ນ້ອມສົ່ງທີມແພດຊ່ຽວຊານຈີນກັບປະເທດ ຂອບໃຈທີ່ຢູ່ຄຽງຂ້າງຕະຫຼອດມາ

299

ນັບແຕ່ມີການລະບາດຂອງພະຍາດໂຄວິດ-19 ທາງການຈີນແມ່ນມີຄວາມເປັນຫ່ວງເປັນໃຍປະຊາຊົນລາວ ແລະໄດ້ສົ່ງທີມແພດມາຫຼາຍທີມພ້ອມອຸປະກອນການແພດເພື່ອມາຊ່ວຍເຫຼືອລາວຕີຕ້ານກັບສັດຕູໂຕຮ້າຍກາດນີ້ໃຫ້ໝົດໄປຈາກສັງຄົມລາວ ຄະນະຫຼ້າສຸດນີ້ໄດ້ໃຊ້ເວລາ 2 ອາທິດເຮັດວຽກຮ່ວມກັບບັນດາແພດໝໍຂອງລາວ ແລະໄດ້ໃຫ້ຄວາມຮູ້ວິຊາການຫຼາຍຢ່າງແກ່ທີມແພດລາວກ່ອນເດີນທາງກັບປະເທດໃນວັນທີ 18 ພຶດສະພາຜ່ານ.


ວັນທີ 18 ພຶດສະພາ ຜ່ານມາ, ຄະນະຊ່ຽວຊານການແພດ ທີ່ລັດຖະບານ ສປ ຈີນສົ່ງມາຊ່ວຍເຫຼືອ ສປປ ລາວຕ້ານພະຍາດ COVID-19 ໄດ້ສໍາເລັດໜ້າທີ່ ແລະ ເດີນທາງກັບຄືນປະເທດ ໂດຍມີ ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ແລະ ທ່ານ ຈ່ຽງຈ້າຍຕົ່ງ ເອກອັກຄະລັດຖະທູດຈີນປະຈຳລາວ ພ້ອມດ້ວຍຄະນະໄປທີ່ສະໜາມບິນສາກົນວັດໄຕ ນະຄອນຫຼວງວຽງຈັນ.

ຄະນະຜູ້ຊ່ຽວຊານການແພດຈີນຊຸດນີ້ປະກອບມີ 25 ທ່ານ ເຊິ່ງເປັນຊ່ຽວຊານດ້ານລະບາດວິທະຍາ, ການຂ້າເຊື້ອ, ກວດກາຈາກຫ້ອງກວດວິເຄາະ, ການຄຸ້ມຄອງການຕິດເຊື້ອ, ພະແນກມໍລະສຸມ ແລະ ອື່ນໆ.
ໃນເວລາ 2 ອາທິດ ທີ່ປະຕິບັດໜ້າທີ່ຢູ່ລາວ, ທີມງານດັ່ງກ່າວໄດ້ສໍາຫຼວດຄົ້ນຄວ້າຢູ່ໂຮງໝໍປິ່ນປົວ, ໂຮງໝໍພາກສະໜາມ, ຫ້ອງທົດລອງກວດພະຍາດ, ສະຖານທີ່ສັກຢາວັກຊີນ, ສະຖານທີ່ຈໍາກັດບໍລິເວນ ແລະ ອື່ນໆ ຫຼາຍກວ່າ 40 ໜ່ວຍງານ ເພື່ອເກັບກໍາຂໍ້ມູນພ້ອມແລກປ່ຽນຄໍາເຫັນທາງດ້ານວິຊາການກັບພາກສ່ວນທີ່ກ່ຽວຂ້ອງ; ໄດ້ຝຶກອົບຮົມວິຊາສະເພາະໃຫ້ແກ່ບຸກຄະລາກອນດ້ານການແພດ, ສາທາລະນະສຸກ ແລະ ຂະແໜງທີ່ກ່ຽວຂ້ອງຫຼາຍກວ່າ 20 ຄັ້ງ, ເປັນຕົ້ນແມ່ນການຄວບຄຸມການລະບາດຢູ່ໂຮງໝໍ, ການຈໍາແນກຄົນເຈັບອາການໜັກ ແລະ ອື່ນໆ.

