ຍ້ອນການລະບາດຂອງພະຍາດລະບາດໂຄວິດ-19 ຢູ່ປະເທດເຮົາທີ່ຍັງບໍ່ສາມາດຄວບຄຸມໄດ້ເທື່ອໂດຍສະເພາະຢູ່ນະຄອນຫຼວງວຽງຈັນ ການລະບາດໃນຊຸມຊົນຍັງມີຢ່າງຕໍ່ເນື່ອງ ເຊິ່ງຕະຫຼາດໜອງຈັນຖືເປັນສູນການຊື້-ຂາຍແຫ່ງໜຶ່ງທີ່ມີຄົນມາຈັບຈ່າຍຊື້-ຂາຍການຫຼາຍທີ່ສຸດໃນແຕ່ລະວັນເຖິງແມ່ນຈະມີການລະບາດຂອງພະຍາດໂຄວິດ-19 ກໍ່ຕາມ ດັ່ງນັ້ນ, ເພື່ອຄວາມປອດໄພຂອງປະຊາຊົນ ພະແນກອຸດສາຫະກຳ ແລະການຄ້າ ນະຄອນຫຼວງວຽງຈັນຈິ່ງ ໃຫ້ໂຈະການຊື້-ຂາຍພຶດຜັກກະສິກຳໃນຕະຫຼາດນີ້ເປັນການຊົ່ວຄາວສາກ່ອນ.
ພະແນກ ອຸດສາຫະກຳ ແລະ ການຄ້າ, ນະຄອນຫຼວງວຽງຈັນ (ອຄ.ນວ) ອອກແຈ້ງການ ເລກທີ 0605/ອຄ.ນວ.ຄພນ, ລົງວັນທີ 15 ພຶດສະພາ 2021 ເຖິງຜູ້ອໍານວຍການ ບໍລິສັດລຽງເຮັງການຄ້າ ບໍລິການຈັດສັນຕະຫລາດ ຈຳກັດ ພ້ອມດ້ວຍຄະນະຮັບຜິດຊອບ ຈັດສັນຕະຫຼາດໜອງຈັນ, ນາຍບ້ານ ບ້ານໜອງຈັນ ທີ່ຄຸ້ມຄອງການຄ້າຂາຍ ນອກຕະຫຼາດໜອງຈັນ, ຫົວໜ້າຫ້ອງ ອຄ ເມືອງສີສັດຕະນາກ, ຊາວຄ້າຂາຍ ທີ່ເຂົ້າຂາຍເຄື່ອງຢູ່ໃນຕະຫຼາດຫນອງຈັນ (ສໍາລັບພາກເຊົ້າ), ປະຊາຊົນລາວບັນດາເຜົ່າ ທີ່ຈະໄປຊົມໃຊ້ການຊື້-ຂາຍຢູ່ໃນຕະຫຼາດໜອງຈັນ ເລື່ອງໃຫ້ໂຈະຊົ່ວຄາວກ່ຽວກັບການຈຳໜ່າຍພືດຜັກ, ໝາກໄມ້ ແລະ ສິນຄ້າບໍລິໂພກ ສຳລັບພາກເຊົ້າທີ່ເປີດເວລາ 5:30 ຫາ 8:30ໂມງ ຢູ່ໃນຕະຫຼາດໜອງຈັນ ແລະ ບໍລິເວນນອກຕະຫຼາດໜອງຈັນທີ່ໃກ້ກັນ.
ເພື່ອສືບຕໍ່ຈັດຕັ້ງປະຕິບັດມາດຕະການ ປ້ອງກັນ ຄວບຄຸມການແຜ່ລະບາດ ເຊື້ອພະຍາດໂຄວິດ-19 ແລະ ຫລີກເວັ້ນຄວາມສ່ຽງ ການຕິດເຊື້ອພະຍາດດັ່ງກ່າວ ຢູ່ໃນ ນວ, ພະແນກ ອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ຂໍຖືເປັນກຽດ ແຈ້ງມາຍັງບັນດາທ່ານຊາບດັ່ງນີ້:
1. ໃຫ້ໂຈະຊົ່ວຄາວ ກ່ຽວກັບການຈໍາໜ່າຍພືດຜັກ, ໝາກໄມ້ ແລະ ສິນຄ້າບໍລິໂພກ ຢູ່ໃນຕະຫຼາດໜອງຈັນ ແລະ ບໍລິເວນນອກຕະຫຼາດ ທີ່ບ້ານຄຸ້ມຄອງ ຕັ້ງຢູ່ບ້ານຫນອງຈັນ ເມືອງສີສັດຕະນາກ ນະຄອນຫຼວງວຽງຈັນ ສຳລັບພາກເຊົ້າ ໃນໄລຍະເວລາແຕ່ 5:30 ຫາ 8:30ໂມງ ນັບແຕ່ ວັນທີ 16 ພຶດສະພາ 2021 ເປັນຕົ້ນໄປ ຈົນກວ່າສະພາບການແຜ່ລະບາດເຊື້ອພະຍາດໂຄວິດ-19 ຢູ່ໃນ ນວ ຈະຜ່ອນຄາຍລົງ, ສໍາລັບບັນດາຫ້າງຮ້ານທີ່ເປີດບໍລິການແຕ່ 8:30 ໂມງເປັນຕົ້ນໄປ ແມ່ນໃຫ້ສືບຕໍ່ເປີດບໍລິການຄ້າຂາຍຕາມປົກກະຕິ ແຕ່ຕ້ອງຮັບປະກັນມາດຕະການປ້ອງກັນພະຍາດໂດວິດ-19.
2. ໃຫ້ສືບຕໍ່ຕິດຕາມທິດຊີ້ນໍາຂອງຄະນະສະເພາະກິດ ເພື່ອປ້ອງກັນ, ຕ້ານ ແລະ ສະກັດກັ້ນການແຜ່ລະບາດພະຍາດໂຄວິດ-19 ຕື່ມ ເພື່ອເປັນບ່ອນອີງໃນການພິຈາລະນາອະນຸຍາດໃຫ້ສືບຕໍ່ເປີດ ຫຼື ປີດ ການບໍລິການຄ້າຂາຍຢູ່ໃນສະຖານທີ່ດັ່ງກ່າວ.
3. ກ່ອນຈະເປີດການບໍລິການຄືນໃໝ່ ພະແນກ ອຄ.ນວ ແມ່ນຈະໄດ້ລົງສົມທົບກັບອໍານາດການປົກຄອງເມືອງ, ນາຍບ້ານ ແລະ ບໍລິສັດລຽງເຮັງການຄ້າ ບໍລິການຈັດສັນຕະຫລາດ ຈຳກັດ ພ້ອມດ້ວຍຄະນະຈັດສັນຕະຫຼາດໜອງຈັນ ຮ່ວມກັນວາງແຜນການຈັດສັນຢ່າງເປັນລະບົບ ໃຫ້ມີຄວາມສະອາດຈົບງາມ ເພື່ອຫຼີກເວັ້ນບໍ່ໃຫ້ມີຜູ້ຕິດເຊື້ອພະຍາດໂຄວິດ-19. ດັ່ງນັ້ນ, ຈຶ່ງໄດ້ແຈ້ງມາຍັງທ່ານເພື່ອຊາບ ແລະ ພ້ອມກັນຈັດຕັ້ງປະຕິບັດຕາມເນື້ອໃນຂ້າງເທິງນີ້ໃຫ້ໄດ້ຮັບຜົນດີ.
