ໃນຕອນເຊົ້າວັນທີ 16 ມິຖຸນາ 2021 ນີ້, ທ່ານ ນາງ ປານີ ຢາທໍ່ຕູ້ ຮອງປະທານປະເທດ ພ້ອມຄະນະ ໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ວຽກງານຢູ່ໂຮງງານຕັດຫຍິບທຣີໂອ ບ້ານສີເກີດ ເມືອງນາຊາຍທອງ ແລະ ໂຮງງານຕັດຫຍິບຕຣີມາກ ຢູ່ບ້ານນາແຮ່ ເມືອງສີໂຄດຕະບອງ ນະຄອນຫລວງວຽງຈັນ.
ທ່ານ ຊົມພູ ອຸດົມພອນ ຕາງໜ້າອຳນວຍການ ບໍລິສັດທຣີໂອ (ລາວ) ເອັກສປອດ ຈຳກັດ ໄດ້ລາຍງານໃຫ້ຮູ້ວ່າ: ໂຮງງານຕັດຫຍິບທຣີໂອ ໄດ້ຮັບການສ້າງຕັ້ງຂຶ້ນໃນປີ 1995 ເປັນການລົງທຶນຂອງຕ່າງປະເທດ 100% ປັດຈຸບັນ ມີພະນັກງານທັງໝົດ 2.789 ຄົນ, ວິຊາການຕ່າງປະເທດ 16 ຄົນ, ການຜະລິດຕົ້ນຕໍແມ່ນເຄື່ອງນຸ່ງຫົ່ມທຸກຊະນິດ. ໃນ 1 ເດືອນສາມາດຜະລິດໄດ້ 2 ແສນກວ່າຜືນ ມູນຄ່າການສົ່ງອອກຄິດເປັນເງິນກີບປະມານ 27,5 ຕື້ກີບຂຶ້ນໄປ. ສ່ວນວຽກງານການຕ້ານ ແລະ ສະກັດກັ້ນການລະບາດຂອງພະຍາດໂຄວິດ-19 ທາງໂຮງງານໄດ້ປະຕິບັດຕາມຄໍາສັ່ງຂອງຄະນະສະ ເພາະກິດວາງອອກ ໂດຍໄດ້ຕັ້ງຄະນະສະເພາະກິດຂຶ້ນ 11 ຄົນ ເພື່ອຕິດຕາມຄົນເຂົ້າ-ອອກ ຢ່າງເຂັ້ມງວດເປັນປົກກະຕິ, ມີການວັດແທກອຸນຫະພູມກ່ອນເຂົ້າເຮັດວຽກ, ໃຊ້ເຈວລ້າງມື, ສະບູ, ຜ້າອັດປາກ-ອັດດັງ, ຮັກສາໄລຍະຫ່າງ, ປັດຈຸບັນພະນັກງານໄດ້ສັກວັກຊິນປ້ອງກັນໂຄວິດ-19 ຄົບ 2 ເຂັມແລ້ວ 598 ຄົນ, ສັກເຂັມທີ 1 ມີ 133 ຄົນ ແລະ ຈະຮັບວັກຊິນອີກ 1.633 ຄົນ.
ໂອກາດນີ້, ທ່ານ ນາງ ປານີ ຢາທໍ່ຕູ້ ໄດ້ເນັ້ນໃຫ້ໂຮງງານດັ່ງກ່າວ ເພີ່ມຄວາມເອົາ ໃຈໃສ່ສືບຕໍ່ປະຕິບັດມາດຕະການປ້ອງກັນ ແລະ ສະກັດກັ້ນການລະບາດຂອງພະຍາດໂຄວິດ-19 ຢ່າງເຂັ້ມງວດ ເປັນຕົ້ນ ການຮັກສາໄລຍະຫ່າງ ເນື່ອງຈາກວ່າປັດຈຸບັນ ກຸ່ມຜູ້ຕິດເຊື້ອບໍ່ສະແດງອາການ. ສະນັ້ນ, ການຮັກສາໄລຍະຫ່າງເປັນສິ່ງສຳຄັນ ທີ່ບໍ່ຄວນຖືເບົາ, ວັດແທກອຸນຫະພູມ, ໃຊ້ຜ້າອັດປາກ-ອັດດັງ ແລະ ໃຊ້ເຈວລ້າງມື.
