ປະຊາຄົມໂລກ ພວມມີຄວາມວິຕົກກັງວົນທີ່ສຸດຕໍ່ສະພາບການໃຊ້ຄວາມຮຸນແຮງ ລະຫວ່າງ ອິດສະຣາແອນ ແລະ ປາແລັດສະຕິນ ຢູ່ ເຢຣູຊາແລມ ຕາເວັນອອກ ແລະ ເຂດກາຊາ ທີ່ພວມຢູ່ໃນລະດັບເຄັ່ງຕຶງທີ່ສຸດໃນຊຸມປີມໍ່ໆມານີ້, ອັນໄດ້ເຮັດໃຫ້ປະຊາຊົນຫຼາຍຄົນເສຍຊີວິດ.
ວັນທີ 12 ພຶດສະພາ, ທ່ານປະທານາທິບໍດີ ລັດເຊຍ ວະລາດີເມຍ ປູຕິນ ແລະ ຄູ່ຕຳແໜ່ງ ຕວັກກີ ຕາຢິບ ເອດູກັນ ໄດ້ຮຽກຮ້ອງໃຫ້ຫຼຸດຜ່ອນບັນດາການເຄື່ອນໄຫວໃຊ້ຄວາມຮຸນແຮງທີ່ນອງເລືອດ ລະຫວ່າງ ອິດສະຣາແອນ ແລະ ຊາວ ປາແລັດສະຕິນ. ໂດຍຮຽກຮ້ອງໃຫ້ຜັນຂະຫຍາຍກຳລັງຮັກສາສັນຕິພາບສາກົນ ໄປຍັງເຂດເກີດການປະທະກັນໃນປັດຈຸບັນ ເພື່ອປົກປ້ອງຊາວ ປາແລັດສະຕິນ.
ໃນວັນດຽວກັນ, ທ່ານ ມິເຊລ ຄາເຣັດ ປະທານສະພາເອີຣົບ ກໍໄດ້ສະແດງຄວາມວິຕົກກັງວົນຕໍ່ສະພາບການດັ່ງກ່າວ ແລະ ຮຽກຮ້ອງໃຫ້ ອິດສະຣາແອນ ແລະ ປາແລັດສະຕິນ ຈົ່ງຢຸດຕິສົງຄາມ ແລະ ຫຼີກລ່ຽງການກໍ່ຄວາມລົ້ມຫາຍຕາຍຈາກໃຫ້ແກ່ສາມັນຊົນ ເຊັ່ນດຽວກັນ.
ໂຄສົກຂອງທ່ານກູເຕີເຣສ ເລຂາທິການໃຫຍ່ອົງການສະຫະປະຊາຊາດໄດ້ຖະແຫຼງຂ່າວກ່ຽວກັບເຫດການທີ່ເກີດຂຶ້ນຢູ່ເຢຣູຊາແລມວ່າ: ທ່ານກູເຕີເຣສໄດ້ສະແດງຄວາມເປັນຫ່ວງຢ່າງເລິກເຊິ່ງຕໍ່ເຫດການທີ່ເກີດຂຶ້ນຢູ່ພາກຕາເວັນອອກຂອງເຢຣູຊາແລມ ກໍຄືຄວາມເປັນໄປໄດ້ທີ່ຄອບຄົວຊາວປາແລັດສະຕີນຈະຖືກຂັບໄລ່ອອກຈາກບ້ານເກີດຂອງຕົນ. ທ່ານກູເຕີເຣສທວງໃຫ້ອິດສະຣາແອນປະຕິບັດຕາມພັນທະໜ້າທີ່ທີ່ໄດ້ກຳນົດໄວ້ໃນກົດໝາຍວ່າດ້ວຍສິດທິມະນຸດ ແລະມະນຸດສະທຳສາກົນ, ຢຸດຕິການຮື້ຖອນ ແລະຂັບໄລ່ປະຊາຊົນປາແລັດສະຕີນອອກຈາກເຮືອນ.
ທ່ານກູເຕີເຣສກ່າວຢ້ຳອີກວ່າ: ໂດຍຜ່ານກົນໄກ 4 ຝ່າຍກ່ຽວກັບບັນຫາຕາເວັນອອກກາງ ເຊັ່ນ: ສະຫະພາບເອີຣົບ, ຣັດເຊຍ, ອາເມຣິກາ ແລະອົງການສປຊ, ອົງການສປຊຈະສະໜັບສະໜູນໃຫ້ປະຊາຊົນປາແລັດສະຕີນ ແລະອິດສະຣາແອນແກ້ໄຂບັນຫາການປະທະກັນບົນພື້ນຖານມະຕິທີ່ກ່ຽວຂ້ອງຂອງອົງການສປຊ, ກົດໝາຍສາກົນ ແລະ ສັນຍາສອງຝ່າຍ.
