ໂລກ້າ ຮ່ວມມື ບໍລິສັດ ໂຊກມີໄຊ ຂະຫຍາຍບໍລິການແທັກຊີອອນລາຍ 24 ຊົ່ວໂມງ ຢູ່ທີ່ປາກເຊ ແຂວງຈຳປາສັກ “

392

ບໍລິສັດ ໂລກ້າ ຈຳກັດ ຜູ້ໃຫ້ບໍລິການແທັກຊີອອນລາຍ 24 ຊົ່ວໂມງ ໄດ້ເປີດໃຫ້ບໍລິການແລ້ວທີ່ປາກເຊ ເຊິ່ງກ່ອນຈະມີການເປີດໂຕທີ່ນະຄອນປາກເຊ ໂລກ້າ ໄດ້ເປີດໃຫ້ບໍລິການແລ້ວທີ່ນະຄອນຫຼວງວຽງຈັນ ແລະ ນະຄອນຫຼວງພະບາງ. ແຕ່ໄວໆນີ້ ບໍລິສັດ ໂລກ້າ ຈໍາກັດ ໄດ້ຮ່ວມກັບ ບໍລິສັດ ໂຊກມີໄຊ ຈຳກັດ ຜູ້ດຽວ ເພື່ອໃຫ້ບໍລິການແທັກຊີອອນລາຍ, ທັງນີ້ກໍເພື່ອເພີ່ມທາງເລືອກຮູບແບບບໍລິການໃໝ່ໆໃຫ້ກັບລູກຄ້າ ແລະ ກະແສທີ່ຮຽກຮ້ອງຈາກລູກຄ້າທີ່ຢູ່ຕ່າງແຂວງ ໂດຍສະເພາະແມ່ນແຂວງຈຳປາສັກ.

ການເຊັນສັນຍາ ໄດ້ຈັດຂຶ້ນໃນເວລາ 14:00 ໂມງ ຂອງວັນທີ 29 ມິຖຸນາ 2021 ທີ່ຫ້ອງການສະພາການຄ້າ ແລະ ອຸດສາຫະກໍາແຂວງຈຳປາສັກ ເຊິ່ງໄດ້ຮັບກຽດຈາກບັນດາທ່ານທີ່ໄດ້ຮ່ວມເປັນສັກຂີພິຍານ ຄື: ທ່ານ ສຸລິຍາ ນາເຟືອງວິໄລ ຮອງຫົວໜ້າພະແນກແຜນການ ແລະ ການລົງທຶນແຂວງຈໍາປາສັກ, ທ່ານ ລັດສະໄໝ ຮຸ່ງໄຊຍະສິງ ຮອງປະທານສູນບໍລິການວິສາຫະກິດຂະໜາດນ້ອຍ ແລະ ກາງ ແຂວງຈໍາປາສັກ, ທ່ານ ສິໂຫ ຈັນທະຄູນ ຮອງຫົວໜ້າຂະແໜງການຄຸ້ມຄອງຂົນສົ່ງ ພະແນກໂຍທາທິການ ແລະ ການຂົນສົ່ງ ແຂວງຈໍາປາສັກ.

อาจเป็นรูปภาพของ 7 คน, ผู้คนกำลังนั่ง และผู้คนกำลังยืน

ໂດຍການຮ່ວມເຊັນສັນຍາດັ່ງກ່າວ, ທ່ານ ສຸລິໂຍ ວົງດາລາ ຜູ້ອຳນວຍການ ບໍລິສັດ ໂລກ້າ ຈຳກັດ ໄດ້ກ່າວເຖິງຄວາມເປັນມາຂອງໂລກ້າ, ບໍລິການຕ່າງໆຂອງໂລກ້າ ແລະ ນຳສະເໜີເຖິງແຮງບັນດານໃຈໃນການຮ່ວມມືກັນລະຫວ່າງ ໂລກ້າ ( LOCA ) ພ້ອມທັງເນັ້ນວ່າ: ບໍລິສັດ ໂລກ້າ ຈຳກັດ ໄດ້ເບິ່ງເຫັນເຖິງຄວາມຕ້ອງການຂອງລູກຄ້າທາງແຂວງຈຳປາສັກ ທີ່ຮຽກຮ້ອງຢາກເຫັນການບໍລິການແບບໃໝ່ທີ່ໜ້າສົນໃຈ ແລະ ກໍຖືວ່າເປັນກະແສຕອບຮັບທີ່ດີ, ເຮັດໃຫ້ເຮົາໄດ້ມີແນວທາງໃໝ່ໃນການຂະຫຍາຍການບໍລິການໃຫ້ແກ່ລູກຄ້າ ແລະ ໄດ້ມີ ບໍລິສັດ ໂຊກມີໄຊ ຈຳກັດຜູ້ດຽວ ທີ່ໄດ້ໃຫ້ບໍລິການຢູ່ທາງຈຳປາສັກຢູ່ແລ້ວ ໄດ້ເຫັນດີເຖິງແນວທາງ ແລະ ນະໂຍບາຍທີ່ກົງກັນ ຈຶ່ງໄດ້ລົງຮ່ວມເຊັນສັນຍາໃນຄັ້ງນີ້.

