ກາຍເປັນດາວດັບທັນທີສໍາລັບ ຄີລຽນ ເອັມບັບເປ ກອງໜ້າດາວເດັ່ນຂອງ ທີມຊາດຝຣັ່ງ ທີ່ຫຼິ້ນດີມາຕະຫຼອດຮອບແບ່ງກຸ່ມ ແລະ ຖືກຍົກໃຫ້ເປັນຄົນທີ່ຈະພາທີມຊາດຝຣັ່ງ ຄວ້າແຊັມໃນຢູໂຣ 2020
ແຕ່ສິ່ງທີ່ບໍ່ຄາດຄິດເກີດຂຶ້ນໃນນັດທີດວນຈຸດໂທດເສຍໃຫ້ກັບ ສະວິດ 4-5 ເມື່ອວັນທີ 28 ມິຖຸນາ 2021 ( ກົງກັບຕອນເຊົ້າຂອງວັນທີ 29 ມິຖຸນາ 2021 ເວລາໃນບ້ານເຮົາ ) ເອັມບັບເປ ເປັນຄົນຍິງຈຸດໂທດຄົນສຸດທ້າຍພາດສົ່ງຜົນໃຫ້ທີມເກັບກະເປົ໋າກັບບ້ານ.
ເອັມບັບເປ ເຖິງຈະບໍ່ສາມາດຍິງປະຕູໃນຢູໂຣ 2020 ຮອບສຸດທ້າຍໄດ້ ແຕ່ກໍມີສ່ວນຊ່ວຍໃຫ້ທີມໄດ້ປະຕູ ແລະ ສ້າງເກມບຸກໃຫ້ກັບທີມຊາດຝຣັ່ງ ໄດ້ສົມລາຄາກັບການພາທີມຄວ້າ ແຊັມໂລກ 2018 ໂດຍຜົນງານໂດດເດັ່ນ ຊະນະ ເຢຍລະມັນ 1-0, ສະເໝີ ຮົງກາລີ 1-1 ແລະ ສະເໝີ ປ໊ອກຕຸຍການ 2-2 ຜ່ານເຂົ້າຮອບພົບກັບ ສະວິດ ທີມມ້າມືດອັນດັບ 3 ຈາກກຸ່ມ A.
ເຂົ້າສູ່ຮອບ 16 ທີມສຸດທ້າຍ ນັກວິເຄາະຍົກ ຝຣັ່ງ ເປັນເຕັງ 1 ໃນຢູໂຣ 2020 ແຕ່ນັດພົບກັບ ສະວິດ ບໍ່ງ່າຍເມື່ອ ສະວິດ ຫຼິ້ນໄດ້ໂດດເດັ່ນຢ່າງຜິດຫູຜິດຕາໄດ້ປະຕູຂຶ້ນນໍາ 1-0 ຢ່າງໄວວານາທີໆ 15 ຈາກການຍິງຂອງ ຮາຣິສ ເຊເຢໂຣວິຊ ແລະ ສະວິດ ກໍສືບຕໍ່ສູ້ກັບ ຝຣັ່ງ ໄດ້ດີໃນເຄິ່ງເວລາທໍາອິດ, ສ່ວນເຄິ່ງເວລາທີ 2 ຝຣັ່ງ ແກ້ເກມໄດ້ດີມາໄດ້ 3 ປະຕູລວດຈາກການຍິງຂອງ ຄາຣິມ ເບນເຊມາ 2 ປະຕູ ແລະ ພອລ ປ໊ອກບາ 1 ປະຕູພິກຂຶ້ນນໍາ 3-1, ແຕ່ໄລຍະທ້າຍເກມບໍ່ຄາດຄິດວ່າ ສະວິດ ຈະມາໄດ້ 2 ປະຕູຈາກການຍິງຂອງ ຮາຣິສ ເຊເຢໂຣວິຊ ນາທີໆ 81 ແລະ ມາຣິໂອ ກາຟຣາໂນວິຊ ຊ່ວຍໃຫ້ທີມໄລ່ຕີສະໝີ 3-3 ນາທີໆ 90 ເຮັດໃຫ້ຕ້ອງຕໍ່ເວລາພິເສດອອກໄປ 30 ນາທີໆແຕ່ກໍຍັງສະເໝີກັນຕ້ອງໄປຕັດສິນໃນການດວນຈຸດໂທດ.
