ສະມາຊິກໂຄງການຜະລິດກະສິກໍາເປັນສິນຄ້າຢູ່ເມືອງທຸລະຄົມແຂວງວຽງຈັນໄດ້ຮັບລົດໄຖ່ນາ

350

ພິທີມອບ-ຮັບລົດໄຖ່ນາໃຫ້ສະມາຊິກໂຄງການຜະລິດກະສິກໍາເປັນສິນຄ້າຢູ່ເມືອງທຸລະຄົມໄດ້ຈັດຂຶ້ນໃນວັນທີ 9 ກໍລະກົດ 2021 ທີ່ໂຮງຮຽນມັດທະຍົມຕອນຕົ້ນບ້ານໂພນຄໍາ ເມືອງທຸລະຄົມ ແຂວງວຽງຈັນ, ໃຫ້ກຽດເຂົ້າຮ່ວມມີ ທ່ານ ນາງ ຈັນທະບູນ ໂພສາລາດ ຄະນະປະຈໍາພັກແຂວງ, ຫົວໜ້າຄະນະຈັດຕັ້ງແຂວງວຽງຈັນ, ທ່ານ ພູວົງ ບຸນຊູ ຮອງເຈົ້າແຂວງວຽງຈັນ, ມີເຈົ້າເມືອງທຸລະຄົມ, ພະແນກການກ່ຽວຂ້ອງຂັ້ນແຂວງ, ຄະນະຮັບຜິດຊອບໂຄງການ, ຄະນະນໍາຂອງເມືອງທຸລະຄົມ, ບັນດາສະມາຊິກກຸ່ມການຜະລິດ ແລະ ການຈັດຕັ້ງກ່ຽວຂ້ອງທຸກຂັ້ນເຂົ້າຮ່ວມ.


ພາຍຫລັງໂຄງການໄດ້ເລີ່ມຈັດຕັ້ງປະຕິບັດແຕ່ທ້າຍປີ 2018 ເປັນຕົ້ນມາ ຄະນະຊີ້ນໍາແຕ່ລະຂັ້ນ ແລະ ຄະນະຮັບຜິດຊອບໂຄງການ ໄດ້ເປັນເຈົ້າການເຄື່ອນໄຫວວຽກງານຢ່າງມີຄວາມຮັບຜິດຊອບສູງ, ມີການຈັດກອງປະຊຸມຄົ້ນຄວ້າວາງແຜນ, ຈັດຝຶກອົບຮົມດ້ານວິຊາການ, ກໍານົດຂັ້ນຕອນ, ວິທີດໍາເນີນໂຄງການຢ່າງເປັນລະບົບ, ສາມາດສ້າງຕັ້ງກຸ່ມການຜະລິດໄດ້ເຖິງ 50 ກຸ່ມ ໃນຈໍານວນ 25 ບ້ານ, ຈັດເປັນ 4 ປະເພດ ຄື: ກຸ່ມຜະລິດແນວພັນເຂົ້າ, ກຸ່ມຜະລິດເຂົ້າເປັນສິນຄ້າ, ກຸ່ມປູກຜັກສະອາດ ແລະ ກຸ່ມໂຮງສີເຂົ້າ.ລົດໄຖ່ນາທີ່ນໍາມາມອບເທື່ອນີ້ເປັນລົດຍີ່ຫໍ້ຄູໂບຕ້າ L5018, ລວມທັງໝົດ 27 ຄັນ, ມູນຄ່າຄັນລະ 253.000.000 ກີບ ຮູບແບບຈ່າຍຜ່ອນ ໄລຍະເວລາ 4 ປີ ເທົ່າກັບ 8 ງວດ ໂດຍເຊັນສັນຍາຊື້ກັບບໍລິສັດອິນຊີທອງການຄ້າ, ລວມມູນຄ່າຈັດຊື້ທັງໝົດ 27 ຄັນ, ເທົ່າກັບ 6 ຕື້ກວ່າກີບ ເປັນລົດທີ່ໄດ້ມາດຖານເຕັກນິກ, ມີຄວາມທົນທານ ເຊິ່ງຈະກາຍເປັນຊັບສົມບັດທີ່ລໍ້າຄ່າຂອງຊາວເມືອງ, ໂດຍສະເພາະແມ່ນຊາວກະສິກອນ ແລະ ຊາວສວນ ເພື່ອຫລຸດຜ່ອນການໃຊ້ແຮງງານຄົນ, ສ້າງສິ່ງອໍານວຍຄວາມສະດວກເຂົ້າໃນການຜະລິດໃນຮູບແບບນໍາໃຊ້ກົນຈັກຈາກໂຮງງານອຸດສາຫະກໍາທັນສະໄໝເຂົ້າຊ່ວຍ.


