ຄະນະສະເພາະກິດ ກຽມໂຮງໝໍສະໜາມຢູ່ນະຄອນຫຼວງວຽງຈັນເພີ່ມ ຮອງຮັບກໍລະນີຜູ້ຕິດເຊື້ອຍັງເພີ່ມຂຶ້ນ ແລະ ຝຶກພະນັກງານທີ່ຈະປະຈຳໂຮງໝໍດັ່ງກ່າວ, ພ້ອມນີ້ຍັງກຽມທີມແພດໝໍເສີມ (ທ່ານໝໍເດັກ,ໝໍປະສູດ, ສະເພາະທາງ ຫູ ດັງ ຄໍ ແລະ ອື່ນໆ)ເປັນກຳລັງສຳຮອງ.
ທ່ານ ດຣ. ນາງ ບົວເທບ ພູມິນ ຮອງຫົວໜ້າກົມປິ່ນປົວ ແລະ ຟື້ນຟູໜ້າທີ່ການ ກະຊວງສາທາລະນະສຸກ ໄດ້ລາຍງານກ່ຽວກັບການຄຸ້ມຄອງ ປິ່ນປົວ ຜູ້ຕິດເຊື້ອໂຄວິດ-19 ໃນການຖະແຫຼງຂ່າວວັນທີ 1 ພຶດສະພາ 2021 ກ່ຽວກັບການກະກຽມ ສາຍງານປິ່ນປົວ ເຊິ່ງກະກຽມຢູ່3ດ້ານຄືຶຶຶ:
ການກະກຽມທາງດ້ານສະຖານທີ່ ມີໂຮງໝໍ ມິດຕະພາບ ໂຮງໝໍເສດຖາ ແລະ ໂຮງໝໍກອງທັບ 103 ລວມທັງໝົດມີ 216 ຕຽງ (ເລີ່ມຕົ້ນແມ່ນກຽມກໍລະນີຜູ້ມີອາການເບົາບາງ-ໜັກ) ແຕ່ປັດຈຸບັນການແຜ່ລະບາດທີ່ມີຕົວເລກສູງຂຶ້ນທຸກມື້ ໂຮງໝໍທີ່ກ່າວມາແມ່ນຈະໄດ້ຖືກໃຊ້ງານໃນກໍລະນີຄົນເຈັບປານກາງ-ໜັກ.
ເນື່ອງຈາກສະພາບຜູ້ຕິດເຊື້ອທີ່ມີຕົວເລກສູງຂຶ້ນປັດຈຸບັນໂຮງໝໍແມ່ນບໍ່ສາມາດຮອງຮັບຄົນເຈັບໄດ້ (ລົ້ນໂຮງໝໍ) ຈຶ່ງໄດ້ມີການກະກຽມໂຮງໝໍພາກສະໜາມຄື: ສູນກິລາບານເຕະແຫ່ງຊາດ ຫ້ວຍຫົງ ຮັບໄດ້ 150 ຄົນ (ປັດຈຸບັນໃຊ້ງານ); ສູນສະໜາມຍິງປືນກອງທັບຫຼັກ 27 ຮັບໄດ້ 300-500 ຕຽງ; ສູນກິລາໃນຮົ່ມລ້ານຊ້າງ ຮັບໄດ້ ປະມານ 300 ຕຽງ (ຄາດວ່າວັນຈັນຈະເປີດໃຊ້); ສະໜາມລາແຫ່ງຊາດຫຼັກ 16 ຮອງຮັບໄດ້ປະມານ 500 ຕຽງ; ໂຮງແຮມດອນຈັນ ຮັບໄດ້ປະມານ 250 ຕຽງ. ຍັງບໍ່ພໍເທົ່ານີ້ຍັງມີການກະກຽມສະຖານທີ່ອື່ນໄວ້ໃນກໍລະນີຕົວເລກສູງຂຶ້ນ.
ການກະກຽມບຸກຄະລາກອນ ແມ່ນກະກຽມມາແຕ່ປີ 2020 ໂດຍຝຶກໃຫ້ທີມຫຼັກສູນກາງ 650 ທ່ານ ແລະ ຕ່າງແຂວງ 17 ແຂວງ 425 ທ່ານ; ນອກນີ້ຍັງກຽມໃຫ້ທີມເສີມ(ທ່ານໝໍເດັກ ທ່ານໝໍປະສູດ ທ່ານໝໍສະເພາະທາງ ຫູ ດັງ ຄໍ ແລະ ອື່ນໆ) ມາຮອງຮັບ ແລະ ກຽມເປັນກຳລັງສຳຮອງ ຢູ່ສູນກາງ 240 ທ່ານ ແລະ ຢູ່ແຂວງ 466 ທ່ານ
ນອກນີ້ຍັງກະກຽມທີມການຄວບຄຸມ ບໍ່ໃຫ້ເຊື້ອແຜ່ກະຈາຍໃນວົງກວ້າງໄດ້ມີການຝຶກອົບຮົມທົ່ວປະເທດໃຫ້ໄດ້ແບບມືອາຊີບ 263 ທ່ານ; ທີມຄຸ້ມຄອງກໍລະນີອາການໜັກ ແບ່ງອອກເປັນ 3 ພາກ ເໜືອ ກາງ ໃຕ້ ໄດ້ທັງໝົດ 80 ທ່ານ
ສ່ວນການກະກຽມທາງອຸປະກອນການແພດ ແມ່ນໄດ້ກະກຽມມາແຕ່ປີ2020 ເຊິ່ງໄດ້ແຈກຢາຍໄປທົ່ວທຸກໂຮງໝໍເມືອງແລ້ວ.
ອິງຕາມຈຳນວນຜູ້ຕິດເຊື້ອທີ່ເພີ່ມຂຶ້ນ ປັດຈຸບັນໄດ້ຝຶກໃຫ້ພະນັກງານທີ່ຈະປະຈຳໂຮງໝໍພາກສະໜາມເຊິ່ງໄດ້150-200ຄົນ ເຊິ່ງເຮົາຍັງສືບຕໍ່ຝຶກໄປຈົນຄົບ.
ສະໜັບສະໜູນຂ່າວໂດຍ: