ການແຂ່ງຂັນບານເຕະ ຢູໂຣ 2020 ຮອບຮອງຊະນະເລີດຄູ່ທໍາອິດທີ່ທີມຊາດອິຕາລີ ດວນຈຸດໂທດດັບຝັນ ທີມຊາດແອັດສະປາຍ 4-2 ຫຼັງສະເໝີກັນໃນເວລາປົກກະຕິ 1-1 ເຊິ່ງດໍາເນີນໄປຢ່າງສຸດມັນ ແລະ ສົມກັບທີມລະດັບທ໊ອບຂອງໂລກ ເຊິ່ງມີການແກ້ເກມໃຫ້ເຫັນກັນຕະຫຼອດທັງເກມ ແລະ ເປັນ ອິຕາລີ ທີ່ສາມາດແກ້ທາງຂອງ ແອັດສະປາຍ ທີ່ຄຸມເກມໄດ້ເໜືອກວ່າ ຈົນໄປຕັດສິນກັນດ້ວຍການດວນຈຸດໂທດ.
ນັດດັ່ງກ່າວມ່ວນກັນຕັ້ງແຕ່ເລີ່ມເກມ ເຊິ່ງເປັນທີມຊາດແອັດສະປາຍ ທີ່ຄອງເກມໄດ້ເໜືອກວ່າ ແລະ ໄລ່ບີບ ອິຕາລີ ຈົນບໍ່ສາມາດຂຶ້ນເກມໄດ້ເລີຍ ຈົນມີຈັງຫວະຜິດພາດຫຼາຍຄັ້ງ, ແຕ່ ແອັດສະປາຍ ຍັງບໍ່ຄົມພໍຈົບເຄິ່ງເວລາທໍາອິດສະເໝີກັນ 0-0, ສ່ວນເຄິ່ງເວລາທີ 2 ໂຣແບໂຕ ມັນຊິນີ ຜູ້ຈັດການທີມຂອງ ອິຕາລີ ແກ້ທາງຂອງ ແອັດສະປາຍ ໄດ້ກ່ອນສາມາດຄືນສູ່ເກມ ແລະ ໄດ້ປະຕູຂຶ້ນນໍາ 1-0 ຈາກການຍິງສຸດງາມຂອງ ເຟເດີຣິໂກ ເຄຍຊາ ນາທີໆ 60.
ຫຼັງຈາກນັ້ນ ອິຕາລີ ປັບເກມ ແລະ ເນັ້ນການຕັ້ງຮັບສວນກັບຈົນເຮັດໃຫ້ ແອັດສະປາຍ ຂຶ້ນເກມລໍາບາກພໍສົມຄວນ.
ຫຼັງຈາກເສຍປະຕູ ຫຼຸຍ ເອັນຣິເກ ຜູ້ຈັດການທີມຂອງແອັດສະປາຍ ປ່ຽນຜູ້ຫຼິ້ນສໍາຮອງທັນທີ ໂດຍສົ່ງ ອັນວາໂຣ ໂມຣາຕ້າ ກອງໜ້າຕົວເປົ້າລົງໄປແທນ ເຟີຣານ ຕໍເຣສ ໃຊ້ເວລາໄລຍະໜຶ່ງກ່ອນຈະສາມາດສ້າງໂອກາດໃຫ້ກັບທີມໄດ້ ແລະ ນາທີໆ 80 ໂມຣາຕ້າ ກາຍເປັນຣີໂຣຍິງປະຕູຕີສະເໝີ 1-1 ໃຫ້ກັບ ແອັດສະປາຍ ດ້ວຍການດຸດດ່ຽວເຂົ້າໄປຍິງຈໍ່ໆ, ສ່ວນໄລຍະເວລາທີ່ເຫຼືອສະເໝີກັນ 1-1, ເຊັ່ນດຽວກັນການຕໍ່ເວລາພິເສດກໍຍັງສະເໝີກັນ 1-1.
