25 ມິຖຸນາ ລາວ ມີຜູ້ຕິດເຊື້ອ 14 ຄົນ ທັງໝົດເປັນກໍລະນີນໍາເຂົ້າ

135

ໃນວັນທີ 25 ມິຖຸນາ 2021 ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ຕາງໜ້າກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ຖະແຫຼງຂ່າວປະຈຳວັນ ທີ່ກະຊວງສາທາລະນະສຸກ.

ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ໄດ້ລາຍງານວ່າ: ສຳລັບ ສປປ ລາວ ມາຮອດວັນທີ 24 ມິຖຸນາ 2021 : ໄດ້ກວດວິເຄາະທັງໝົດ 1.159 ຄົນ, ໃນນັ້ນ ກວດພົບຜູ້ຕິດເຊື້ອທັງໝົດ 14 ຄົນ, ຈາກນະຄອນຫຼວງ 3 ຄົນ, ສະຫວັນນະເຂດ 3 ຄົນ ແລະ ຈຳປາສັກ 8 ຄົນ ເຊ່ິ່ງທັງໝົດ ແມ່ນເປັນກໍລະນີນຳເຂົ້າ. ສຳລັບ ແຂວງສະຫວັນນະເຂດ 3 ຄົນ ແລະ ແຂວງຈຳປາສັກ 8 ຄົນ ແມ່ນກວດພົບຈາກແຮງງານລາວ ທີ່ກັບມາຈາກປະເທດເພື່ອນບ້ານ ໂດຍຖືກຕ້ອງຕາມກົດໝາຍ.

["]

ທ່ານກ່າວວ່າ: ສ່ວນ ນະຄອນຫຼວງວຽງຈັນ 3 ຄົນ ແມ່ນເປັນກໍລະນີນຳເຂົ້າ ຈາກຕ່າງປະເທດ ທີ່ມີລາຍລະອຽດດັ່ງນີ້: ຄົນທີ 1: ເພດຍິງ, ອາຍຸ: 35 ປີ, ສັນຊາດ ໂຄລຳເບຍ, ອາຊີບ: ພະນັກງານບໍລິສັດ, ຜູ້ກ່ຽວມີອາການ ໄອ, ເຈັບຫົວ, ເມື່ອຍ ແລະ ປວດຕາມຕົນໂຕ, ເດີນທາງມາຈາກປະເທດການາດາ ຜ່ານ ສະໜາມບິນກົວລາລຳເປີ, ປະເທດມາເລເຊຍ ມາ ສະໜາມບິນສາກົນວັດໄຕ ສປປ ລາວ ດ້ວຍຖ້ຽວບິນ AK7552 KUL-VTE (ນັ່ງຕັ່ງນ້ຳເບີ 21B) ໃນວັນທີ 24 ມິຖຸນາ 2021, ຖືກເກັບຕົວຢ່າງ ຢູ່ສະໜາມບິນສາກົນວັດໄຕ ແລະ ຜົນກວດພົບເຊື້ອ; ຄົນທີ 2: ເພດຊາຍ, ອາຍຸ: 28 ປີ, ສັນຊາດລາວ, ຮຽນຈົບຈາກ ສ ຣັດເຊຍ, ຜູ້ກ່ຽວບໍ່ມີອາການຫຍັງ, ເດີນທາງມາຈາກ ສ ຣັດເຊຍ ຜ່ານ ສະໜາມບິນກົວລາລຳເປີ, ປະເທດມາເລເຊຍ ມາ ສະ
ໜາມບິນສາກົນວັດໄຕ ສປປ ລາວ ດ້ວຍຖ້ຽວບິນ AK7552 KUL-VTE (ນັ່ງຕັ່ງນ້ຳເບີ 9A) ໃນວັນທີ 24 ມິຖຸນາ 2021, ຖືກເກັບຕົວຢ່າງ ຢູ່ສະໜາມບິນສາກົນວັດໄຕ ແລະ ຜົນກວດພົບເຊື້ອ; ຄົນທີ 3: ເພດຊາຍ, ອາຍຸ: 28 ປີ, ສັນຊາດລາວ, ຮຽນຈົບຈາກ ສ ຣັດເຊຍ, ຜູ້ກ່ຽວບໍ່ມີອາການຫຍັງ, ເດີນທາງມາຈາກ ສ ຣັດເຊຍ ຜ່ານ ສະໜາມບິນກົວລາລຳເປີ, ປະເທດມາເລເຊຍ ມາ ສະໜາມບິນສາກົນວັດໄຕ ສປປ ລາວ ດ້ວຍຖ້ຽວບິນ AK7552 KUL-VTE (ນັ່ງຕັ່ງນ້ຳເບີ 43J) ໃນວັນທີ 24 ມິຖຸນາ 2021, ຖືກເກັບຕົວຢ່າງ ຢູ່ສະໜາມບິນສາກົນວັດໄຕ ແລະ ຜົນກວດພົບເຊື້ອ.
ໃນຖ້ຽວບິນນີ້ ມີຜູ້ໂດຍສານທັງໝົດ 113 ຄົນ, ໃນນັ້ນ ມີຜູ້ສຳຜັດໃກ້ຊິດກັບຜູ້ຕິດເຊື້ອ ຈຳນວນ 32 ຄົນ, ເຊິ່ງທັງໝົດໄດ້ເກັບຕົວຢ່າງ ແລະ ເຂົ້າໄປຈຳກັດບໍລິເວນຢູ່ສະຖານທີ່ ທີ່ຄະນະສະເພາະກິດກຳນົດໄວ້.

