ວັກຊີນຊີໂນຟາມ (Sinopharm) ຈຳນວນ 500.000 ໂດສ ທີ່ໄດ້ຮັບການຊ່ວຍເຫຼືອຮອບໃຫມ່ຈາກລັດຖະບານແຫ່ງ ສປ ຈີນ ຖືກສົ່ງຈັດມາຮອດສະໜາມບິນສາກົນວັດໄຕ, ນະຄອນຫຼວງວຽງຈັນແລ້ວ ໃນຕອນແລງວັນທີ 14 ມິຖຸນາ 2021 ນີ້
ເຂົ້າຮ່ວມຕ້ອນຮັບວັກຊີນໃນຄັ້ງນີ້ນຳໂດຍ ທ່ານ ດຣ ລັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ທ່ານ ດຣ ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ພ້ອມດ້ວຍບັນດາພາກກ່ຽວຂ້ອງ, ຜູ້ຕ່າງໜ້າຈາກສະຖານທູດຈີນ ປະຈຳ ສປປ ລາວ ແລະ ສື່ມວນຊົນເຂົ້າຮ່ວມ.
ທ່ານ ດຣ ພອນປະເສີດ ອຸນາພົມ ໃຫ້ສຳພາດວ່າ: ວັກຊີນທີ່ໄດ້ຮັບການຊ່ວຍເຫຼືອຈາກລັດຖະບານແຫ່ງ ສປ ຈີນ ໃນຄັ້ງນີ້ ເປັນຈຳນວນ 500.000 ໂດສ ພ້ອມດ້ວຍອຸປະກອນສຳລັບການສັກຄົບຊຸດ ໂດຍພິທີມອບ-ຮັບ ວັກຊີນຢ່າງເປັນທາງການແມ່ນຈັດຈະຂຶ້ນໃນຕອນແລງວັນທີ 15 ມິຖຸນາ 2021 ທີ່ກະຊວງສາທາລະນະສຸກ.
ທ່ານ ດຣ. ພອນປະເສີດ ອຸນາພົມ ກ່າວໃນພິທີຖະແຫຼງຂ່າວປະຈຳວັນຂອງຄະນະສະເພາະກິດເພືອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ປະຈໍາວັນທີ 12 ມິຖຸນາ 2021 ວ່າ:ປັດຈຸບັນ ພວກເຮົາໄດ້ຮັບການຢືນຢັນ ວ່າທາງລັດຖະບານ ສປ ຈີນ ຈະຕອບສະໜອງວັກແຊັງຊີໂນຟາມມາໃຫ້ ສປປ ລາວ ຕື່ມອີກ ຈຳນວນ 500.000 ໂດສ. ເພາະສະນັ້ນ ແຕ່ລະແຂວງແມ່ນສາມາດປະຕິບັດສັກເຂັມ 1 ຮອບທີ 2 ໄປໄດ້ເລີຍ ແລະ ໃຫ້ປະຊາຊົນທຸກຄົນທີ່ຢູ່ໃນກຸ່ມເປົ້າໝາຍທີ່ມີອາຍຸແຕ່ 18 ປີຂຶ້ນໄປ ສາມາດເຂົ້າໄປສັກຢາວັກຊີນ ຮອບທີ 2 ເຂັມ 1 ສຳລັບວັກແຊັງຊີໂນຟາມ ໄດ້ຕາມຈຸດບໍລິການ ນັບແຕ່ວັນຈັນທີ 14 ມິຖຸນາ ເປັນຕົ້ນໄປ ໂດຍໃຫ້ແຕ່ລະແຂວງເອົາໃຈໃສ່ຈັດຕັ້ງປະຕິບັດ.
ສະເພາະນະຄອນຫຼວງວຽງຈັນ ໃນວັນທີ 15 ມິຖຸນານີ້ ກໍຈະໄດ້ມີການສັກວັກແຊັງຊີໂນຟາມ ຮອບທີ 2 ເຂັມ 1 ເຊັ່ນກັນຕາມຈຸດບໍລິການເຊັ່ນ: ຈຸດສະມາຄົມຈີນ ເມືອງຈັນທະບູລີ, ໂຮງໝໍເມືອງຈັນທະບູລີ, ໂຮງໝໍເມືອງສີໂຄດຕະບອງ ແລະ ມໍຕົ້ນສີໄຄ, ມສ ມິດຕະພາບລາວຫວຽດ ເມືອງໄຊເສດຖາ, ສະໜາມກິລາໃນຮົ່ມບຶງຂະຫຍອງ ເມືອງສີສັດຕະນາກ, ເມືອງນາຊາຍທອງ ແມ່ນຢູ່ໂຮງໝໍນ້ອຍອີ່ໄລ ແລະ ໂຮງໝໍນ້ອຍບ້ານບົວ, ໂຮງໝໍເມືອງໄຊທານີ ແລະ ໂຮງໝໍນ້ອຍໂຄກສີວິໄລ, ໂຮງໝໍເມືອງຫາດຊາຍຟອງ, ຫ້ອງການສາທາລະນະສຸກ ເມືອງສັງທອງ ແລະ ໂຮງໝໍເມືອງປາກງື່ມ.