ທ່ານ ຄໍາແພງ ໄຊສົມແພງ ລັດຖະມົນຕີກະຊວງ ອຸດສາຫະກຳ ແລະ ການຄ້າ(ອຄ) ພ້ອມຄະນະນໍາກະຊວງ ໄດ້ລົງຕິດຕາມ ແລະ ຊຸກຍູ້ການພັດທະນາ, ດຶງດູດການລົງທຶນພາຍໃນເຂດເສດຖະກິດກວມລວມໄຊເສດຖາ ເມື່ອວັນທີ 18 ມິຖຸນາ 2021.
ໃຫ້ການຕ້ອນຮັບຂອງທ່ານ ຈໍາປາ ຄໍາສຸກໃສ ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ພ້ອມຄະນະ ແລະ ຜູ້ພັດທະນາ.
ທ່ານ ສົມກຽດ ສີຫາລາດ ຮອງຫົວໜ້າຄະນະຄຸ້ມຄອງເຂດເສດຖະກິດພິເສດນະຄອນຫຼວງວຽງຈັນ ໄດ້ລາຍງານໂດຍສັງເຂບວ່າ: ເຂດພັດທະນາກວມລວມໄຊເຊດຖາເປັນເຂດໜຶ່ງ ທີ່ມີການພັດທະນາຢ່າງພົ້ນເດັ່ນຢູ່ໃນຈໍານວນເຂດເສດຖະກິດພິເສດທັງໝົດ 12 ເຂດໃນຂອບເຂດທົ່ວປະເທດ; ເປັນ 1 ໃນຈໍານວນ 5 ເຂດ ຂອງເຂດເສດຖະກິດພິເສດນະຄອນຫຼວງວຽງຈັນ ສ້າງຂຶ້ນໃນປີ 2010.
ມາຮອດປັດຈຸບັນໄດ້ມີບໍລິສັດເຂົ້າມາຈົດທະບຽນ ແລະ ລົງທຶນທັງໝົດ 86 ບໍລິສັດ ສ່ວນໃຫຍ່ມາຈາກ ຈີນ, ລາວ, ໄທ ແລະ ອື່ນ ກວມເອົາຂະແໜງອຸດສາຫະກໍາ, ການຄ້າ ແລະ ການບໍລິການ. ມິທຶນຈົດທະບຽນ 398 ລ້ານໂດລາສະຫະລັດ ແລະ ແຜນການລົງທຶນ 2,1 ຕື້ໂດລາສະຫະລັດ, ມູນຄ່າການລົງທຶນຕົວຈິງ 1,7 ຕື້ກວ່າໂດລາສະຫະລັດ, ປະຕິບັດພັນທະຈຳນວນ 9 ຕື້ກວ່າກີບ.
ພ້ອມນັ້ນ ກໍໄດ້ລົງຕິດຕາມສະພາບການ ພັດທະນາ ຂອງ ບໍລິສັດ ເປໂຕຼເຄມີລາວຈໍາກັດ ເຊິ່ງທ່ານ ເຫີ ຈຸນ ຮອງອໍານວຍການ ບໍລິສັດ ໄດ້ລາຍງານຫຍໍ້ການພັດທະນາ ວ່າ: ບໍລິສັດ ເປໂຕຼເຄມີລາວຈໍາກັດໄດ້ສ້າງຕັ້ງຂຶ້ນໃນປີ 2014 ເປັນວິສະຫະກິດຮ່ວມທຶນລາວ – ຈີນ ມູນຄ່າການລົງທຶນ 2 ຕື້ໂດລາສະຫະລັດ ໄລຍະເວລາກໍ່ສ້າງ 5-10ປີ ກໍາລັງການຜະລິດ 3 ລ້ານໂຕນຕໍ່ປີ, ມາຮອດປັດຈຸບັນ ສໍາເລັດການກໍ່ສ້າງໄລຍະທີ 1 ກໍາລັງການຜະລິດ 1 ລ້ານໂຕນຕໍ່ປີ, ບໍລິສັດຈະພັດທະນາໄລຍະທີ 2 ແລະ 3 ເພື່ອຍົກລະດັບການຜະລິດໃຫ້ໄດ້ຕາມເປົ້າໝາຍ.
ທ່ານ ຄໍາແພງ ໄຊສົມແພງ ລັດຖະມົນຕີກະຊວງ ອຸດສາຫະກຳ ແລະ ການຄ້າ ກໍໄດ້ນຳພາຄະນະຈາກບັນດາກົມວິຊາການ ຂອງກະຊວງອຸດສາຫະກຳ ແລະ ການຄ້າ ຄື: ຫ້ອງການກະຊວງ, ກົມອຸດສາຫະກຳ ແລະ ຫັດຖະກຳ, ກົມມາດຕະຖານ ແລະ ວັດແທກ, ກົມການຄ້າພາຍໃນ, ກົມການນຳເຂົ້າ ແລະ ສົ່ງອອກ ລົງຢ້ຽມຢາມການຈັດຕັ້ງປະຕິບັດວຽກງານຂອງຫ້ອງກວດສອບຄຸນນະພາບ ແລະ ທົດສອບວິສະວະກຳກໍ່ສ້າງ ແລະ ໂຮງກັ່ນນໍ້າມັນ ເປໂຕຣເຄມີລາວ ພ້ອມທັງ ລົງຢ້ຽມຊົມໂຄງການກໍ່ສ້າງເຂດລິເລີ່ມຕົວເມືອງໃໝ່ຂອງເຂດພັດທະນາ ກວມລວມໄຊເສດຖາ ອີກດ້ວຍ.
ໃນໂອກາດຢ້ຽມຢາມຄັ້ງນີ້ ທ່ານ ລັດຖະມົນຕີ ໄດ້ຊົມເຊີຍຕໍ່ຜົນສຳເລັດໃນການລົງທຶນພັດທະນາເຂດພັດທະນາກວມລວມໄຊເສດຖາ ແລະ ກິດຈະການ ທີ່ມາລົງທຶນ ໃນເຂດດັ່ງກ່າວ.
ການລົງຢ້ຽມຢາມໃນຄັ້ງນີ້ ແມ່ນເພື່ອຕິດຕາມຄວາມຄືບໜ້າ ແລະ ຊຸກຍູ້ສົ່ງເສີມການພັດທະນາ ແລະ ການລົງທຶນໃນເຂດດັ່ງກ່າວ ພ້ອມທັງ ຊຸກຍູ້ການຈັດຕັ້ງປະຕິບັດວຽກງານຄຸ້ມຄອງໂຮງງານອຸດສາຫະກຳ, ມາດຕະຖານ ແລະ ວັດແທກ, ການປົກປ້ອງ ແຮງງານ ແລະ ການປົກປັກຮັກສາສິ່ງແວດລ້ອມ ຕະຫຼອດເຖິງ ການປ້ອງກັນ ແລະ ຄວບຄຸມການລະບາດຂອງ ພະຍາດໂຄວິດ-19.