ຕະຫຼາດປາກຊັນ ແຂວງບໍລິຄຳໄຊຈາກທີ່ເຄີຍຊື້ຂາຍຄືກຄື້ນ ດຽວນີ້ມີແຕ່ຄົນຂາຍບໍມີຄົນມາຊື້ ເຊິ່ງໃນທາງການຄ້າຂາຍແມ່ນບໍດີແນ່ນອນ ແຕ່ຂໍ້ດີຄືປະຊາຊົນມີຄວາມຕື່ນຕົວສູງໃນການຮັກສາໄລຍະຫ່າງທາງສັງຄົມ ບໍ່ອອກໄປຈັບຈ່າຍໃຊ້ສອຍຄືປົກກະຕິ ຕາມລາຍງານຂ່າວໃນວັນທີ 4 ພຶດສະພານີ້ ຢູ່ຕະຫຼາດປາກຊັນໃໝ່ ທ່ານ ຄອນສະຫວັນ ສຸກຂະເສີມ ຮອງຫົວໜ້າພະແນກອຸດສະຫະກຳ-ການຄ້າແຂວງ ພ້ອມດ້ວຍຫົວໜ້າຂະແໜງການຄ້າພາຍໃນ ແລະ ເຈົ້າໜ້າທີ່ກວດກາສິນຄ້າແຂວງ-ເມືອງປາກຊັນ ໄດ້ລົງຕິດຕາມການເໜັງຕີງຂອງລາຄາສິນຄ້າປະເພດຕ່າງໆຢູ່ຕະຫຼາດ.
ທ່ານ ຄອນສະຫວັນ ສຸກຂະເສີມ ໄດ້ໃຫ້ຮູ້ວ່າ: ໃນໄລຍະການປ້ອງກັນ, ຄວບຄຸມ ແລະ ແກ້ໄຂ ການລະບາດພະຍາດໂຄວິດ-19 ທາງຄະນະສະເພາະກິດຂອງຂະແໜງການຄ້າ ໄດ້ລົງເຄື່ອນໄຫວໂຄສະນາໃຫ້ບັນດາຮ້ານຄ້າ, ຮ້ານຂາຍເຄື່ອງໃນຂອບເຂດເທດສະບານແຂວງເອົາໃຈໃສ່ປະຕິບັດຕາມມະຕິຄຳສັ່ງ, ແຈ້ງການຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະ ຕ້ານການລະບາດພະຍາດໂຄວິດ-19, ໂດຍສະເພາະໄດ້ລົງເຜີຍແຜ່ແຈ້ງການດ່ວນຂອງພະແນກອຸດສາຫະກຳ ແລະ ການຄ້າແຂວງ ໃຫ້ເພີ່ມທະວີຄວາມເຂັ້ມງວດ ໃນການປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດຂອງເຊື້ອພະຍາດດັ່ງກ່າວໃນຂອບເຂດທົ່ວແຂວງ.
ເພື່ອເປັນການຜັນຂະຫຍາຍເນື້ອໃນຈິດໃຈແຈ້ງການຂອງລັດຖະບານ, ກະຊວງ ແລະ ຂອງແຂວງວາງອອກ ໂດຍສະເພາະຄຸ້ມຄອງລາຄາສິນຄ້າ ແນະນຳໃຫ້ແມ່ຄ້າຊາວຂາຍ, ຮ້ານຄ້າຕ່າງໆ ໃຫ້ມີຈຸດບໍລິການເຈວລ້າງມື, ໃສ່ຜ້າອັດປາກ-ດັງພ້ອມນີ້ ຍັງເປັນການລົງຕິດຕາມລາຄາສິນຄ້າ, ປະລິມານສິນຄ້າຕາມທ້ອງຕະຫຼາດ ບໍ່ໃຫ້ມີການເໜັງຕີງຈາກລາຄາເດີມ.
ພາຍຫຼັງອອກແຈ້ງການແລ້ວ ກໍໄດ້ລົງແຈກຢາຍຕາມຮ້ານຄ້າຕ່າງໆ ແລະ ເຜີຍແຜ່ລຸລ່ວງໃຫ້ຮັບຮູ້ຢ່າງທົ່ວເຖິງ, ພະແນກ ອຸດສາຫະກຳ ແລະການຄ້າ ແຂວງ ໄດ້ສົບທົບກັບຫ້ອງການອຸດສາຫະກຳ ແລະການຄ້າເມືອງ ລົງຕິດຕາມກວດກາສະພາບລາຄາສິນຄ້າຢູ່ຕະຫຼາດຢ່າງໃກ້ຊິດ ໃນນັ້ນມາຮອດປະຈຸບັນເຫັນໄດ້ວ່າການຊື່-ຂາຍຢູ່ໃນທ້ອງຕະຫຼາດລຸດລົງ 70%, ສາເຫດຍ້ອນປະຊາຊົນປະຕິບັດຕາມແຈ້ງການປິດບ້ານ, ປິດເມືອງ, ປິດແຂວງໃນຂອບເຂດທົ່ວປະເທດ ແລະ ບັນດາຮ້ານຄ້າສ່ວນຫຼາຍແມ່ນໄດ້ປິດໃຫ້ບໍລິການ, ເຊິ່ງສ່ວນໃຫຍ່ປະຊາຊົນຈະອອກມາຊື້ພຽງແຕ່ສິນຄ້າເຄື່ອງໃຊ້ທີ່ຈຳເປັນເທົ່ານັ້ນ ກໍເລີຍເຮັດໃຫ້ບັນຍາກາດການຊື້-ຂາຍໃນໄລຍະການລັອກດາວບໍ່ຄຶກຄື້ນ.
ຂ່າວຈາກ: ໜັງສືພິມບໍລິຄຳໄຊ