ຈາກນັ້ນ, ທ່ານ ນາງ ປານີ ຢາທໍ່ຕູ້ ພ້ອມດ້ວຍຄະນະ ກໍໄດ້ໄປຢ້ຽມຢາມ ແລະຊຸກຍູ້ການຜະລິດໂຮງງານຕັດຫຍິບຕຣີມາກ ຈຳກັດ ຢູ່ບ້ານນາແຮ່, ເມືອງສີໂຄດຕະບອງ, ນະຄອນຫລວງວຽງຈັນ ແລະ ໄດ້ຮັບຟັງການລາຍງານຈາກ ທ່ານ ນາງ ມຸກດາ ແກ້ວສຸດທິພົນ ຜູ້ຈັດການຝ່າຍບໍລິຫານ ໂຮງງານຕັດຫຍິບຕຣີມາກ ຈຳກັດ ວ່າ: ໂຮງງານດັ່ງກ່າວ ໄດ້ຮັບການສ້າງຕັ້ງຂຶ້ນໃນວັນທີ 4 ກຸມພາ 1994 ເປັນການລົງທຶນຂອງຕ່າງປະ ເທດ 100%, ປັດຈຸບັນມີພະນັກງານທັງໝົດ 705 ຄົນ, ຍິງ 596 ຄົນ, ຄົນຕ່າງປະເທດ 27 ຄົນ ໂດຍເສື້ອຜ້າທີ່ຜະລິດແມ່ນສົ່ງອອກໄປຕ່າງປະເທດ. ສ່ວນມາດຕະການຕ້ານ ແລະສະກັດກັ້ນການລະບາດຂອງພະຍາດໂຄວິດ-19 ປັດຈຸບັນ ພະນັກງານໄດ້ຮັບວັກຊິນແລ້ວ 96% ແຕ່ລະວັນ ໄດ້ມີການວັດແທກອຸນຫະພູມກ່ອນເຂົ້າເຮັດວຽກ, ໃສ່ຜ້າອັດປາກ-ອັດດັງ, ໃຊ້ສະບູ, ເຈວລ້າງມື ແລະ ຮັກສາໄລຍະຫ່າງຕາມຄະນະສະເພາະກິດວາງອອກຢ່າງເຂັ້ມງວດ.
ທ່ານ ນາງ ປານີ ຢາທໍ່ຕູ້ ຮອງປະທານປະເທດ ລົງຢ້ຽມຢາມໂຮງງານຕັດຫຍິບ ທຣີໂອ ແລະ ໂຮງງານຕຣີມາກ
ໃນໂອກາດນີ້, ທ່ານ ນາງ ປານີ ຢາທໍ່ຕູ້ ກໍໄດ້ສະແດງຄວາມຊົມເຊີຍຕໍ່ໝາກຜົນຂອງການຜະລິດທີ່ຍາດມາໄດ້ໃນໄລຍະຜ່ານມາ, ພ້ອມທັງໃຫ້ທິດຊີ້ນຳໃນການປ້ອງກັນການລະບາດຂອງພະຍາດໂຄວິດ-19 ຕາມຄຳສັ່ງ, ຄຳແນະນຳ ຂອງຂັ້ນເທິງຢ່າງເຂັ້ມງວດ ເພື່ອເຮັດໃຫ້ບໍລິສັດມີຄວາມສະຫງົບປອດໄພ ຫ່າງໄກຈາກພະຍາດໂຄວິດ-19.