໃຫ້ຮູ້ສຶກດີຂຶ້ນມາທັນທີ ແຕ່ຜູ້ຂຽນແນະນຳໃຫ້ກິນຢ່າງພໍເໝາະພໍດີ ບໍ່ຄວນກິນຫຼາຍເກີນໄປເດີ.
ແນ່ນອນຜູ້ຂຽນເວົ້າເຖິງເລື່ອງຂອງຫວານກໍຕ້ອງມີສູດເຂົ້າໜົມຫວານຢ່າງ ເຄັກໃບເຕີຍໜ້ານິ້ມມາຕ້ອນແຟນຂ່າວທຸກທ່ານ ສູດນີ້ພິເສດກໍຄືເພີ່ມໄສ້ເຂົ້າໄປໃນເຄັກບອກເລີຍວ່າຟິນຕັ້ງແຕ່ຄຳທຳອິດຈົນຄຳສຸດທ້າຍກັນເລີຍ ພ້ອມແລ້ວເຮົາໄປເບິ່ງວິທີການເຮັດພ້ອມໆກັນເລີຍ:
ສ່ວນປະສົມ ໄຂ່ແດງ: ໄຂ່ແດງ ( ເບີ 2 ) 3 ໜ່ວຍ, ນ້ຳຕານ 40 ກຣາມ, ເກືອ 1/4 ບ່ວງຊາ, ກິ່ນວານິລາ 1 ບ່ວງຊາ, ນ້ຳໃບເຕຍ 40 ມິນລີລິດ, ນ້ຳມັນດອກຕາເວັນ 40 ກຣາມ, ແປ້ງເຄັກ 100 ກຣາມ, ຜົງຟູ 1 ບ່ວງຊາ, ນົມສົດລົດຈືດ 40 ມິນລີລິດ.
ສ່ວນປະສົມ ໄຂ່ຂາວ: ໄຂ່ຂາວ 3 ໜ່ວຍ, ນ້ຳໝາກນາວ 1 ບ່ວງຊາ, ນ້ຳຕານ 70 ກຣາມ.
ສ່ວນປະສົມ: ຜົງວຸ້ນ 1 + 1/2 ບ່ວງຊາ, ນ້ຳສະອາດ 3 ບ່ວງແກງ, ກະທິ 250 ມິນລີລິດ, ນ້ຳສະອາດ 250 ມິນລີລິດ, ນ້ຳຕານ 120 ກຣາມ, ເກືອ 1/4 ບ່ວງຊາ, ນ້ຳໃບເຕີຍ 150 ມິນລີລິດ, ແປ້ງສາລີ 40 ກຣາມ, ນ້ຳສະອາດ 100 ມິນລີລິດ.
ວິທີເຮັດເຄັກໃບເຕີຍໜ້ານິ້ມ
ເຮັດສ່ວນປະສົມໄຂ່ແດງໂດຍເທໄຂ່ແດງ ແລະ ນ້ຳຕານໃສ່ລົງໃນພາຊະນະປະສົມ ຕີໃຫ້ເຂົ້າກັນ, ໃສ່ເກືອ ແລະ ກິ່ນວານິລາຄົນໃຫ້ເຂົ້າກັນ.
ໃສ່ນ້ຳໃບເຕີຍ ແລະ ນ້ຳມັນດອກຕາເວັນ ຄົນປະສົມໃຫ້ເຂົ້າກັນ ໃສ່ຜົງຟູລົງໃນແປ້ງປະສົມໃຫ້ເຂົ້າກັນ ຮ່ອນແປ້ງລົງຊາມປະສົມແລ້ວຄົນຄ່ອຍໆໃຫ້ເຂົ້າກັນ ແລ້ວປະໄວ້.
ເຮັດສ່ວນປະສົມໄຂ່ຂາວໂດຍນຳໄຂ່ຂາວ ແລະ ນ້ຳໝາກນາວໃສ່ລົງໂຖຕີ ຕີດ້ວຍຄວາມໄວຕ່ຳ ຄ່ອຍໆໃສ່ນ້ຳຕານຈົນກວ່າຈະໝົດແລ້ວຕີຕໍ່ຈົນຕັ້ງຍອດດີ ຕັກໄຂ່ຂາວ 1 ສ່ວນລົງໄປໃນຊາມປະສົມຂອງໄຂ່ແດງ ແລ້ວຄ່ອຍໆຄົນໃຫ້ເຂົ້າກັນ, ຫຼັງຈາກນັ້ນເທກັບລົງໄປໃນຊາມໄຂ່ຂາວທີ່ເຫຼືອແລ້ວຄົນໃຫ້ເປັນເນື້ອດຽວກັນ.