Slide
Slide
Slide

ອີງຕາມການປຶກສາຫາລືແລກປ່ຽນຂໍ້ມູນ, ການລົງໄປເຄື່ອນໄຫວເຮັດວຽກຕົວຈິງກໍຄືຂໍ້ສະເໜີຂອງຝ່າຍລາວ, ປະສົມປະສານກັບບັນດາມາດຕະການ ແລະ ວິທີການຄວບຄຸມການລະບາດພະຍາດໂຄວິດ-19, ໄດ້ສ້າງເປັນ “ການແນະນໍາວຽກງານການຊ່ວຍເຫຼືອປິ່ນປົວຜູ້ຕິດເຊື້ອພະຍາດໂຄວິດ-19” ພ້ອມຄໍາແນະນໍາການປ້ອງກັນການຄວບຄຸມພະຍາດສະເພາະດ້ານລວມ 12 ສະບັບ ເພື່ອໃຫ້ຝ່າຍລາວພິຈາລະນາ. ນອກນັ້ນ, ທີມແພດຊ່ຽວຊານຈີນ ຍັງໄດ້ຢ້ຽມຢາມພ້ອມຝຶກອົບຮົມຢູ່ບັນດາໂຄງການຮ່ວມມືຂອງສອງປະເທດລາວ-ຈີນ ແລະ ວິສາຫະກິດຈີນຢູ່ລາວ ເພື່ອໂຄສະນາຄວາມຮູ້ທີ່ກ່ຽວຂ້ອງ ແລະ ອື່ນໆ.


ເພື່ອຍ້ອງຍໍຜົນງານອັນພົ້ນເດັ່ນໃນການປະກອບສ່ວນຊ່ວຍເຫຼືອວຽກງານສາທາລະນະສຸກຂອງລາວ, ກ່ອນເດີນທາງກັບຈີນ, ທາງການລາວໄດ້ມອບໃບຍ້ອງຍໍໃຫ້ແກ່ຄະນະຊ່ຽວຊານການແພດຈີນ 25 ທ່ານ, ໂດຍມີທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຂັ້ນສູນກາງເຂົ້າຮ່ວມເປັນສັກຂີພິຍານ ແລະ ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກເປັນຜູ້ມອບ.


ທ່ານ ກິແກ້ວ ໄຂຄໍາພິທູນ ໄດ້ຕີລາຄາສູງ ຕໍ່ການຊ່ວຍເຫຼືອຢ່າງທັນການຂອງ ສປ ຈີນໃນຄັ້ງນີ້ ກໍ່ຄືຫຼາຍຄັ້ງທີ່ຜ່ານມາ ໄດ້ສະແດງອອກຢ່າງຈະແຈ້ງທີ່ສຸດເຖິງຄວາມເປັນຫ່ວງເປັນໄຍ ແລະຄວາມເອົາໃຈໃສ່ຂອງ ພັກ, ລັດ ແລະປະຊາຊົນຈີນທີ່ມີຕໍ່ພັກ, ລັດ ແລະປະຊາຊົນລາວ ໃນຍາມທີ່ມີຄວາມຫຍຸ້ງຍາກທີ່ສຸດ. ພ້ອມກັນນີ້ຍັງສະແດງອອກແຈ້ງເຖິງຄວາມເປັນເພື່ອນມິດສະຫາຍອ້າຍນ້ອງທີ່ເປັນມູນເຊື້ອອັນຍາວນານ, ທັງເປັນຄູ່ຮ່ວມຍຸດທະສາດໝັ້ນຄົງຕາມທິດສີ່ດີ ໃນການເປັນຄູ່ຮ່ວມຊະຕາກຳສັງຄົມນິຍົມລາວ-ຈີນ, ຈີນ-ລາວ ເຊິ່ງໄດ້ຮັບການເສີມຂະຫຍາຍເຂົ້າສູ່ລວງເລິກຢ່າງບໍ່ຢຸດຢັ້ງ ທັງເປັນການປະກອບສ່ວນອັນສໍາຄັນເຂົ້າໃນການສະເຫຼີມສະຫຼອງວັນສ້າງຕັ້ງລະຫວ່າງການທູດຂອງສອງປະເທດຄົບຮອບ 60 ປີ ແລະ ປີນີ້ຍັງເປັນປີມິດຕະພາບລາວ-ຈີນ ຈີນ-ລາວນໍາອີກ.