["]

ສຳລັບທາງ ບໍລິສັດ ໂຊກມີໄຊ ຈຳກັດຜູ້ດຽວ, ທ່ານ ຢູຣະນັນ ລາດຊະວົງ ຮອງອຳນວຍການ ບໍລິສັດ ໂຊກມີໄຊ ໄດ້ກ່າວເຖິງແຮງບັນດານໃຈໃນການຮ່ວມມືກັບ ບໍລິສັດ ໂລກ້າ ຈຳກັດ ວ່າ: ການຮ່ວມເຊັນສັນຍາໃນຄັ້ງນີ້ຖືວ່າເປັນປາກົດການດີທີ່ໄດ້ເກີດຂຶ້ນຢູ່ໃນນະຄອນປາກເຊຂອງເຮົາ ແລະ ເປັນໂອກາດດີທີ່ ບໍລິສັດ ໂລກ້າ ຈຳກັດ ໄດ້ນຳລະບົບການໃຊ້ງານການເອີ້ນລົດແບບອອນລາຍ ເຊິ່ງເປັນທາງເລືອກໃໝ່ໃຫ້ລູກຄ້າທີ່ຈະເພີ່ມຄວາມສະດວກສະບາຍ ແລະ ລາຄາທີ່ໂປ່ງໃສ, ເຮົາໄດ້ຄາດຫວັງວ່າ ບໍລິສັດ ໂຊກມີໄຊ ແລະ ບໍລິສັດ ໂລກ້າ ຈະດຳເນີນຮ່ວມພັດທະນາຕໍ່ໄປດ້ວຍກັນ.

อาจเป็นรูปภาพของ 3 คน, ผู้คนกำลังยืน, รถยนต์ และถนน

ທ່ານ ສຸລິຍາ ນາເຟືອງວິໄລ ຮອງຫົວໜ້າພະແນກແຜນການ ແລະ ການລົງທຶນແຂວງຈໍາປາສັກ ໄດ້ໃຫ້ຄຳຄິດເຫັນວ່າ: ຂ້າພະເຈົ້າເຊື່ອໝັ້ນວ່າທັງສອງບໍລິສັດໄດ້ມີການຮ່ວມມື ແລະ ຮ່ວມກັນພັດທະນາການບໍລິການຂົນສົ່ງໂດຍສານ ນັບວ່າເປັນຈຸດເລີ່ມຕົ້ນຄວາມໝາຍໃໝ່ໃນການພັດທະນາການຄົມມະນາຄົມຂົນສົ່ງຂອງ ສປປ ລາວ.

ທ່ານ ລັດສະໄໝ ຮຸ່ງໄຊຍະສິງ ຮອງປະທານສູນບໍລິການວິສາຫະກິດຂະໜາດນ້ອຍ ແລະ ຂະໜາດກາງ ແຂວງຈຳປາສັກ ໄດ້ກ່າວວ່າ: ຮູ້ສຶກຍິນດີທີ່ທຸລະກິດຂອງບໍລິສັດທັງສອງໄດ້ຕົກລົງເຊັນສັນຍາຮ່ວມມືກັນ ເພື່ອຈະເຮັດໃຫ້ການບໍລິການເພື່ອປະຊາຊົນພາຍໃນແຂວງຈຳປາສັກ, ນັກທ່ອງທ່ຽວທັງພາຍນອກ ແລະ ພາຍໃນທີ່ຈະເຂົ້າມາໃນອະນາຄົດ ເຮັດໃຫ້ການບໍລິການແທັກຊີນັ້ນດີຂຶ້ນກວ່າເກົ່າ ແລະ ມັນໄດ້ເປັນບາດກ້າວທີ່ສຳຄັນທີ່ສຸດ ເພື່ອໃຫ້ການພັດທະນາດ້ານການບໍລິການໃຫ້ເກີດໜໍໍ່ອອກຜົນຕໍ່ໄປ.