ປະຈຸບັນ ມີຜູ້ປີ່ນປົວຫາຍດີທັງໝົດ 1.968 ຄົນ ແລະ ຍັງສືບຕໍ່ປິ່ນປົວ 123 ຄົນ. ການເຝົ້າລະວັງຢູ່ຕາມຈຸດຜ່ານແດນໃນຂອບເຂດທົ່ວປະເທດ ວັນທີ 24 ມິຖຸນາ 2021 ມີຜູ້ເດີນທາງເຂົ້າມາດ່ານຕ່າງໆ ໃນ ສປປ ລາວ ຈຳນວນທັງໝົດ 2.540 ຄົນ, ທັງໝົດແມ່ນຖືກນຳສົ່ງໄປຈຳກັດບໍລິເວນ 14 ວັນຢູ່ສະຖານທີ່ ທີ່ຄະນະສະເພາະກິດກຳນົດໄວ້.


ປັດຈຸບັນ ທົ່ວປະເທດ ມີສູນຈຳກັດບໍລິເວນ ທີ່ຍັງເປີດຢູ່ 43 ສູນ ແລະ ມີຜູ້ຈຳກັດບໍລິເວນ 3.951 ຄົນ. ສຳລັບສະຖານທີ່ ເກັບຕົວຢ່າງ ເພື່ອກວດຫາເຊື້ອ ພະຍາດໂຄວີດ-19 ມີດັ່ງນີ້: ສຳລັບນະຄອນຫຼວງວຽງຈັນ ມີ 5 ໂຮງໝໍສູນກາງ ແລະ ໂຮງໝໍ 103 ສູນກາງກອງທັບ, ຈຸດກວດນອກສະຖານທີ່ ຢູ່ ໂຮງຮຽນ ສີໂຄດ ໃຫ້ບໍລິການ ເກັບຕົວຢ່າງ 9-12 ໂມງ ທຸກມື້ (ວັນຈັນ ເຖິງ ວັນອາທິດ) ແລະ ຖ້າມີກໍລະນີບວກ (+) ໃໝ່ ຢູ່ບ້ານໃດ ຈະມີທີມງານເຄື່ອນທີ່ໄປເກັບຕົວຢ່າງຜູ້ສຳພັດໃກ້ຊິດ ໃນຈຸດ ທີ່ມີກໍລະນີຜູ້ຕິດເຊື້ອໃໝ່. ປະຈຸບັນ ຈຳນວນບ້ານແດງ ໃນນະຄອນຫຼວງວຽງຈັນ ແມ່ນມີ 13 ບ້ານ ໃນ 04 ເມືອງ. ບ້ານໃໝ່ທີ່ຖືກກຳນົດເປັນເຂດແດງ ມີ 1 ບ້ານ ຄື: ບ້ານນາສ້າງໄພ, ເມືອງໄຊເສດຖາ.


