ລັດຖະມົນຕີການເງິນອາເມຣິກາ ເຜີຍ 130 ປະເທດ ເຫັນດີກຳນົດອັດຕາພາສີຂັ້ນຕ່ຳລະດັບໂລກ

154

ສຳນັກຂ່າວຕ່າງປະເທດລາຍງານວ່າ ທ່ານ ນາງ ເຈເນັດ ເຢວເລັນ ລັດຖະມົນຕີກະຊວງການເງິນສະຫະລັດອາເມຣິກາ ເປີດເຜີຍໃນວັນທີ 1 ກໍລະກົດ 2021 ວ່າ: ຂະນະນີ້ ມີ 130 ປະເທດທີ່ເຫັນດີກັບການກຳນົດອັດຕາພາສີຂັ້ນຕ່ຳລະດັບໂລກ ( Global Minimum Tax ) ຫຼື GMT ຕໍ່ບໍລິສັດຂະໜາດໃຫຍ່.

ລັດຖະມົນຕີການເງິນອາເມຣິກາ ກ່າວວ່າ: ເປັນເວລາຫຼາຍປີທີ່ອາເມຣິກາເຂົ້າຮ່ວມການແຂ່ງຂັນດ້ານພາສີລະຫວ່າງປະເທດ ໂດຍໄດ້ປັບຫຼຸດອັດຕາພາສີລາຍໄດ້ນິຕິບຸກຄົນ, ຂະນະດຽວກັນປະເທດອື່ນໆກໍປັບຫຼຸດລົງເຊັ່ນດຽວກັນ ເຮັດໃຫ້ທຸກປະເທດຕ່າງກໍແຂ່ງຂັນກັນປັບຫຼຸດອັດຕາພາສີລົງໃຫ້ຫຼາຍທີ່ສຸດ ແລະ ໄວທີ່ສຸດ ແຕ່ທ້າຍທີ່ສຸດກໍບໍ່ມີປະເທດໃດໄດ້ຮັບໄຊຊະນະ.

ທ່ານ ນາງ ເຢວເລັນ ກ່າວອີກວ່າ: ຂໍ້ຕົກລົງດັ່ງກ່າວນີ້ ມີ 130 ປະເທດ ທີ່ມີສັດສ່ວນ ຈີດີພີ ກວມເອົາ 90% ຂອງໂລກ ຖືວ່ເປັນການສົ່ງສັນຍານທີ່ຊັດເຈນວ່າການແຂ່ງຂັນປັບຫຼຸດອັດຕາພາສີລົງໃຫ້ຕ່ຳທີ່ສຸດໃກ້ຈະສິ້ນສຸດລົງແລ້ວ ໂດຍອາເມຣິກາຈະເຂົ້າຮ່ວມແຂ່ງຂັນທີ່ພວກເຮົາສາມາດເອົາຊະນະໄດ້ ໂດຍຕັດສິນໃຈຈາກຄວາມຊຳນານງານຂອງແຮງງານພວກເຮົາ ແລະ ຄວາມເຂັ້ມແຂງຂອງໂຄງສ້າງພື້ນຖານຂອງພວກເຮົາ.

ແນວໃດກໍຕາມ, ລັດຖະມົນຕີກະຊວງການເງິນຂອງອາເມຣິກາ ບໍ່ໄດ້ລະບຸວ່າ: ອັດຕາພາສີຂັ້ນຕ່ຳຈະຢູ່ໃນລະດັບໃດ ແຕ່ລັດຖະບານອາເມຣິກາໄດ້ພະຍາຍາມຍູ້ດັນໃຫ້ອັດຕາພາສີຂັ້ນຕ່ຳທົ່ວໂລກຢູ່ທີ່ 15% ຫາກມີການບັງຄັບໃຊ້ຂໍ້ຕົກລົງ GMT ຢ່າງແຜ່ຫຼາຍ ກໍຈະເຮັດໃຫ້ບໍລິສັດຂະໜາດໃຫຍ່ຢຸດຕິພຶດຕິກຳໃນການສ້າງຕັ້ງສຳນັກງານໃຫຍ່ໃນປະເທດທີ່ມີອັດຕາພາສີຕ່ຳກວ່າໄດ້ຢ່າງແນ່ນອນ.

["]