อาจเป็นรูปภาพของ รถยนต์ และถนน

ທ່ານ ສິໂຫ ຈັນທະຄູນ ຮອງຫົວໜ້າຂະແໜງການຄຸ້ມຄອງຂົນສົ່ງ ພະແນກໂຍທາທິການ ແລະ ການຂົນສົ່ງ ແຂວງຈໍາປາສັກ ໄດ້ກ່າວວ່າ: ຮູ້ສຶກດີໃຈທີ່ທັງສອງບໍລິສັດໄດ້ໃຫ້ຄວາມສົນໃຈການບໍລິການທີ່ຈະເຮັດໃຫ້ປະຊາຊົນໄດ້ມີຫຼາຍທາງເລືອກ ແລະ ສາມາດຮູ້ລາຄາທີ່ໂປ່ງໃສໄດ້.

ຫຼັງຈາກໄດ້ຮັບຄວາມຊີ້ແນະ ແລະ ຄໍາແນະນໍາຂອງແຂກຜູ້ມີກຽດທຸກທ່ານແລ້ວ ທ່ານ ສຸລິໂຍ ວົງດາລາ ອໍານວຍການ ບໍລິສັດ ໂລກ້າ ຈໍາກັດ ແລະ ທ່ານ ນາງ ພິ່ງກີ້ ທອນທົງເດດ ອໍານວຍການ ບໍລິສັດ ໂຊກມີໄຊ ຈໍາກັດ ຜູ້ດຽວ ໄດ້ພ້ອມກັນລົງນາມເຊັນສັນຍາການຮ່ວມມື. ພິທີເຊັນສັນຍາຄັ້ງນີ້ມີຄວາມສໍາຄັນເປັນຢ່າງຍິ່ງໃນການພັດທະນາວຽກງານບໍລິການດ້ານແທັກຊີໃນແຂວງຈໍາປາສັກ.

อาจเป็นรูปภาพของ รถยนต์ และถนน

ນອກຈາກການເປີດໃຫ້ບໍລິການໃນສາຂາປາກເຊແລ້ວ, ໂລກ້າ ຍັງໄດ້ເນັ້ນເລື່ອງຂອງຄວາມປອດໄພໃຫ້ແກ່ຜູ້ໂດຍສານທຸກຄົນທີ່ໃຊ້ບໍລິການ; ການໂດຍສານທຸກຖ້ຽວຂອງໂລກ້າ ແມ່ນໄດ້ຮັບການຄຸ້ມຄອງສູງສຸດ 500 ລ້ານກີບ ຈາກພົງສະຫວັນປະກັນໄພ ( APA ) ແລະ ໂລກ້າ ຍັງມີສິດທິພິເສດ ໂດຍການໃຫ້ລູກຄ້າສາມາດສະສົມຄະແນນຈາກການໃຊ້ບໍລິການຂອງໂລກ້າ ເພື່ອແລກຂອງຂວັນ ແລະ ບໍລິການຕ່າງໆອີກດ້ວຍ.

ພ້ອມນີ້, ບໍລິການຂອງໂລກ້າ ກໍຍັງມີລາຄາທີ່ໂປ່ງໃສ ເພາະນຳໃຊ້ລະບົບຄິດໄລ່ລາຄາທີ່ຜູ້ໃຊ້ສາມາດກວດສອບໄດ້ໃນທຸກໆຖ້ຽວ, ມີປະຫວັດຂອງຄົນຂັບ ແລະ ຍິ່ງເດີນທາງພ້ອມກັນຫຼາຍຄົນຍິ່ງປະຢັດ ເພາະຄ່າບໍລິການແມ່ນສາມາດຫານກັນໄດ້ ( ບໍ່ໄດ້ໄລ່ເປັນບຸກຄົນ ), ຕິດຕໍ່ສອບຖາມຂໍ້ມູນເພີ່ມຕື່ມ ໂທລະສັບ: 020 9811 1129.

– Facebook: www.facebook.com/localaos

– Website: www.loca.la