ການດວນຈຸດໂທດເປັນໄປດ້ວຍຄວາມກົດດັນ ໂດຍສະເພາະ ຝຣັ່ງ ເພາະເປັນທັງແຊັມໂລກ 2018 ແລະ ເປັນຮອງແຊັມເກົ່າ ຢູໂຣ 2016 ປາກົດວ່າ: ຝຣັ່ງ ຍິງໄປ 4 ຄົນເຂົ້າທັງໝົດ, ແຕ່ ເອັມບັບເປ ຮັບໜ້າທີ່ຍິງເປັນຄົນສຸດທ້າຍຖືກຜູ້ຮັກສາປະຕູຂອງ ສະວິດ ປ້ອງກັນໄວ້ໄດ້ ເຮັດໃຫ້ ສະວິດ ທີ່ຍິງເຂົ້າໄປທັງໝົດ 5 ຄົນ ເອົາຊະນະ 5-4 ໄປໄດ້ຢ່າງໜ້າປະທັບໃຈ ໂດຍສະຖິຕິຫຼັງການແຂ່ງຂັນຄູ່ນີ້ເປັນຄູ່ທີ່ສ້າງໂອກາດຍິງໄດ້ຫຼາຍທີ່ສຸດຄື: ສະວິດ ມີໂອກາດຍິງເຖິງ 14 ຄັ້ງໃນນັ້ນເຂົ້າເປົ້າເຖິງ 10 ຄັ້ງ, ສ່ວນ ຝຣັ່ງ ຍິງ 25 ຄັ້ງ ( ເຂົ້າເປົ້າ 12 ຄັ້ງ ).
ເອັມບັບເປ ປັດຈຸບັນອາຍຸ 22 ປີຢູ່ກັບສະໂມສອນ ປາຣີສ ແຊງແຊກແມງ ສະໂມສອນຍັກໃຫຍ່ໃນລີກເອິງ ຝຣັ່ງ, ເຊິ່ງເປັນນັກເຕະດາວເດັ່ນຂອງທີມຊາດຝຣັ່ງ ແລະ ຕົວຄວາມຫວັງຂອງທີມ ດ້ວຍຄວາມໄວ ແລະ ທັກສະ ເຮັດໃຫ້ ເອັມບັບເປ ແຈ້ງເກີດຢ່າງເຕັມຕົວກັບທີມຊາດຝຣັ່ງ ຍິງໄປ 4 ປະຕູ ພາທີມຄວ້າແຊັມບານໂລກ 2018, ແຕ່ໃນຢູໂຣ 2020 ຮອບສຸດທ້າຍ ເອັມບັບເປ ບໍ່ສາມາດຍິງໄດ້ຈັກປະຕູ ແລະ ພາທີມຊາດຝຣັ່ງ ໃນຖານະຮອງແຊັມເກົ່າ ຕົກຮອບ 16 ທີມສຸດທ້າຍ ຢູໂຣ 2020 ໄປແບບພິກລ໊ອກ.
ສໍາລັບ ສະວິດ ຜ່ານເຂົ້າຮອບ 8 ທີມສຸດທ້າຍໄປພົບກັບ ແອັດສະປາຍ ໃນວັນທີ 2 ກໍລະກົດ 2021 ເວລາ 23:00 ໂມງ; ສ່ວນຄູ່ອື່ນມີດັ່ງນີ້ ແບນຊິິກ ພົບ ອິຕາລີ ໃນວັນທີ 2 ກໍລະກົດ, ສາທາລະນະລັດເຊັກ ພົບ ດານມາກ ໃນວັນທີ 3 ກໍລະກົດ ແລະ ອີກ 2 ທີມແມ່ນຍັງບໍ່ທັນໄດ້ຜົນການແຂ່ງຂັນ, ຈະສະຫຼຸບໃຫ້ຊາບພາຍຫຼັງ.