ທ່ານ ພູວົງ ບຸນຊູ ຮອງເຈົ້າແຂວງ ແຂວງວຽງຈັນ ໄດ້ຕາງໜ້າໃຫ້ການນໍາຂອງແຂວງວຽງຈັນ ມີຄໍາເຫັນໂອ້ລົມຕໍ່ພິທີ ເຊິ່ງ ທ່ານ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບໂຄງການ ທີ່ໄດ້ພ້ອມພຽງກັນເອົາໃຈໃສ່ຊີ້ນໍາ-ນໍາພາ ຈັດຕັ້ງປະຕິບັດວຽກງານຈົນສາມາດດໍາເນີນການຕາມຂັ້ນຕອນຕ່າງໆທີ່ວາງໄວ້ຢ່າງຖືກທິດ ແລະ ຖືກເປົ້າໝາຍ, ເຮັດໃຫ້ໂຄງການມີຜົນງານເປັນຮູບປະທໍາດີນັບມື້ດີຂຶ້ນ, ພ້ອມກັນນັ້ນທ່ານຍັງໄດ້ຍົກໃຫ້ເຫັນເຖິງຄວາມເປັນຫ່ວງເປັນໃຍຂອງການນໍາພັກ-ລັດ ຂັ້ນເທິງ, ໂດຍສະເພາະແມ່ນການນໍາຂອງແຂວງວຽງຈັນ ທີ່ໄດ້ຫລິ່ງເຫັນທ່າແຮງບົ່ມຊ້ອນທາງດ້ານວຽກງານກະສິກໍາຂອງເມືອງທຸລະຄົມ ຈຶ່ງໄດ້ເອກະພາບກັບອົງການປົກຄອງເມືອງ ຍາດແຍ່ງໃຫ້ໂຄງການນໍາມາຈັດຕັ້ງປະຕິບັດຄືທຸກວັນນີ້, ຕໍ່ກັບຄວາມຄືບໜ້າ ແລະ ບັນຫາຫຍຸ້ງຍາກການດໍາເນີນໂຄງການ ຄະນະຊີ້ນໍາໂຄງການແຕ່ລະຂັ້ນ ກໍ່ຮັບຮູ້ ແລະ ໄດ້ມີກົນໄກຊີ້ນໍາປັບໃຫ້ເຂົ້າກັບສະພາບຈຸດພິເສດຂອງເມືອງ, ຂອງປະຊາຊົນບັນດາເຜົ່າ ໂດຍສະເພາະແມ່ນໃຫ້ລົງເລິກໃກ້ສິດຕິດແທດ, ແນະນໍາທາງດ້ານເຕັກນິກວິຊາການ ກໍ່ຄືກົດລະບຽບທີ່ວາງອອກ ຈຶ່ງສາມາດເຮັດໃຫ້ສະມາຊິກກຸ່ມຜະລິດຮັບຮູ້ເຂົ້າໃຈລະອຽດ ແລະ ມີສ່ວນຮ່ວມກັບໂຄງການຢ່າງແຂງແຮງ.


ໂອກາດດຽວກັນ ທ່ານ ຍັງໄດ້ຮຽກຮ້ອງມາຍັງການນໍາຂອງເມືອງ ກໍ່ຄືຄະນະຮັບຜິດຊອບໂຄງການ ໃຫ້ລົງເລິກຊີ້ນໍາການຄຸ້ມຄອງບໍາລຸງຮັກສາພາຫະນະກົນຈັກທີ່ໄດ້ມອບໃຫ້ສະມາຊິກໃນຄັ້ງນີ້ ເພື່ອແນໃສ່ເຮັດໃຫ້ສະມັດຕະພາບການໃຊ້ງານຂອງລົດມີອາຍຸການຍາວນານ-ຄົງທົນ, ສໍາລັບຄະນະຮັບຜິດຊອບຄຸ້ມຄອງນໍາໃຊ້ລົດທີ່ຖືກແຕ່ງຕັ້ງຂຶ້ນແລ້ວ ກໍ່ຕ້ອງເປັນຕົວແທນ, ເປັນຫລັກແຫລ່ງຄຸ້ມມຄອງຮັກສາລົດບໍ່ໃຫ້ຕົກເຮ່ຍເສຍຫາຍ ແລະ ຕ້ອງໝັ່ນກວດກາສ້ອມແປງ ເພື່ອເປົ້າໝາຍການນໍາໃຊ້ລົດໃຫ້ເກີດຜົນປະໂຫຍດສູງສູດຕໍ່ໂຄງການ.

["]

ພາບ-ຂ່າວ: ຫ້ອງການ ຖວທ ເມືອງທຸລະຄົມ.