ເຈົ້າແຂວງ ຊີ້ 5 ເດືອນ ຕົ້ນປີ 2021 ເສດຖະກິດ ແຂວງອັດຕະປື ເຕີບໂຕ 3,8%

180

ໃນວັນທີ 10 ມິຖຸນາ 2021 ເນື່ອງໃນໂອກາດທີ່ທ່ານ ຄໍາພັນ ພົມມະທັດ ປະທານອົງການກວດສອບແຫ່ງລັດ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ໄດ້ເຄື່ອນໄຫວຢ້ຽມຢາມ ແລະ ພົບປະໂອ້ລົມພະນັກງານຫຼັກແຫຼ່ງແຂວງອັດຕະປື ໂດຍການຕ້ອນຮັບຂອງສະຫາຍ ເລັດ ໄຊຍະພອນ ເຈົ້າແຂວງໆອັດຕະປື ແລະ ມີບັນດາພະນັກງານຫຼັກແຫຼ່ງ ເປັນຕົ້ນແມ່ນເຈົ້າເມືອງ, ຫົວໜ້າພະແນກການອ້ອມຂ້າງແຂວງເຂົ້າຮ່ວມ.


ໂອກາດດັ່ງກ່າວ ທ່ານ ເລັດ ໄຊຍະພອນ ໄດ້ລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນ 5 ເດືອນຕົ້ນປີ 2021 ຊຶ່ງດ້ານເສດຖະກິດຂອງແຂວງອັດຕະປື ສືບຕໍ່ຂະຫຍາຍຕົວຕໍ່ເນື່ອງໃນລະດັບ 3,8%, ລາຍຮັບສະເລ່ຍ 14,7 ລ້ານກີບ, ໃນນັ້ນ, ຂະແໜງກະສິກຳ ແລະ ປ່າໄມ້ ກວມເອົາ 20,57% ຂອງ GDP, ຂະແໜງອຸດສາຫະກຳ ກວມເອົາ 35,3% ຂອງ GDP,ຂະແໜງ ບໍລິການກວມເອົາ 44,12% ຂອງ GDP, ດ້ານງົບປະມານ 5 ເດືອນຕົ້ນປີ ປະຕິບັດໄດ້ທັງໝົດ 89,36 ຕື້ກີບ ເທົ່າກັບ 67% ຂອງແຜນການປີ, ມູນຄ່າການສົ່ງອອກປະຕິບັດໄດ້ 64,79 ລ້ານໂດລາ ທຽບໃສ່ແຜນປີ ປະຕິບັດໄດ້ 48,77% ທຽບໃສ່ປີຜ່ານມາເພີ່ມຂຶ້ນ 19,70%, ວຽກງານຂົງເຂດວັດທະນະທຳ-ສັງຄົມ ຫຼາຍຂະແໜງການກໍໄດ້ຮັບການພັດທະນາ ແລະ ມີຜົນສໍາເລັດຕາມແຜນການ.

ໂອກາດດັ່ງກ່າວ ທ່ານ ຄຳພັນ ພົມມະທັດ ໄດ້ມີຄຳເຫັນໂອ້ລົມ ຊຶ່ງໄດ້ເນັ້ນໜັກໃຫ້ການນໍາ ແຂວງອັດຕະປື ເພີ່ມທະວີການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິ XI ຂອງອົງຄະນະພັກແຂວງ, ສຸມໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX, ແຕ່ປີ 2021-2025 ເພື່ອສ້າງຄວາມເຂົ້າໃຈ, ສ້າງຄວາມເປັນເອກະພາບ, ສ້າງການຫັນປ່ຽນດ້ານແນວຄິດຈິນຕະນາການ ແນໃສ່ສົ່ງເສີມດ້ານດີ, ແກ້ໄຂຈຸດອ່ອນ ຂໍ້ຄົງຄ້າງ ແລະ ສິ່ງທ້າທາຍຕ່າງໆ ເພື່ອສ້າງໄດ້ຜົນສໍາເລັດໃໝ່ໃນພາລະກິດປົກປັກຮັກສາ ແລະ ພັດທະນາປະເທດຊາດ,ເອົາໃຈໃສ່ດຶງດູດການລົງທຶນຂອງເອກະຊົນທັງພາຍໃນ ແລະ ຕ່າງປະເທດ, ຂຸດຄົ້ນທ່າແຮງບົ່ມຊ້ອນທີ່ເປັນທ່າແຮງຂອງແຂວງເຂົ້າໃນການພັດທະນາ, ກໍານົດການພັດທະນາພື້ນຖານໂຄງລ່າງ, ເສດຖະກິດ,ວັດທະນະທໍາ-ສັງຄົມ ແລະ ວຽກງານອື່ນໆຢ່າງມີຈຸດສຸມ, ຖືກທິດ ແລະ ຍືນຍົງ, ບໍາລຸງຍົກລະດັບພະນັກງານໃຫ້ມີຄວາມຮູ້ຄວາມສາມາດ, ຫັນພະນັກງານລົງກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ຊຸກຍູ້ການສ້າງບ້ານພັດທະນາຕາມ 4 ເນື້ອໃນ 4 ຄາດໝາຍ, ເພື່ອສ້າງບາດກ້າວບຸກທະລຸແກ້ໄຂຄວາມທຸກຍາກຂອງປະຊາຊົນ, ຊຸກຍູ້ສົ່ງເສີມການຜະລິດເປັນສິນຄ້າ ດ້ວຍການນໍາໃຊ້ເຕັກນິກວິທະຍາສາດ, ວິຊາການແບບໃໝ່ ເພື່ອຍົກສະມັດຖະພາບຂອງຜົນຜະລິດ, ປັບປຸງ ແລະ ກໍ່ສ້າງກໍາລັງປະກອບອາວຸດໃຫ້ມີຄວາມໜັກແໜ້ນ, ເຂັ້ມແຂງສາມາດປະຕິບັດໜ້າທີ່ປ້ອງກັນເວນຍາມ, ແກ້ໄຂບັນຫາປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມໃຫ້ຫຼຸດນ້ອຍຖອຍລົງ ແນໃສ່ສ້າງແຂວງອັດຕະປື ໃຫ້ມີສະຖຽນລະພາບທາງດ້ານການເມືອງຢ່າງໜັກແໜ້ນ, ປະຊາຊົນມີຄວາມສາມັກຄີປອງດອງ, ສັງຄົມມີຄວາມສະຫງົບ, ຍຸຕິທໍາ ແລະ ສີວິໄລ.

Slide
Slide
Slide

ເຈົ້າແຂວງ ຊີ້ 5 ເດືອນ ຕົ້ນປີ 2021 ເສດຖະກິດ ແຂວງອັດຕະປື ເຕີບໂຕ 3,8%