ທ່ານ ຄໍາພັນ ສິດທິດໍາພາ ເຈົ້າແຂວງວຽງຈັນ ພ້ອມດ້ວຍຄະນະທີມງານການນໍາຂັ້ນແຂວງ ໄດ້ລົງຢ້ຽມຢາມພົບປະໂອ້ລົມ ແລະ ຊີ້ນໍາວຽກງານຮອບດ້ານຢູ່ເມືອງຊະນະຄາມ ໃນວັນທີ 10 ມິຖຸນາຜ່ານມານີ້ ໂດຍການເປັນກຽດຕ້ອນຮັບຢ່າງອົບອຸ່ນຂອງທ່ານ ສະໝານ ວິເສດຍະພົງ ກໍາມະການພັກແຂວງ ເລຂາພັກເມືອງ ເຈົ້າເມືອງຊະນະຄາມ ພ້ອມດ້ວຍບັນດາຄະນະນໍາຂັ້ນເມືອງ ແລະ ພະນັກງານຫຼັກແຫຼ່ງ ທີ່ສະໂມສອນຂອງເມືອງດັ່ງກ່າວ.
ທ່ານ ສະໝານ ວິເສດຍະພົງ ໄດ້ຕາງໜ້າໃຫ້ແກ່ຄະນະພັກ, ອົງການປົກຄອງເມືອງ ແລະ ປະຊາຊົນບັນດາເຜົ່າພາຍໃນເມືອງ ຂຶ້ນລາຍງານສະພາບການຈັດຕັ້ງປະຕິບັດວຽກງານຮອບດ້ານຂອງເມືອງຊະນະຄາມ ກໍຄືການຈັດຕັ້ງຜັນຂະຫຍາຍເນື້ອໃນມະຕິ XI ຂອງພັກ, ມະຕິ VI ຂອງອົງຄະນະພັກແຂວງວຽງຈັນ ແລະ ມະຕິ VII ຂອງອົງຄະນະພັກເມືອງ ແລະ ທິດທາງໃນການຈັດຕັ້ງປະຕິບັດໃນຕໍ່ໜ້າ ກໍຄືແຜນພັດທະນາເສດຖະກິດ-ສັງຄົມ 5 ປີ (2020-2025) ໃຫ້ບັນລຸຜົນສໍາເລັດຕາມລະດັບຄາດໝາຍ ຊຶ່ງໄດ້ວາງວິໄສທັດຕາມ 3 ແລວທາງເສດຖະກິດ ໂດຍຖືເອົາການພັດທະນາດ້ານກະສິກໍາ ຕິດພັນກັບອຸດສາຫະກໍາປຸງແຕ່ງ ເຊື່ອມໂຍງກັບການຄ້າຊາຍແດນ ແລະ ຫຼຸດພົ້ນອອກຈາກຄວາມທຸກຍາກ, ເອົາໃຈໃສ່ສືບຕໍ່ປະຕິບັດມາດຕະການປ້ອງກັນການຄວບຄຸມ, ຕ້ານການແຜ່ລະບາດຂອງພະຍາດໂຄວິດ-19 ຕາມຄໍາສັ່ງເລກທີ 06/ນຍ, ຄໍາສັ່ງເລກທີ 15/ນຍ ແລະ ຄໍາສັ່ງຂອງເຈົ້າແຂວງເລກທີ 007 ຢ່າງເຂັ້ມງວດ, ໂຄສະ ນາປຸກລະດົມປະຊາຊົນໃຫ້ໄດ້ຮັບວັກຊິນຢ່າງທົ່ວເຖິງ.
ຈາກນັ້ັ້ນບັນດາພະແນກການຕ່າງໆ ຍັງໄດ້ມີຄໍາຄິດເຫັນໂອ້ລົມຕໍ່ກອງປະຊຸມ ເພື່ອເຮັດໃຫ້ການປະຕິບັດວຽກງານໄດ້ມີຄວາມຖືກຕ້ອງ ແລະ ການກໍານົດແຜນການຈັດຕັ້ງປະຕິບັດວຽກງານໃນຕໍ່ໜ້າໄດ້ມີຈຸດສຸມອັນລະອຽດ, ສອດຄ່ອງກັບສະພາບການ ແລະ ມີປະສິດທິພາບຍິ່ງຂຶ້ນ.