ສໍາລັບ ສະຖິຕິຫຼັງເກມປາກົດວ່າອິຕາລີ ໄດ້ໂອກາດຍິງ 6 ຄັ້ງ ( ຍິງເຂົ້າເປົ້າ 4 ເປັນປະຕູ 1 ), ຄອງບານໄດ້ພຽງ 35% ແລະ ເຕະມູມພຽງ 1 ຄັ້ງ, ສ່ວນ ແອັດສະປາຍ ໄດ້ໂອກາດຍິງ 12 ຄັ້ງ ( ຍິງເຂົ້າເປົ້າ 5 ເປັນປະຕູ 1 ), ຄອງເກມໄດ້ເຖິງ 65% ແລະ ເຕະມູມ 6 ຄັ້ງ. ສະຕິເຫັນວ່າ ອິຕາລີ ມີຄວາມເດັດຂາດກວ່າ, ສ່ວນ ແອັດສະປາຍ ຍັງເປັນບັນຫາເກົ່າໃນການຈົບປະຕູ ເພາະໃນຮອບນ໊ອກເອົ້າ ( ຮອບ 16 ທີມ, ຮອບ 8 ທີມ ແລະ ຮອບ 4 ທີມ ) ບໍ່ສາມາດເອົາຊະນະຄູ່ແຂ່ງໃນໄລຍະປົກກະຕິ 90 ນາທີໄດ້ແມ່ນແຕ່ນັດດຽວຄື ຊະນະ ໂຄຣອາຊີ 5-3 ໃນການຕໍ່ເວລາພິເສດ, ຊະນະ ສະວິດ ໃນການດວນຈຸດໂທດ ແລະ ເສຍໃຫ້ ອິຕາລີ ໃນການດວນຈຸດໂທດ ທັງເປັນທີ່ທີມທີ່ມີສະຖິຕິການຄອງເກມ ແລະ ສ້າງໂອກາດຍິງສູງສຸດໃນຢູໂຣ 2020.
ສ່ວນການດ່ວນຈຸດໂທດປາກົດວ່າ ຄົນທໍາອິດຂອງທັງສອງທີມແມ່ນຍິງບໍ່ເຂົ້າທັງໝົດ; ຄົນທີ 2 ແລະ ທີ 3 ຂອງທັງສອງທີມແມ່ນຍິງເຂົ້າທັງໝົດ. ຂະນະທີ່ ຄົນທີ 4 ຂອງອິຕາລີ ຍິງເຂົ້າ, ສ່ວນຄົນທີ 4 ຂອງ ແອັດສະປາຍ ຍິງພາດເຊິ່ງບໍ່ແມ່ນຄົນອື່ນໄກນັ້ນແມ່ນ ໂມຣາຕາ ຜູ້ຍິງປະຕູສໍາຄັນຕໍ່ຊີວິດໃຫ້ກັບທີມ ກ່ອນທີ່ ຈໍຈິນໂຢ ກອງກາງຕົວເກັ່ງຂອງ ອິຕາລີ ຈະຍິງເຂົ້າໄປເປັນຄົນສຸດທ້າຍເຮັດໃຫ້ ອິຕາລີ ເອົາຊະນະ ແອັດສະປາຍ 4-2.
ການແຂ່ງຂັນບານເຕະ ຢູໂຣ 2020 ຈະບໍ່ມີການຊີງອັນດັບ 3 ເຊິ່ງ ທີມຊາດອິຕາລີ ເຂົ້າຮອບຊີງຊະນະເລີດເປັນທີມທໍາອິດໄປລໍຖ້າພົບທີມຊະນະລະຫວ່າງ ທີມຊາດອັງກິດ ຫຼື ດານມາກ ໂດຍຮອບຊີງຊະນະເລີດຈະແຂ່ງຂັນທີ່ສະໜາມເວມບຣີ ນະຄອນຫຼວງລອນດອນ ປະເທດອັງກິດ ໃນວັນທີ 11 ກໍລະກົດ 2021 ( ກົງກັບເວລາ 2:00 ໂມງຂອງວັນທີ 12 ກໍລະກົດ 2021 ເວລາໃນບ້ານເຮົາ ).