ລາຄານ້ຳມັນໃນຕະຫຼາດໂລກອາດປັບຂຶ້ນເຖິງ 100 ໂດລາຕໍ່ບາເຣລ

166

ລາຄານ້ຳມັນດິບໃນຕະຫຼາດໂລກຂະນະນີ້ປັບຂຶ້ນເໜືອລະດັບ 70 ໂດລາສະຫະລັດ/ບາເຣລ ເຮັດໃຫ້ນັກວິເຄາະຄາດການວ່າ ໃນສະພາບແວດລ້ອມທີ່ເອື້ອອຳນວຍແບບນີ້ ມີໂອກາດທີ່ຈະດຶງລາຄານ້ຳມັນດິບໃນຕະຫຼາດໂລກເພີ່ມຂຶ້ນຈຸ 100 ໂດລາສະຫະລັດ/ບາເຣລອີກຄັ້ງ ຫຼັງຈາກທີ່ເຄີຍສ້າງສະຖິຕິເອົາໄວ້ເມື່ອປີ 2014 ໂດຍມີປັດໄຈຫຼາຍຢ່າງທີ່ສະໜັບສະໜູນຄວາມຄິດດັ່ງກ່າວ ໂດຍສະເພາະຄວາມຕ້ອງການບໍລິໂພກນ້ຳມັນອາດເພີ່ມຂຶ້ນອີກໃນ 6 ເດືອນຂ້າງໜ້ານີ້, ໃນຂະນະທີ່ກຸ່ມປະເທດຜູ້ຜະລິດ ແລະ ສົ່ງອອກນ້ຳມັນ ຍັງບໍ່ມີສັນຍານວ່າຈະເພີ່ມການຜະລິດຂຶ້ນອີກ.


ເຊື່ອກັນວ່າ ໃນຊ່ວງໄຕມາດ 4 ຂອງປີນີ້ ປະລິມານການບໍລິໂພກນ້ຳມັນຂອງໂລກຈະເພີ່ມຂຶ້ນເກືອບຈຸລະດັບການບໍລິໂພກນ້ຳມັນໃນປີ 2019, ຫຼັງຈາກນັ້ນກໍຈະເພີ່ມຂຶ້ນຕໍ່ເນື່ອງຈົນກາຍເປັນສະຖິຕິຄວາມຕ້ອງການນ້ຳມັນສູງສຸດຕໍ່ປີຂອງໂລກໃນປີ 2022 ເນື່ອງຈາກວ່າເສດຖະກິດໂລກໄດ້ຟື້ນຕົວຈາກການສັກວັກແຊັງປ້ອງກັນໂຄວິດ-19 ທົ່ວໂລກມີຄວາມຄືບໜ້າ ເຮັດໃຫ້ລັດຖະບານຫຼາຍປະເທດໃນໂລກຜ່ອນຄາຍມາດຕະການຕ່າງໆລົງ, ການເດີນທາງທ່ອງທ່ຽວກໍຈະເລີ່ມກັບຄືນມາອີກຄັ້ງ ແລະ ເມື່ອເຖິງເວລານັ້ນ ຄວາມຕ້ອງການປະລິມານນ້ຳມັນໃນໂລກກໍຍິ່ງເພີ່ມຂຶ້ນ.


ໃນຂະນະດຽວກັນປັດໄຈສຳຄັນດ້ານ “ຊັບພລາຍ (ການຜະລິດ)” ກໍຊ່ວຍສະໜັບສະໜູນໃຫ້ລາຄານ້ຳມັນດິບໃນຕະຫຼາດໂລກປັບຂຶ້ນ ເມື່ອຜົນຜະລິດນ້ຳມັນສ່ວນໃຫຍ່ຕົກຢູ່ໃນການຄວບຄຸມຂອງກຸ່ມພັນທະມິດ (ໂອເປັກ ພລັສ) ຢ່າງໝັ້ນຄົງ ແລະ ຢືນຢັນວ່າ ຈະຍັງບໍ່ເພີ່ມກຳລັງການຜະລິດຈົນເຖິງທ້າຍປີນີ້ ເຖິງແມ່ນວ່າ “ດີມານ (ຄວາມຕ້ອງການ)” ຈະເພີ່ມຂຶ້ນຈຸລະດັບ 96 ລ້ານບາເຣລ/ວັນໃນທ້າຍປີນີ້ກຕາມ.