ຫຼັງຈາກນັ້ນນຳເອົາແປ້ງທີ່ປະສົມແລ້ວເທລົງໃສ່ຖາດສີ່ຫຼ່ຽມຂະໜາດ 7 x 7 ແລ້ວນຳເອົາໄປເຂົ້າເຕົາອົບທີ່ອຸນຫະພູມ 160 ອົງສາ ໃຊ້ໄຟເທິງ – ລຸ່ມ ປະມານ 40 ນາທີ ຫຼື ຈົນກວ່າຈະສຸກ ເມື່ອສຸກແລ້ວນຳອອກຈາກຖາດແກະເຈ້ຍໄຂອອກແລ້ວປະໄວ້ໃຫ້ເຢັນ ຈາກນັ້ນແບ່ງເປັນ 2 ຫຼື 3 ຊັ້ນ.
ຕໍ່ມາເຮັດຊັອດໃບເຕີຍໜ້ານິ້ມ ໂດຍໃສ່ຜົງວຸ້ນ ແລະ ນ້ຳສະອາດ ຄົນໃຫ້ເຂົ້າກັນ ປະໄວ້ 15 ນາທີ ຫຼື ຈົນກວ່າວຸ້ນເຊັດໂຕ ແລ້ວເອົາກະທິ, ນ້ຳ 250 ມິນລີລິດ, ນ້ຳຕານ ແລະ ເກືອໃສ່ລົງໃນໝໍ້ ຄົນໃຫ້ເຂົ້າກັນດີແລ້ວໃສ່ວຸ້ນທີ່ເຊັດໂຕລົງໄປ.
ນຳເອົາໄປຂຶ້ນເຕົາຈົນຟົດ ແລະ ວຸ້ນລະລາຍດີ ຫຼັງຈາກນັ້ນຄ່ອຍໃສ່ແປ້ງສາລີ ( ແປ້ງສາລີປະສົມນ້ຳ 100 ມິນລີລິດ ) ລະຫວ່າງທີ່ໃສ່ແປ້ງໃຫ້ຄົນຕະຫຼອດ ຈົນສ່ວນປະສົມຂຸ້ນໜຽວ ປິດໄຟ.
ເອົາຊັອດມາກອງເພື່ອໃຫ້ຊັອດນຽນ, ຈາກນັ້ນຕັກໃສ່ຖາດຄຶງໃຫ້ທົ່ວຖາດແລ້ວເອົາເຄັກລົງໄປໃນຖາດ ຈາກນັ້ນຕັກຊັອດລາດເທິງເຄັກ ແລະ ຂອບຖາດໃຫ້ທົ່ວ ເຮັດຈົນກວ່າຄົບຊັ້ນເຄັກ ແລ້ວເອົາຊັອດລາດອັດຖ້ານໃຫ້ທົ່ວ ແລະ ໜາກວ່າຊັ້ນກ່ອນໆ ຈາກນັ້ນເອົາໄປແຊ່ເຢັນ 1 ຄືນ.
ເມື່ອຄົບ 1 ຄືນແລ້ວ ນຳເອົາເຄັກອອກມາຈາກຖາດ ຂັ້ນຕອນນີ້ຕ້ອງໃຊ້ມີກ ຫຼື ໄມ້ພາຍ ຄ່ອຍໆແຊະຂອບຖາດເພື່ອໃຫ້ເຄັກຫຼຸດອອກມາໄດ້ງ່າຍ ແລະ ງາມ ( ຕ້ອງຄ່ອຍໆເພື່ອບໍ່ໃຫ້ເຄັກເລະ ) ນີ້ກໍຖືວ່າແລ້ວຮຽບຮ້ອຍ ພ້ອມຕັກເສີມກິນຄູ່ກັບກາເຟຮ້ອນໆ, ໂກໂກ້ຮ້ອນໆ ຫຼື ນ້ຳຊາຍາມບ່າຍ.
ທີ່ມາ: https://cooking.kapook.com/view243626.html?fbclid=
