ນ້ອງລິຊ່າ ໃນໄວ 7 ປີ ຜູ້ໂຊກຮ້າຍໃຈຄວາມໂຊກດີ ເມື່ອກ່ອນບໍ່ມີໃຜຮູ້ນ້ອງລີຊ່າແມ່ນໃຜ ແຕ່ຫຼັງນ້ອງຕິດໂຄວິດ-19 ແລະໄດ້ເປ້ກະເປົາໄປໂຮງໝໍຢ່າງໂດດດດ່ຽວ ເຮັດໃຫ້ຫຼາຍຄົນນ້ຳຕາໄຫຼ ແລະສົ່ງກຳລັງໃຈໃຫ້ນ້ອງຢ່າງລົ້ນຫຼາມ, ທຸກຄົນທີ່ເຫັນການປະກົດຕົວນ້ອງກໍຍັງຄົງໄດ້ຮັບກຳລັງໃຈຢ່າງຕໍ່ເນື່ອງບໍ່ມີປ່ຽນແປງ.
ເຊິ່ງລົດກູ້ໄພໄດ້ໄປຮັບນ້ອງມາປິ່ນປົວຢູ່ໂຮງໝໍເສດຖາທິຣາດ 19 ວັນຜ່ານໄປ ນ້ອງກໍໄດ້ກັບບ້ານຢ່າງປອດໄພ ໃນວັນທີ 13 ພຶດສະພາ 2021 ຜ່ານມາ ໂດຍແພດໝໍໄດ້ພ້ອມກັນສົ່ງນ້ອງກັບບ້ານພາຍຫຼັງປິ່ນປົວຫາຍດີ ແລະ ໃຫ້ກັບໄປກັກຕົວຢູ່ເຮືອນຕື່ມອີກ 14 ວັນ.
ຜູ້ເປັນແມ່ນ້ອງລິຊ່າ ໄດ້ໂພສຜ່ານເຟສບຸກຂອງຕົນວ່າ: ກ່ອນອື່ນຕ້ອງຂໍຂອບໃຈທາງພັກ-ລັດ ໂດຍສະເພາະກໍ່ຄືທາງແພດໝໍ ແລະ ຄະນະສະເພາະກິດທີ່ປະຈຳຢູ່ໂຮງໝໍເຊດຖາທິຣາດ ທີ່ເພິ່ນຮັບການປິ່ນປົວເບິ່ງແຍງດູແລຂ້າພະເຈົ້າ ແລະ ລູກສາວເປັນຍ່າງດີຕະຫຼອດໄລຍະເວລາ 19 ມື້, ຂອບໃຈທາງແພດໝໍ ແລະຄະນະສະເພາະກິດທຸກທ່ານທີ່ໄດ້ເອົາໃສ່ເສຍສະຫຼະເວລາສ່ວນຕົວຂອງພວກທ່ານເພື່ອມາປິ່ນປົວດູແລຄົນເຈັບ ເຊິ່ງກໍ່ຄືຂ້າພະເຈົ້າ ແລະ ລູກສາວ.
ຂໍຂອບໃຈອ້າຍເອື້ອຍລຸງປ້ານ້າອາທຸກໆຄົນທີ່ເປັນຫ່ວງເປັນໃຍຄອຍສົ່ງມາຖາມຂ່າວຄາວແລະໃຫ້ກຳລັງໃຈສອງແມ່ລູກເຮົາຕະຫຼອດມາ ( ເໝືອນດັ່ງຢາວິເສດອັນໜຶ່ງ ).
ມື້ນີ້ຖືວ່າເປັນມື້ດີຂອງສອງແມ່ລູກເຮົາທີ່ຈະໄດ້ກັບບ້ານ ແລະ ຈະປະຕິບັດຕາມຄຳແນະນຳຂອງແພດໝໍທຸກຢ່າງໂດຍສະເພາະກໍ່ຄືຕ້ອງໄດ້ກັກໂຕຢູ່ເຮືອນຕື່ມອີກເປັນເວລາ 14 ວັນ ແລະ ຂໍໃຫ້ຄົນເຈັບທີ່ກຳລັງຮັບການປິ່ນປົວໃຫ້ຊ່ວງເຊົາຈາກພະຍາດໂຄວິດ-19 ໂດຍໄວ.