ໜ່ວຍງານທີ່ເຮັດວຽກເພື່ອຜູ້ລີ້ໄພສຳລັບຊາວປາເລັດສະຕິນ ຂອງອົງກາສະຫະປະຊາຊາດ (ສປຊ) ໄດ້ຮ້ອງຂໍເງິນຊ່ວຍເຫຼືອສຸກເສີນຈຳນວນ 30 ລ້ານໂດລາສະຫະລັດ ເພື່ອນຳໄປຊື້ອາຫານການກິນ ໃຫ້ແກ່ຊາວປາແລັດສະຕິນທີ່ໄດ້ຮັບຜົນກະທົບຈາກການສູ້ຮົບລະຫວ່າງອິດສະຣາແອນກັບກຸ່ມຮາມາສ. ຂະນະທີ່ອາເມຣິກາຂັດຂວາງຂໍ້ຕົກລົງຢຸດຍິງຂອງຄະນະມົນຕີຄວາມໝັ້ນຄົງແຫ່ງ ສປຊ.
ສຳນັກງານບັນເທົາທຸກ ແລະ ຈັດຫາງນຂອງ ສປຊ ສຳລັບຜູ້ລີ້ໄພປາລາສະຕິນ ລະບຸວ່າ: ໄດ້ດຳເນີນການເພື່ອຂໍການຊ່ວຍເຫຼືອດ້ານມະນຸດສະທຳກັບບັນດາປະເທດ ລວມທັງອົງການຈັດຕັ້ງຕ່າງໆ ເພື່ອນຳມາຊ່ວຍເຫຼືອຜູ້ລີ້ໄພ ແລະ ຜູ້ທີ່ໄດ້ຮັບຜົນກະທົບຈາກການສູ້ຮົບລະຫວ່າງອິດສະຣາແອນ ແລະ ກຸ່ມຮາມາສ ໂດຍເງິນຊ່ວຍເຫຼືອສຸກເສີນດັ່ງກ່າວມີຄວາມຈຳປັນຢ່າງຍິ່ງໃນການຊ່ວຍເຫຼືອຊີວິດການເປັນຢູ່ຂອງພວກເຂົາ ອີກຢ່າງໜ້ອຍ 30 ວັນຂ້າງໜ້າ ເຊິ່ງຈະໄດ້ຈັດຊື້ອາຫານ, ນ້ຳ ລວມທັງການເບິ່ງແຍງສຸຂະນາໄມ ແລະ ອື່ນໆ.
ໃນຂະນະດຽວກັນກໍມີລາຍງານວ່າ ສະຫະລັດອາເມຣິກາໄດ້ຂັດຄ້ານຮ່າງມະຕິຂອງກອງປະຊຸມຄະນະມົນຕີຄວາມໝັ້ຄົງແຫ່ງສະຫະປະຊາຊດ (UNSC) ທີ່ຮຽກຮ້ອງໃຫ້ມີການຢຸດຍິງລະຫວ່າງອິດສະຣາແອນກັບກຸ່ມຮາມາສ ໂດຍໃຫ້ເຫດຜົນວ່າ ມະຕິດັ່ງກ່າວອາດເປັນການແຊກແຊງຄວາມພະຍາຍາມຂອງລັດຖະບານອາເມຣິກາທີ່ຈະຢຸດຕິຄວາມຮຸນແຮງທີ່ເກີດຂຶ້ນ, ຮ່າງມະຕິດັ່ງກ່າວຮ່າງໂດຍຝຣັ່ງ ໂດຍມີການຖົກຖຽງກັນຢ່າງດຸເດືອດໃນກອງປະຊຸມ UNSC ກ່ອນຈະຕີຕົກໄປ, ກ່ອນໜ້ານີ້ ອາເມຣິກາໄດ້ຂັດຂວາງຖະແຫຼງຂອງ UNSC ທີ່ຮຽກຮ້ອງໃຫ້ມີການຢຸດຍິງ ມາແລ້ວ 4 ຄັ້ງ.
ດ້ານຜູ້ແທນອາເມຣິກາປະຈຳ ສປຊ ລະບຸວ່າ: ອາເມຣິກາຈະບໍ່ສະໜັບສະໜູນຄວາມພະຍາຍາມໃດໆກໍຕາມທີ່ເຊື່ອວ່າ ເປັນສິ່ງຖ່ວງດຶງໃນຄວາມພະຍາຍາມຫຼຸດຄວາມຮຸນແຮງເຫດການດັ່ງກ່າວລົງ.
ສຳລັບສະຖານະການການສູ້ຮົບດັ່ງກ່າວ ຫຼ້າສຸດມີລາຍງານວ່າ: ໃນກາຊາມີຜູ້ເສຍຊີວິດ 227 ຄົນ, ໃນນັ້ນມີຜູ້ຍິງ ແລະ ເດັກນ້ອຍ 100 ຄົນ, ຂະນະທີ່ຊາວປາລາສະຕິນປະມານ 72 ພັນຄົນບໍ່ມີທີ່ຢູ່ອາໄສ, ສ່ວນຢູ່ອິດສະຣາແອນມີຜູ້ເສຍຊີວິດ 12 ຄົນ, ໃນນັ້ນມີເດັກນ້ອຍ 2 ຄົນ.