ທ່ານໃຫ້ຮູ້ຕື່ມວ່າ: ເພື່ອສະກັດກັ້ນ ບໍ່ໃຫ້ມີການລະບາດຄັ້ງໃໝ່ ໂດຍການນຳເຂົ້າສາຍພັນໃໝ່ ເຂົ້າມາບ້ານເຮົາເພິ່ມເຕີມ ຈຶ່ງຮຽກຮ້ອງໃຫ້ອຳນາດການປົກຄອງທ້ອງຖິ່ນ, ເຈົ້າໜ້າທີ່ ປກສ, ປກຊ ເຂັ້ມງວດຕໍ່ຜູ້ທີ່ເຂົ້າມາບໍ່ຖືກຕ້ອງຕາມກົດໝາຍ (ຕາມຊ່ອງທາງທຳມະຊາດ). ດັ່ງນັ້ນ, ຄວນເອົາໃຈໃສ່ ເພິ່ມທະວີ ການລາດຕະເວນ ເພື່ອສະກັດກັ້ນ ການນຳເອົາເຊື້ອເຂົ້າມາ ແລະ ຖ້າຫາກທ່ານພົບເຫັນ ບຸກຄົນທີ່ກັບມາຈາກປະເທດເພື່ອນບ້ານ ແມ່ນໃຫ້ຮີບຮ້ອນລາຍງານໃຫ້ແກ່ອຳນາດປົກຄອງບ້ານທັນທີ ເພື່ອຈະນຳເອົາຜູ້ກ່ຽວ ເຂົ້າໄປສູນຈຳກັດບໍລິເວນ, ເກັບຕົວຢ່າງກວດຊອກຫາເຊື້ອ ແລະ ສາຍພັນ; ເຖິງວ່າ ປະຊາຊົນລາວ ບັນດາເຜົ່າໃນຂອບເຂດທົ່ວປະເທດ ພ້ອມທັງ ພະນັກງານ, ທະຫານ, ຕຳຫຼວດ ສ່ວນຫຼາຍ ແມ່ນໄດ້ຮັບການສັກວັກຊີນ ຢ່າງໜ້ອຍ 1 ເຂັມ ແລ້ວກໍ່ຕາມ ແຕ່ການຮັກສາໄລຍະຫ່າງທາງສັງຄົມ, ສວມໃສ່ຜ້າປິດ-ດັງ, ໝັ່ນລ້າງມືເລື້ອຍໆ ດ້ວຍນ້ຳສະອາດໃສ່ສະບູ ຫຼື ເຈວເຫຼົ້າ 70 % ຂຶ້ນໄປ ຍັງຈະຕ້ອງໄດ້ສືບຕໍ່ປະຕິບັດ ເພື່ອປ້ອງກັນ ການແຜ່ລະບາດຂອງພະຍາດໂຄວິດ-19 ບໍ່ໃຫ້ຂະຫຍາຍເປັນວົງກວ້າງ. ປະເທດເຮົາ ເຖິງວ່າຈະມີຕົວເລກຫຼຸດລົງກໍ່ຕາມ ກໍ່ບໍ່ຄວນປະໝາດ ແລະ ລະເຫຼິງ ຄວນເອົາໃຈໃສ່ ພ້ອມກັນປະຕິບັດມາດຕະການທີ່ຄະນະເພາະກິດວາງອອກ, ຫຼີກລ້ຽງການຊຸມແຊວ, ພົບປະສັງສັນ ໃນຄອບຄົວ, ໝູ່ເພື່ອນ ແລະ ສະຖານທີ່ຕ່າງໆ ເພື່ອຫຼຸດຜ່ອນການຕິດເຊື້ອໃນຊຸມຊົນ.