ໃນວັນທີ 2 ມິຖຸນາ 2021, ຢູ່ຫ້ອງປະຊຸມ ກອງບັນຊາການ ປກສ ນະຄອນຫຼວງວຽງຈັນ ທ່ານ ສົມໃຈ ພະພິທັກ ປະທານບໍລິສັດສີເມືອງ ກຣຸບ ໄດ້ມອບເຄື່ອງມື, ອຸປະກອນຮັບໃຊ້ໃນການປ້ອງກັນພະຍາດໂຄວິດ 19 ເຊິ່ງປະກອບມີ: ນໍ້າຢາລ້າງມື 2 ແກັດ ແລະ ຜ້າອັດປາກ ຈໍານວນ 5 ແກັດ ລວມມູນຄ່າຈໍານວນ 5 ລ້ານກີບ, ປະກອບສ່ວນຊຸກຍູ້ໃຫ້ ກໍາລັງ ປກສ ນວ ເຂົ້າຮັບໃຊ້ວຽກງານການເຄື່ອນໄຫວປ້ອງກັນຄວາມສະຫງົບ ໂດຍສະເພາະ ແມ່ນການປ້ອງກັນ, ສະກັດກັ້ນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ບໍ່ໃຫ້ແຜ່ລາມເປັນວົງກວ້າງ.
ຕາງໜ້າກ່າວຮັບໂດຍ ພັອ ສຸກພະຈັນ ບຸດດາຄໍາ ຫົວໜ້າກອງບັນຊາການ ປກສ ນວ ພ້ອມດ້ວຍຄະນະ. ການຊຸກຍູ້ຊ່ວຍເຫຼືອໃນຄັ້ງນີ້, ພັອ ສຸກພະຈັນ ບຸດດາຄໍາ ໄດ້ກ່າວສະແດງຄວາມຍ້ອງຍໍຊົມເຊີຍ ແລະ ຂອບໃຈ ຕໍ່ບໍລິສັດສີເມືອງ ກຣຸບ ທີ່ເຫັນໄດ້ຄວາມໝາຍ-ຄວາມສໍາຄັນ ຂອງວຽກງານປ້ອງກັນຄວາມສະຫງົບ ແລະ ຈະນໍາເອົາວັດຖຸປັດໄຈດັ່ງກ່າວ ແຈກຢາຍໃຫ້ເຫຼົ່າວິຊາສະເພາະທີ່ເຮັດວຽກງານຕົວຈິງ ເພື່ອປະຕິບັດໜ້າທີ່ໃນການຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ປອດໄພດີຂຶ້ນກວ່າເກົ່າ. ພ້ອມດຽວກັນ, ກໍໄດ້ມອບໃບຍ້ອງຍໍໃຫ້ບໍລິສັດສີເມືອງ ກຣຸບ ເພື່ອສະແດງຄວາມຮູ້ບຸນຄຸນ ທີ່ໄດ້ປະກອບສ່ວນໃນຄັ້ງນີ້.
