ພາມາຮູ້ຈັກ ND ຄົນໃຫມ່ ໃນເວທີ Miss Universe Laos  ເປັນໃຜມາແຕ່ໃສ

446

ບັນດາແຟນນາງງາມໃຜກໍ່ລຸ້ນເຕັມທີ່ຢາກຮູ້ວ່າໃຜຈະມາເຮັດໜ້າທີ່ເປັນ ປະທານໂຄງການປະກວດນາງງາມຈັກກະວານຂອງ ສປປ ລາວ ເພາະຢາກເຫັນການປ່ຽນແປງ ໂດຍສະເພາະການປະກວດທີ່ຈີງຈັງກ່ອນເດີນທາງສູ່ເວທີສາກົນ.

ຫຼ້າສຸດໄດ້ມີພິທີຖະແຫລງຂ່າວແຕ່ງຕັ້ງ ປະທານໂຄງການປະກວດ ມິສຢູນິເວີສລາວ (ND)ຄົນໃຫມ່ 2021-2022 ໃນວັນທີ 1 ມິຖຸນາ 2021 ນີ້ ໂດຍການປະກາດແຕ່ງຕັ້ງຢ່າງເປັນທາງການຈາກ ບໍລິສັດ Miss Laos ຈຳກັດ ທີ່ເປັນຜູ້ຖືລິຂະສິດ ເວທີ Miss Universe Laos ແຕ່ພຽງຜູ້ດຽວແຕ່ປີ 2017ເປັນຕົ້ນມາ ການປະກາດກາດແຕ່ງຕັ້ງ ND ຄົນໃຫມ່ນີ້ແມ່ນແຕ່ງຕັ້ງໃຫ້ ທ່ານນາງ ຈັນໂສ ຈິດຕິວົງ (ແພນ) ຜູ້ບໍລິຫານຮ້ານເພັດພະໄທ ຈິວເວີລີ ເປັນປະທານບໍລິຫານ ບໍລິສັດ ດີໂອເອັສຊິດ ແລະ ທຸລະກິດໃນເຄືອ ຂຶ້ນເປັນປະທານ ໂຄງການປະກວດ Miss Universe Laos ຄົນໃຫມ່ ແທນ ທ່ານ ໂພລິສິດ ບຸບຜາປະເສີດ ຫລື ແອຣອນ ປະທານໂຄງການປະກວດ Miss Universe Laos ຜູ້ເກົ່າ.

Slide
Slide
Slide

ທ່ານນາງ ຈັນໂສ ຈິດຕິວົງໄດ້ກ່າວໃນງານຖະແຫລງຂ່າວວ່າ: ການເປັນປະທານໂຄງການ Miss Universe Laos ເປັນຫນ້າທີ່ອັນຊົງກຽດ ຮູ້ສຶກປະທັບໃຈ ແລະ ພູມໃຈຫລາຍ ຕື່ນເຕັ້ນໄປພ້ອມກັນ ຍ້ອນວ່າເປັນອີກຫນຶ່ງບົດບາດທີ່ຍິ່ງໃຫຍ່ ກ່ອນອື່ນຕ້ອງຂໍຂອບໃຈມາຍັງ ບໍລິສັດ Miss Laos ທີ່ໃຫ້ໂອກາດ ໄດ້ເຮັດຫນ້າທີ່ບົດບາດນີ້ ຫລາຍທ່ານຮູ້ດີວ່າຟັງແຕ່ຊື່ກໍຍິ່ງໃຫຍ່ແລ້ວສຳລັບ ເວທີ Miss Universe ເປັນເວທີທີ່ໄດ້ຮັບຄວາມນິຍົມທົ່ວໂລກ ໂດຍສະເພາະປະເທດລາວເຮົາ ກໍໄດ້ຮັບຄວາມນິຍົມສູງສຸດເລີຍ ເອີ້ນໄດ້ວ່າເປັນທີ່ຈັບຕາຂອງສື່ມວນຊົນ ແລະ ແຟນນາງງາມຕ່າງໆ ບັນດານັກທຸລະກິດ ແລະ ຫນຶ່ງໃນນັ້ນແມ່ນໂຕຂ້າພະເຈົ້າເອງ ທີ່ເປັນຫນຶ່ງໃນແຟນນາງງາມ ແລະ ຕິດຕາມເວທີມາ ນັບຕັ້ງແຕ່ເລີ່ມປະກວດໃຫມ່ໆ ໃນປີ 2017.

