ສຳນັກຂ່າວຕ່າງປະເທດລາຍງານວ່າ ທຳນຽບປະທານາທິບໍດີສະຫະລັດອາເມຣິກາ ໄດ້ອອກຖະແຫຼງການກ່ຽວກັບແຜນການແຈກຢາຍວັກແຊັງປ້ອງກັນໂຄວິດ – 19 ຮອບທີ 2 ຈຳນວນ 55 ລ້ານໂດສ, ຫຼັງຈາກທີ່ຮອບທຳອິດບໍລິຈາກໄປແລ້ວ 25 ລ້ານໂດສ ເຮັດໃຫ້ແຜນແຈກຢາຍວັກແຊັງຂອງອາເມຣິກາ ຄົບ 80 ລ້ານໂດສ ຕາມທີ່ເຄີຍປະກາດໄວ້.
ທັງນີ້, ວັກແຊັງຈຳນວນ 55 ລ້ານໂດສດັ່ງກ່າວນັ້ນ ຈະມອບໃຫ້ໂຄງການໂຄແວັກ ຈຳນວນ 41 ລ້ານໂດສ, ໃນນັ້ນ 16 ລ້ານໂດສ ຈະກະຈາຍໄປໃນບັນດາປະເທດອາຊີ ເປັນຕົ້ນແມ່ນ: ອິນເດຍ, ເນປານ, ບັງກລາເທດ, ປາກິດສະຖານ, ສີລັງກາ, ອັຟການິດສະຖານ, ມານດິຟ, ພູຖານ, ຟີລິບປິນ, ຫວຽດນາມ, ອິນໂດເນເຊຍ, ໄທ, ມາເລເຊຍ, ໄທ, ລາວ, ປາປົວກີນີ, ກຳປູເຈຍ ແລະ ບັນດາປະເທດໃນມະຫາສະໝຸດປາຊີຟິກ.
ໃນຂະນະທີ່ອີກ 14 ລ້ານໂດສ ຈະຖືກສົ່ງໄປຍັງພູມີພາກແຄັບບຽນ ແລະ ອາເມຣິກາລາຕິນ ແລະ ອີກ 10 ລ້ານໂດສ ຈະສົ່ງໄປຍັງທະວີບອາຟຣິກກາ.
ສ່ວນອີກ 14 ລ້ານໂດສ ໃນຈຳນວນ 55 ລ້ານໂດສນັ້ນ ສະຫະລັດອາເມຣິກາ ຈະເປັນຜູ້ສົ່ງມອບໃຫ້ແກ່ບັນດາປະເທດທີ່ຕ້ອງການຄວາມຊ່ວຍເຫຼືອຈາກອາເມຣິກາໂດຍກົງ.
