ສຳນັກຂ່າວຕ່າງປະເທດລາຍງານວ່າ ຜູ້ນຳກຸ່ມປະເທດອຸດສາຫະກຳຊັ້ນນຳ 7 ປະເທດ (G7) ຈະປະກາດແບ່ງປັນວັກແຊັງປ້ອງກັນໂຄວິດ-19 ໃຫ້ແກ່ປະເທດທຸກຍາກ ແລະ ປະເທດກຳລັງພັດທະນາ ໂດຍຜ່ານໂຄງການໂຄແວັກ.
ທ່ານ ບໍຣິສ ຈອນສັນ ນາຍົກລັດຖະມົນຕີອັງກິດ ກ່າວໃນລະຫວ່າງເຂົ້າຮ່ວມກອງປະຊຸມສຸດຍອດຜູ້ນຳ ຈີ 7 ຈັດຂຶ້ນທີ່ອັງກິດວ່າ ສະຫະຣາຊະອານາຈັກຈະບໍລິຈາກວັກແຊັງປ້ອງກັນໂຄວິດ-19 ຈຳນວນ 100 ລ້ານໂດສໃຫ້ແກ່ໂຄງການໂຄແວັກ ເພື່ອສົມທົບກັບສະຫະລັດອາເມຣິກາທີ່ ປະທານາທິບໍດີ ໂຈ ໄບເດັນໄດ້ປະກາດບໍລິຈາກວັກແຊັງປ້ອງກັນໂຄວິດຈຳນວນ 500 ລ້ານໂດສໄປແລ້ວນັ້ນ.
ຂະນະດຽວກັນນາຍົກລັດຖະມົນຕີອັງກິດ ຄາດການວ່າ ກຸ່ມປະເທດຈີ 7 ຈະຮ່ວມກັນບໍລິຈາກວັກແຊັງໃຫ້ແກ່ໂຄງການໂຄແວັກໃຫ້ໄດ້ 1 ພັນລ້ານໂດສ ເພື່ອຊ່ວຍເຫຼືອປະເທດທີ່ທຸກຍາກ ແລະ ປະເທດກຳລັງພັດທະນາ (ມີລາຍໄດ້ປານກາງ) ໃຫ້ສາມາດສ້າງພູມຄຸ້ມກັນໝູ່ໃຫ້ແກ່ປະຊາຊົນໄດ້ຢ່າງພຽງພໍ, ທັງນີ້ ຜູ້ນຳກຸ່ມ ຈີ7 ມີເປົ້າໝາຍຮ່ວມກັນເບື້ອງຕົ້ນ ໃຫ້ທົ່ວໂລກສັກວັກແຊັງປ້ອງກັນໂຄວິດ-19 ໃຫ້ແກ່ປະຊາຊົນຢ່າງທົ່ວເຖິງພາຍໃນປີ 2022.