ທີ່ຜ່ານມາໄດ້ພົວພັນກັບນ້ອງ Miss Universe ຫລາຍໆທ່ານ ແລະ ຮູ້ສຶກວ່າຜູ້ຍິງທີ່ຜ່ານເວທີນີ້ແມ່ນບໍ່ທຳມະດາ ເພາະທາງຮ້ານເພັດພະໄທ ຈິວເວລີ ກໍໄດ້ໃຫ້ນ້ອງ Miss Universe Laos ຄົນທຳອິດເປັນ ພີເຊັນເຕີ ແລະ ຮູ້ສຶກປະທັບໃຈ ພ້ອມກັບຮູ້ສຶກວ່າວົງການນາງງາມລາວຄວນໄດ້ຮັບການສະຫນັບສະຫນູນ ຮູ້ສຶກພາກພູມໃຈຫລາຍທີ່ໄດ້ມາເປັນສ່ວນຫນຶ່ງ ແລະ ຂໍສັນຍາວ່າຈະເຮັດ ໃຫ້ດີທີ່ສຸດ ຈະເອົາຄວາມສາມາດທີ່ມີ ແລະ ທີມງານທີ່ພວກເຮົາເລືອກມາເຮັດວຽກຮ່ວມກັນນີ້ ພວກເຮົາຈະເຮັດວຽກຢ່າງມີຄຸນນະພາບ ຮັບຟັງຄຳຕຳນິຕິຊົມຈາກຫລາຍໆພາກສ່ວນ ແລະ ນຳເອົາມາຖອດຖອນເປັນບົດຮຽນ, ປະທານໂຄງການປະກວດກ່າວ.

ທ່ານຍັງກ່າວອີກວ່າ: ຈຸດປະສົງຂອງການຄົ້ນຫາ Miss Universe ບໍ່ແມ່ນພຽງແຕ່ການຄົ້ນຫານາງງາມ ແຕ່ຕ້ອງເປັນຜູ້ທີ່ຄຸນນະວຸດ ພຽບພ້ອມ ແລະ ຮູ້ຈັກຮັກວັດທະນະທຳຮີດຄອງປະເພນີອັນດີຂອງປະເທດເຮົາ ເຊິ່ງທຸກຄົນຮູ້ກັນດີແລ້ວວ່າ ແມ່ຍິງລາວເປັນຄົນທີ່ມີຄວາມນອບນ້ອມງົດງາມຢູ່ແລ້ວ ວັດທະນະທຳລາວສວຍງາມ ແຕ່ວ່າເຮົາຢາກເຜີຍແຜ່ໃຫ້ໂລກໄດ້ຮູ້ຜ່ານຜູ້ຍິງທີ່ມີຄວາມເຂັ້ມແຂງກ້າຫານ ກ້າສະແດງອອກ ນອກຈາກເອົາສິ່ງດັ່ງກ່າວນີ້ໄປເຈີດຈະລັດຢູ່ສັງຄົມ ພ້ອມດຽວກັນນັ້ນ ມັນຈະສົ່ງເສີມດ້ານການທ່ອງທ່ຽວ ເຊິ່ງສອດຄ່ອງກັບທິດຊີ້ນຳຂອງພັກລັດ ທີ່ເພິ່ນໄດ້ສົ່ງເສີມຕະຫລອດມາ ດ້ານການທ່ອງທ່ຽວຂອງປະເທດເຮົາ ແລະ ສົ່ງເສີມບົດບາດຂອງຜູ້ຍິງລາວເຮົາ ເຊື່ອວ່າເວທີນີ້ຈະເປັນອີກເວຫນຶ່ງທີ່ເປັ່ງປະກາຍພາບຫລັກ ຂອງຜູ້ຍິງລາວ ແລະ ການທ່ອງທ່ຽວຂອງປະເທດເຮົາໃຫ້ຄົນທັ້ງໂລກກວ້າງຫລາຍຂຶ້ນຫລັງຈາກໂຄວິດຈົບລົງ.