ໃນໂອກາດການລົງຊຸກຍູ້ວຽກງານຮອບດ້ານໃນຄັ້ງນີ້ ທ່ານເຈົ້າແຂວງວຽງຈັນ ກໍໄດ້ມີຄໍາເຫັນໂອ້ລົມ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍມາຍັງຄະນະພັກ, ຄະນະນໍາ, ກົມກອງ, ຫ້ອງການ, ຕະຫຼອດເຖິງບັນດາພະນັກງານຫຼັກແຫຼ່ງ ແລະ ປະຊາຊົນບັນດາເຜົ່າພາຍໃນເມືອງ ທີ່ໄດ້ພ້ອມກັນສຸມໃສ່ທຸກໜ້າທີ່ວຽກງານ ທີ່ການຈັດຕັ້ງໄດ້ມອບໝາຍໃຫ້ ອັນໄດ້ເຮັດໃຫ້ມີຜົນສໍາເລັດໃນຫຼາຍດ້ານໃນໄລຍະຜ່ານມາ, ພ້ອມກັນນີ້ ທ່ານຍັງໄດ້ຮຽກຮ້ອງມາຍັງທຸກການຈັດຕັ້ງພາຍໃນເມືອງ ຈົ່ງໄດ້ເອົາໃຈໃສ່ສືບຕໍ່ຈັດຕັ້ງບັນດາໜ້າວຽກຕ່າງໆຕໍ່ໜ້າໃຫ້ມີປະສິດທິພາບເປັນຕົ້ນ ເອົາໃຈໃສ່ທາງດ້ານວຽກງານ ປກຊ-ປກສ ເພື່ອສຸມໃສ່ໃນການແກ້ໄຂບັນດາປະກົດການຫຍໍ້ທໍ້ໃຫ້ຫຼຸດລົງເທື່ອລະກ້າວ, ເອົາໃຈໃສ່ຕໍ່ກັບການພັດທະນາເສດຖະກິດ-ສັງຄົມ ສືບຕໍ່ໃນການລົງເກັບລາຍຮັບງົບປະມານໃຫ້ໄດ້ຕາມຄາດໝາຍທີ່ວາງໄວ້, ຊຸກຍູ້ຂະບວນການຜະລິດໃນດູຝົນຂອງປະຊາຊົນ ພ້ອມທັງເຝົ້າລະວັງການປ່ຽນແປງຂອງສະພາບດິນຟ້າອາກາດເພື່ອແຈ້ງເຕືອນໃຫ້ປະຊາຊົນໄດ້ຮັບຮູ້ຢ່າງທົ່ວເຖິງ ແລະ ທັນກັບສະພາບການ, ເອົາໃຈໃສ່ໃນການຄຸ້ມຄອງລາຄາສິນຄ້າ ແລະ ປຸກລະດົມການນໍາໃຊ້ຜະລິດຕະພັນພາຍໃນໃຫ້ຫຼາຍຂຶ້ນ, ຈັດຕັ້ງການສອບເສັງເລື່ອນຊັ້ນຂອງນັກຮຽນໃຫ້ສໍາເລັດ, ພ້ອມທັງປົກປັກຮັກສາ, ປັບປຸງບັນດາອຸປະກອນ, ອາຄານສະຖານທີ່ການຮຽນ-ການສອນຂອງບັນດາໂຮງຮຽນຕ່າງໆໃນໄລຍະພັກແລ້ງ ແລະ ຕິດຕາມອາການເຈັບເປັນຂອງບັນດາລູກຫຼານພາຍໃນຄອບຄົວ ເພື່ອໄດ້ຮັບການປິ່ນປົວທີ່ຖືກຕ້ອງ, ເປັນເຈົ້າການໃນການຕອບໂຕ້ສະກັດກັ້ນໃຫ້ທັນກັບສະພາບການ ແລະ ປຸກລະດົມປວງຊົນໃຫ້ມີຄວາມຮັບຮູ້, ມີສະຕິໃນການຕິດຕາມບັນດາຂໍ້ມູນຂ່າວສານຕ່າງໆຂອງທາງການ ທີ່ມີຄວາມຖືກຕ້ອງ ແລະ ສືບຕໍ່ໃນປະຕິບັດມາດຕະການປ້ອງກັນການຄວບຄຸມ, ຕ້ານການແຜ່ລະບາດຂອງພະຍາດໂຄວິດ-19 ໃຫ້ມີປະສິດທິພາບ.
ໃນໂອກາດດຽວກັນນີ້ ພາຍຫຼັງທີ່ສໍາເລັດກອງປະຊຸມ ທ່ານ ຄໍາພັນ ສິດພິດໍາພາ ພ້ອມດ້ວຍຄະນະ ກໍໄດ້ມອບບັນດາເຄື່ອງຊ່ວຍເຫຼືອ ແລະ ງົບປະມານຈໍານວນໜຶ່ງ ເພື່ອຊຸກຍູ້ວຽກງານປ້ອງກັນ, ສະກັດກັ້ນພະຍາດ ໂຄວິດ-19 ໃຫ້ແກ່ຄະນະສະເພາະກິດເມືອງຊະນະຄາມ, ຈາກນັ້ນໃນຕອນບ່າຍຂອງວັນດຽວກັນຄະນະທີມງານ ກໍໄດ້ສືບຕໍ່ລົງຕິດຕາມການສ້າງເສັ້ນທາງເລກທີ 11 ລະຫວ່າງສັນຍາທີ 1 ແລະ ສັນຍາທີ 2 ຢູ່ເຂດບ້ານໂນນສະຫວັນ ເມືອງຊະນະຄາມ ແລະ ສືບຕໍ່ລົງຢ້ຽມຢາມຄອບຄົວເຮັດການຜະລິດກະສິກໍາເປັນສິນຄ້າ ທາງດ້ານການປູກ ແລະ ການລ້ຽງ ທີ່ເປັນຕົວແບບດ້ານການຜະລິດເປັນສິນຄ້າ ສາມາດສ້າງລາຍຮັບໃຫ້ແກ່ຄອບຄົວເປັນຈໍານວນຫຼາຍ.
(ຂ່າວ-ພາບ: ສະຫຼິງ ບຸນຍາວົງ)
