ອາທິດທີ່ຜ່ານມານີ້ ທ່ານ ຄໍາແຍງ ຄອນໄຊຍະກິດ ເຈົ້າເມືອງໆ ຕົ້ນເຜິ້ງ, ແຂວງບໍ່ແກ້ວ ພ້ອມດ້ວຍຫ້ອງການທີ່ກ່ຽວຂ້ອງຂອງເມືອງ ໄດ້ລົງຕິດຕາມຄວາມຄືບໜ້າໂຄງການສຳປະທານດອນເຜິ້ງຄຳ ເພື່ອພັດທະນາເປັນເຂດການຄ້າ, ການທ່ອງທ່ຽວ ຕິດພັນກັບວັດທະນະທຳບັນດາເຜົ່າ ຂອງເມືອງຕົ້ນເຜິ້ງ ກໍຄືແຂວງ ບໍ່ແກ້ວ ເປັນຕົ້ນແມ່ນການວາງຜັງ ແລະ ຕັດເສັ້ນທາງ, ຜັງເຂດຕະຫຼາດ, ຮ້ານຄ້າ ແລະ ກິດຈະການອື່ນໆ.
ທ່ານ ຄຳເງິນ ແສນຄໍາລື ຕາງໜ້າກຸ່ມຜູ້ສຳປະທານດອນເຜິ້ງຄຳ ໄດ້ລາຍງານຕໍ່ທ່ານເຈົ້າເມືອງ ພ້ອມດ້ວຍຄະນະ ວ່າ: ພາຍຫຼັງໄດ້ເຊັນສັນຍາ ກັບອົງການປົກຄອງແຂວງ, ທ່ານ ແລະ ບັນດາຜູ້ສໍາປະທານກໍໄດ້ລົງມືສ້າງອາຄານຮ້ານຄ້າຈໍານວນໜຶ່ງ ພ້ອມທັງຈັດສັນທີ່ດິນໃຫ້ບັນດາຜູ້ປະກອບການຊາວຄ້າຂາຍພາຍໃນເມືອງເຊົ່າ ເພື່ອສ້າງເປັນຮ້ານຄ້າຂາຍເຄື່ອງປະເພດຕ່າງໆເຊັ່ນ: ເຄື່ອງຫັດຖະກຳ, ເຄື່ອງທີ່ລະນຶກ, ອາຫານ, ເຄື່ອງດື່ມ ແລະ ອື່ນໆ ທີ່ຕິດພັນກັບການທ່ອງທ່ຽວດ້ານວັດທະນາທຳ ທັງມີແຜນຈະດຶງດູດເອົາຄະນະທ່ອງທ່ຽວຈາກປະເທດເພື່ອນບ້ານໃກ້ຄຽງເຂົ້າມາທ່ອງທ່ຽວໃນເຂດດອນດັ່ງກ່າວ.
ແຕ່ຍ້ອນມີການແຜ່ລະບາດຂອງພະຍາດໂຄວິດ-19 ໃນຮອບນີ້ ຈຶ່ງເຮັດໃຫ້ໂຄງການພັດທະນາເຂດດອນຢຸດຊະງັກຊົ່ວຄາວ ເນື່ອງຈາກຢູ່ໃນໄລຍະປິດເມືອງເພື່ອເພີ່ມທະວີມາດຕະການປ້ອງກັນ ແລະ ສະກັດການແຜ່ລະບາດ ໂຄວິດ-19 ເຮັດໃຫ້ພາຫະນະທີ່ໃຊ້ເຂົ້າໃນການພັດທະນາເຊັ່ນ: ລົດຕ່າງດິນ, ຫີນ, ແຮ່, ຊາຍ ບໍ່ສາມາດສັນຈອນເຂົ້າ-ອອກພາຍໃນເມືອງ ກໍຄືເຂດດອນໄດ້ສະດວກຄືໄລຍະຜ່ານມາ ແລະ ຄວາມຫຍຸ້ງຍາກດ້ານອື່ນໆທີ່ເກີດຈາກການແຜ່ລະບາດຂອງພະຍາດໂຄວິດ-19 ໃນຮອບນີ້.
ຂ່າວ: ໜັງສືພິມບໍ່ແກ້ວ