ສຳລັບປີນີ້ ແມ່ນຈະມີການປະກວດຢ່າງແນ່ນອນ ສຳລັບຄອນເຊັບຂອງແມ່ຍິງທີ່ຈະໄປປະກວດໃນເວທີຈັກກະວານ ຕ້ອງມີຄວາມງົດງາມ ແລະ ເຈີດຈະລັດ ດ້ວຍເກນສຳລັບປີນີ້ແມ່ນໄດ້ມີການເປີດກວ້າງໃຫ້ແມ່ຍິງທຸກຄົນທີ່ມີຢູ່ໃນເກນ ຄື ຄວາມສູງ 163 ຊັງຕີແມັດຂຶ້ນໄປ, ອາຍຸ 18-27ປີ ສ່ວນເລື່ອງຂອງພາສາອັງກິດ ຢາກໃຫ້ນ້ອງໆເບິ່ງຂ້າມໄປກ່ອນ ໃຫ້ຕົນເອງໄດ້ພິສູດໃນເວທີນີ້ ຈາກທີ່ຜ່ານມານາງງາມໃນຫລາຍໆຫລາຍເວທີ ບັນດາປະເທດເຂົ້າຮອບເລິກ ເພີ່ນກໍບໍ່ໄດ້ເກັ່ງພາສາອັງກິດປານໃດ ດັ່ງນັ້ນ ໃນເວທີຕ່າງໆຈະມີນາຍແປໃຫ້ ປີນີ້ ກໍບໍ່ໄດ້ເຄັ່ງຄັດເລື່ອງຂອງພາສາອັງກິດວ່າຈະຕ້ອງເກັ່ງແທ້ ເກັ່ງວ່າ ໄດ້ສຳ່ໃດຫນຶ່ງກໍສາມາດເຂົ້າແຂ່ງຂັນທົດສອບກັນເບິ່ງໄດ້ ແລະ ໄລຍະຂອງການປະກວດທີມງານຈະແຈ້ງອີກເທື່ອຫນຶ່ງ.

ສຸດທ້າຍກໍຂໍຂອບໃຈແຟນນາງງາມທຸກຄົນ ຕົນເອງໄດ້ອ່ານທຸກຄອມເມັ້ນທຸກແຊ ທີ່ໄດ້ເບິ່ງ feedback ກໍເຫັນໄດ້ວ່າຫລາຍໆທ່ານທີ່ໄດ້ພົວພັນ ກໍໄດ້ຮັບກຳລັງໃຈທີ່ດີຫຼາຍ ທີ່ເປັນອີກແຮງພັກດັນຫນຶ່ງທີ່ເຮັດໃຫ້ຢາກທີ່ຈະຕັ້ງໃຈເຮັດວຽກ ຈາກທີ່ຕັ້ງໃຈຢູ່ແລ້ວ ຍັງໄດ້ສົ່ງເສີມໃຫ້ເຮົາຕັ້ງໃຈຈະເຮັດໃຫ້ດີທີ່ສຸດ ແລະ ຂໍຂອບໃຈ ເປັນກຳລັງໃຈໃຫ້ກັນຕໍ່ໄປ ນີ້ເປັນພຽງຈຸດເລີ່ມຕົ້ນ ຢາກໃຫ້ຝາກຕິດຕາມ ຜົນງານຂອງທີມງານພວກເຮົາ ແລະ ຢາກຝາກເຖິງແຟນນາງງາມ ຂໍຂອບໃຈແທນນາງງາມ Miss Universe Laos 2021ນີ້ ຂອບໃຈແທນ ຍັງບໍ່ຮູ້ວ່າຈະເປັນໃຜ ຝາກຕິດຕາມ ລຸ້ນເຊຍ ສະຫນັບສະຫນູນຄົນລາວນຳກັນ