ຈາກບັນຫາດັ່ງກ່າວ ເຮັດໃຫ້ນັກວິເຄາະເຊື່ອກັນວ່າ ໂອເປັກ ພລັສ ຍັງຈະຮັກສາການຜະລິດນ້ຳມັນປະມານ 5,8 ລ້ານບາເຣລ/ວັນອີກຕໍ່ໄປ ເພື່ອດຶງລາຄານ້ຳມັນໃຫ້ສູງຂຶ້ນຕະຫຼອດປີນີ້ ດ້ວຍເຫດຜົນທີ່ວ່າ ຖ້າຫາກປ່ອຍປະລິມານການຜະລິດທີ່ກັກເອົາໄວ້ອອກມາໄວເກີນໄປ ຈະເຮັດໃຫ້ລາຄານ້ຳມັນຫຼຸດລົງທັນທີ ເນື່ອງຈາກວ່າ ອິຣານໄດ້ບັນລຸຂໍ້ຕົກລົງກັບປະເທດຕາເວັນຕົກກ່ຽວກັວການສົ່ງອອກນ້ຳມັນ ເຊິ່ງຈະເຮັດໃຫ້ນ້ຳມັນຈາກອິຣານອອກມາສົມທົບກັນໃນຕະຫຼາດໂລກ ຈະສົ່ງຜົນໃຫ້ລາຄານ້ຳມັນປັບລົງທັນທີ.

["]


ວູດ ແມັກແຄນຊີ ເຊິ່ງເປັນບໍລິສັດວິໄຈດ້ານພະລັງງານລະດັບໂລກ ໄດ້ເຜີຍແຜ່ບົດລາຍງານເມື່ອບໍ່ດົນມານີ້ວ່າ: ໂອເປັກ ພລັສ ຕ້ອງການໃຫ້ລາຄານ້ຳມັນຢູ່ໃນລະດັບສູງເພື່ອ “ກູ້ຄືນ” ບາງສ່ວນທີ່ສູນເສຍໄປຕະຫຼອດປີ 2020 ຜ່ານມາ ເຊິ່ງຄາດກັນວ່າ ຈະຢູ່ທີ່ 335.000 ລ້ານໂດລາ ຫຼື 335 ຕື້ໂດລາ.
ວູດ ແມັກແຄນຊີ ຍັງຊີ້ວ່າ: ລາຄານ້ຳມັນດິບຢູ່ທີ່ລະດັບ 69-70 ໂດລາ/ບາເຣລ ຈະເຮັດໃຫ້ລາຍຮັບຈາກນ້ຳມັນຂອງໂອເປັກ ພລັສ ຢູ່ທີ່ລະດັບໃກ້ຄຽງກັບປີ 2019 ໃນຂະນະທີ່ການປ່ອຍປະລິມານນ້ຳມັນອອກສູ່ຕະຫຼາດຫຼຸດລົງ 10% ເມື່ອທຽບໃສ່ປີ 2019.


ແຕ່ສິ່ງນັ້ນກໍບໍ່ໄດ້ໝາຍຄວາມວ່າ ລາຄານ້ຳມັນດິບໃນຕະຫຼາດໂລກຈະເພີ່ມຂຶ້ນຈົນຈຸ 100 ໂດລາ/ບາເຣລ ເນື່ອງຈາກວ່າ ໂອເປັກ ພລັສ ກໍມີຄວາມລະມັດລະວັງບໍ່ໃຫ້ການດຳເນີນການຢ້ອນກັບມາທຳລາຍຕົນເອງໃນອະນາຄົດ ເນື່ອງຈາກວ່າ ຖ້າຫາກວ່າລາຄານ້ຳມັນສູງເກີນໄປຈະເຮັດໃຫ້ການຟື້ນຕົວຂອງເສດຖະກິດໂລກສະລໍຕົວລົງ, ນອກຈາກນີ້ ອາດຈະເຮັດໃຫ້ແຫຼ່ງຜະລິດນ້ຳມັນອື່ນໆທີ່ຢູ່ນອກກຸ່ມໂອເປັກ ແລະ ໂອເປັກ ພລັສ ຫັນກັບມາຜະລິດນ້ຳມັນແຂ່ງອີກຄັ້ງ.


ນັກວິເຄາະເຊື່ອວ່າ ມີຄວາມເປັນໄປໄດ້ທີ່ລາຄານ້ຳມັນດິບໃນຕະຫຼາດໂລກອາດປັບຂຶ້ນຈຸ 100 ໂດລາ/ບາເຣລ ແຕ່ຈະບໍ່ແມ່ນປີນີ້, ແນວໃດກໍຕາມຫາກການຜະລິດບໍ່ພຽງພໍກັບຄວາມຕ້ອງການກໍຈະເຮັດໃຫ້ລາຄາປັບຂຶ້ນຕໍ່ເນື່ອງ ເພາະໃນໄລຍະຜ່ານມາການລົງທຶນເພື່ອການຜະລິດນ້ຳມັນໃໝ່ໄດ້ຫຼຸດລົງ, ຂະນະທີ່ຄວາມຕ້ອງການຊ້ຳພັດເພີ່ມຂຶ້ນ ເຊິ່ງມີຄວາມເປັນໄປໄດ້ທີ່ເຮັດໃຫ້ລາຄານ້ຳມັນດິບໃນຕະຫຼາດໂລກຈຸ 100 ໂດລາ/ບາເຣລໃນປີ 2025.