ໂຄງການຟື້ນຟູຊົນລະປະທານ ນໍ້າສະ ແລະນໍ້າອອນ ເມືອງລອງ ແຂວງຫລວງນໍ້າທາທີ່ກໍ່ສ້າງແຕ່ຕົ້ນປີ 2021 ມູນຄ່າ 6 ຕື້ກວ່າກີບ ປັດຈຸບັນສໍາເລັດແລ້ວ100% ສາມາດສະໜອງນໍ້າໃນເນື້ອທີ່ກວ່າ 238 ເຮັດຕາ.
ວັນທີ 30 ມິຖຸນາ 2021 ຄະນະກໍາມະການຄຸ້ມຄອງ ໂຄງການພັດທະນາໂຄງລ່າງ ຊົນນະບົດພາກເໜືອ ໄດ້ລົງກວດກາ ຊົນລະປະທານ ນໍ້າສະ ແລະ ນໍ້າອອນ ເມືອງລອງ ແຂວງຫຼວງນໍ້າທາ ນໍາໂດຍທ່ານ ພີມແກ້ວ ທໍາລະສີນ ຫົວໜ້າພະແນກກະສິກຳ ແລະ ປ່າໄມ້ແຂວງ ພ້ອມດ້ວຍທີມງານຂັ້ນແຂວງ, ຂັ້ນເມືອງ ມີຜູ້ປະສານງານໂຄງການຂັ້ນແຂວງ, ຕາງໜ້າບໍລິສັດຮັບເໝົາກໍ່ສ້າງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ໂຄງການຟື້ນຟູຊົນລະປະທານ ນໍ້າສະ ແລະນໍ້າອອນ ເມືອງລອງ ແຂວງຫລວງນໍ້າທາ ໄດ້ເລີ່ມລົງມືກໍ່ສ້າງມາແຕ່ຕົ້ນເດືອນມັງກອນ ປີ 2021 ມາຮອດປະຈຸບັນສໍາເລັດ 100 %, ຮັບເໝົາກໍ່ສ້າງໂດຍບໍລິສັດ ແກ້ວວິໄລ ກໍ່ສ້າງເຄຫາ-ຊົນລະປະທານ ຈໍາກັດ.
ຊົນລະປະທານທັງ 2 ແຫຼ່ງດັ່ງກາວສາມາດສະໜອງນໍ້າເຂົ້າຮົດເນື້ອທີ່ນາໄດ້ທັງໝົດ 238 ເຮັກຕາ ໃນ 2 ກຸ່ມບ້ານຄື: ກຸ່ມບ້ານສະ ແລະ ກຸ່ມບ້ານຊຽງກົກ ໃນນີ້ ກຸ່ມບ້ານສະ ປະກອບມີເນື້ອທີ່ 160 ເຮັກຕາ ໃນຈໍານວນ 2 ບ້ານເປົ້າໝາຍຄື: ບ້ານສະ ແລະ ບ້ານຕີນດອຍ. ຊົນລະປະທານນໍ້າສະປະກອບມີຝາຍນໍ້າລົ້ນຈໍານວນ 14 ຫົວງານ ແລະ ປະຕູຮັບນໍ້າ 9 ປະຕູ.
ສໍາລັບຊົນລະປະທານນໍ້າອອນກຸ່ມບ້ານຊຽງກົກ ສາມາດສະໜອງນໍ້າຮົດເນື້ອທີ່ນາໄດ້ 78 ເຮັກຕາ ໃນຈໍານວນ 4 ບ້ານເປົ້າໝາຍຄື: ບ້ານຊຽງກົກເກົ່າ, ບ້ານຊຽງກົກໃໝ່, ບ້ານກົກມ່ວງ ແລະ ບ້ານສົມປານໃຕ້. ຊົນລະປະທານນໍ້າອອນລວມມີ 28 ຫົວງານ, ກັນເຈື່ອນ 4 ແຫ່ງ, ມີປະຕູນໍ້າ 14 ປະຕູ ແລະ ມີຄອງເໝືອງ 29 ເສັ້ນ.
ຊົນລະປະທານທັງ 2 ແຫຼ່ງລວມມູນຄ່າການກໍ່ສ້າງທັງໝົດ 6 ຕື້ 294 ລ້ານ 4 ແສນ ກວ່າກີບ ໂດຍແມ່ນທຶນຊ່ວຍເຫຼືອຫຼ້າຈາກທະນາຄານພັດທະນາອາຊີ .
ການລົງກວດກາຄັ້ງນີ້ ກໍເພື່ອເປັນການປະເມີນຜົນສໍາເລັດຂອງຊົນລະປະທານນໍ້າສະ ແລະ ນໍ້າອອນ, ພ້ອມທັງເປັນການເລີ່ມຕົ້ນນໍາໃຊ້ທາງດ້ານຄຸນນະພາບການໃຊ້ງານຂອງຝາຍ, ປະຕູຮັບນໍ້າ ແລະ ຄອງເໝືອງ ທີ່ຈະສາມາດຕອງສະໜອງນໍ້າໃຫ້ພໍ່ແມ່ປະຊາຊົນທັງ 2 ກຸ່ມບ້ານໄດ້ນໍາໃຊ້ນໍ້າເຂົ້າໃນການຜະລິດພືດກະສິກໍາ, ເຮັດນາ ແລະ ປູກພືດອື່ນໆໄດ້ຢາງພຽງພໍ ແລະ ສະດວກສະບາຍ.
