ແຮຣີ ເຄນ ກອງໜ້າທີມຊາດອັງກິດ ສ້າງສະຖິຕິິໃໝ່່ໃຫ້ກັບ ທີມຊາດອັງກິດ ດ້ວຍການເປັນນັກເຕະທີ່ຍິງປະຕູໃນລາຍການໃຫຍ່ຫຼາຍທີ່ສຸດເທົ່າກັນ ແກຣີ ລິນິເກີ ດ້ວຍຈໍານວນ 10 ປະຕູ ຫຼັງຫຼ້າສຸຸດຍິງປະຕູໄຊຊ່ວຍໃຫ້ ທີມຊາດອັງກິດ ບຽດເອົາຊະນະ ດານມາກ 2-1 ໃນການຕໍ່ເວລາພິເສດຮອບຮອງຊະນະເລີດບານເຕະ ຢູໂຣ 2020 ເມື່ອວັນທີ 7 ກໍລະກົດ ທີ່ຜ່ານມາ.
ກ່ອນໜ້ານີ້ ເຄນ ຍິງປະຕູໃຫ້ກັບ ທີມຊາດອັງກິດ ໃນບານເຕະ ຢູໂຣ 3 ປະຕູ ເຮັດໃຫ້ລາວຍິງປະຕູໃນລາຍການໃຫຍ່ໆໄດ້ 9 ປະຕູຈາກ 15 ນັດເທົ່າກັບ ອະລັນ ເຊຍເຣີ ອະດີດກອງໜ້າທີມຊາດອັງກິດ ແລະ ຫຼ້າສຸດຍິງປະຕູໄຊຈາກຈຸດໂທດຊ່ວຍໃຫ້ກັບ ອັງກິດ ເອົາຊະນະ ດານມາກ 2-1 ໃນໄລຍະຕໍ່ເວລາພິເສດຂອງ ຢູໂຣ 2020 ຮອບຮອງຊະນະເລີດ.
ເຮັດໃຫ້ ເຄນ ຍິງປະຕູໃຫ້ກັບທີມຊາດອັງກິດ ໃນລາຍການໃຫຍ່ໆປະກອບດ້ວຍ ບານໂລກ ແລະ ຢູໂຣ ໄປແລ້ວ 10 ປະຕູທຽບເທົ່າກັບສະຖິຕິຂອງ ແກຣີ ລິນິເກີ ອະດີດນັກເຕະຂອງ ທ໊ອດແນມ ຮ໊ອດ ສະເປີ. ນອກນັ້ນ, ຖ້າຫາກວ່າ ເຄນ ສາມາດຍິງປະຕູໃນນັດຊີງຊະນະເລີດທີ່ຈະພົບກັບ ອິຕາລີ ໃນວັນທີ 11 ກໍລະກົດ 2021 ( ກົງກັບເວລາ 2:00 ໂມງຂອງວັນທີ 12 ກໍລະກົດ ເວລາໃນບ້ານເຮົາ ) ກໍຈະເຮັດໃຫ້ ເຄນ ທໍາລາຍສະຖິຕິການຍິງປະຕູໃນລາຍການໃຫຍ່ໆໃຫ້ກັບທີມຊາດອັງກິດ ສູງສຸດ ພ້ອມທັງມີລຸ້ນດາວຍິງສູງສຸດຢູໂຣ ອີກດ້ວຍ.
ສໍາລັບ ຕໍາແໜ່ງຜູ້ນໍາ ແລະ ນັກເຕະທີ່ຍັງມີໂອກາດລຸ້ນດາວຍິງສູງສຸດໃນ ຢູໂຣ 2020 ຫຼາຍທີ່ສຸດມີດັ່ງນີ້:
1.ພາທຣິກ ຊິກ ຈາກສາທາລະນະລັດເຊັກ ຍິງໄດ້ 5 ປະຕູ
2.ຄຣິສເຕຍໂນ ໂຣນັລໂດ ຈາກປ໊ອກຕຸຍການ ຍິງໄດ້ 5 ປະຕູ
3.ແຮຣີ ເຄນ ຈາກອັງກິດ ຍິງໄດ້ 4 ປະຕູ
4.ຣາຮີມ ສະເຕີລິງ ຈາກອັງກິດ ຍິງໄປ 3 ປະຕູ
ນອກນັ້ນ, ກໍຍັງມີ ເຟເດີຣິໂກ ເຄຍຊາ, ຊິໂຣ ອິມໂມບິເລ, ລໍເຣນໂຊ ອິນຊິເຢ, ມານູເອລ ໂລເຄເຕລລີ ແລະ ແມັດແທວ ປາສຊິນາ 5 ນັກເຕະຈາກທີມຊາດອິີຕາລີ ທີ່ຍິງໄດ້ 2 ປະຕູເທົ່າກັນທີ່ຍັງມີໂອກາດລົງແຂ່ງຂັນນັດສຸດທ້າຍກໍຄືນັດຊີງຊະນະເລີດກັບ ອັງກິດ.
ຮູບຈາກ: AP
