30 ເມສາ 2021 ລາວ ມີຜູ້ຕິດເຊື້ອ +85 ຄົນ ລວມຕົວເລກສະສົມ 757 ຄົນ

246

ຕົວເລກຜູ້ຕິດເຊື້ອ ໂຄວິດ-19 ໃນ ສປປ ລາວ ແມ່ນນັບມື້ນັບເພີ່ມຂຶ້ນ ມາຮອດໃນວັນທີ 30 ເມສາ 2021 ກວດພົບຜູ້ຕິດເຊື້ອເພີ່ມອີກ 85 ຄົນ, ໃນນັ້ນ: ຢູ່ນະຄອນຫຼວງວຽງຈັນ 69 ຄົນ; ຈຳປາສັກ 1 ຄົນ; ແຂວງວຽງຈັນ 2 ຄົນ; ບໍ່ແກ້ວ 7 ຄົນ; ໄຊຍະບູລີ 2 ຄົນ, ສະຫວັນນະເຂດ 3 ຄົນ ແລະ ອຸດົມໄຊ 1 ຄົນ ເຮັດໃຫ້ຕົວເລກຜູ້ຕິດເຊື້ອສະສົມທົ່ວປະເທດ 757 ຄົນ.


ໃນວັນທີ 30 ເມສາ ປີ 2021 ທ່ານ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ; ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ພ້ອມດ້ວຍ ຕາງໜ້າກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ໄດ້ຖະແຫຼງຂ່າວປະຈຳວັນ


ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ໄດ້ກ່າວວ່າ: ການເຝົ້າລະວັງ ໂຄວິດ-19 ຢູ່ ສປປ ລາວ ວຽກງານຈຸດຜ່ານແດນ ແລະ ດ່ານສາກົນ ໃນວັນທີ 29 ເມສາ 2021 ມີຜູ້ເດີນທາງເຂົ້າມາ ສປປ ລາວ ທັງໝົດ ຈຳນວນ 2.620 ຄົນ; ໃນນັ້ນ ຈຸດຜ່ານດ່ານຊາຍແດນ ລາວ – ໄທ 1.468 ຄົນ, ຈຸດຜ່ານດ່ານລາວ-ຈີນ 19 ຄົນ, ລາວ-ຫວຽດນາມ 983 ຄົນ ແລະ ຜ່ານສະໜາມບິນສາກົນວັດໄຕ ຈຳນວນ 150 ຄົນ. ມາຮອດປະຈຸບັນ ລາວເຮົາມີສູນກັກບໍລິເວນທັງໝົດ 57 ສູນ ແລະ ມີຜູ້ຈຳກັດບໍລິເວນທັງໝົດ 3.756 ຄົນ, ທຸກຄົນແມ່ນໄດ້ເກັບຕົວຢ່າງມາກວດວິເຄາະຫາເຊື້ອພະຍາດ ໂຄວິດ-19.


ໃນວັນທີ 29 ເມສາ 2021 ໄດ້້ເກັບຕົວຢ່າງມາກວດທັງໝົດ 4.841 ຕົວຢ່າງ ຜົນກວດພົບຜູ້ຕິດເຊື້ອ 85 ຄົນ; ໃນນັ້ນ ຢູ່ນະຄອນຫຼວງວຽງຈັນ 69 ຄົນ, ຈຳປາສັກ 1 ຄົນ, ແຂວງວຽງຈັນ 2 ຄົນ, ບໍ່ແກ້ວ 7 ຄົນ, ໄຊຍະບູລີ 2 ຄົນ, ສະຫວັນນະເຂດ 3 ຄົນ ແລະ ອຸດົມໄຊ 1 ຄົນ ເຮັດໃຫ້ຕົວເລກຜູ້ຕິດເຊື້ອສະສົມທົ່ວປະເທດ 757 ຄົນ.

Slider

ໃນນີ້ມີຜູ້ເສຍຊີວີດ, ປິ່ນປົວຫາຍດີ 51 ຄົນ,  ຍັງນອນຕິດຕາມປິ່ນປົວຢູ່ສະຖານທີ່ປິ່ນປົວຢູ່ສະຖານທີ່ທີ່ຄະນະສະເພາະກິດກຳນົດໄວ້ ຈຳນວນ 706 ຄົນ.ລາຍລະອຽດດັ່ງນີ້:ນະຄອນຫຼວງວຽງຈັນ 508 ຄົນ (ໃໝ່ 69), ແຂວງຈຳປາສັກ 93 ຄົນ (ໃໝ່ 1), ສຳລັບຄົນເຈັບແຂວງເຊກອງ ແມ່ນ ນອນປິ່ນປົວຢູ່ແຂວງຈຳປາສັກ, ແຂວງສະຫວັນນະເຂດ 25 ຄົນ (ໃໝ່ 3), ແຂວງບໍ່ແກ້ວ 31 ຄົນ (ໃໝ່ 7), ແຂວງສາລະວັນ 5 ຄົນ, ແຂວງອຸດົມໄຊ 4 ຄົນ (ໃໝ່ 1), ແຂວງຫຼວງນ້ຳທາ 6 ຄົນ, ແຂວງວຽງຈັນ 10 ຄົນ (ໃໝ່ 2) (ຄົນເຈັບຂອງແຂວງວຽງຈັນ1 ຄົນມາປີ່ນປົວໃນ ນະຄອນຫຼວງວຽງຈັນ, ຜົ້ງສາລີ 3 ຄົນ,ແຂວງຫຼວງພະບາງ 14 ຄົນ, ແຂວງໄຊຍະບູລີ 3 ຄົນ (ໃໝ່ 2),ແຂວງບໍລິຄຳໄຊ 2 ຄົນ,ແຂວງຄຳມ່ວນ 1 ຄົນ, ແຂວງຊຽງຂວາງ 1 ຄົນ; ຄົນເຈັບທຸກຄົນ ແມ່ນມີສຸຂະພາບຮ່າງກາຍ ແລະ ສຸຂະພາບຈິດ ສົມບຸນ ປົກກະຕິ ແລະ ທຸກຄົນແຂງແຮງດີ.

ນອກຈາກນີ້ ຂໍຮຽກຮ້ອງມາຍັງບັນດາທ່ານທີ່ມີລາຍຊື່ຂ້າງລຸ່ມທີ່ໄດ້ໄປເກັບຕົວຢ່າງກວດວິເຄາະຫາເຊື້ອພະຍາດ COVID-19 ໃນນະຄອນຫຼວງວຽງຈັນທີ່ໃຫ້ຂໍ້ມູນບໍ່ລະອຽດແມ່ນໃຫ້ຮີບຮ້ອນໂທປະສານຫາ ທ່ານ ດຣ. ນາງ ວຽງສາຄອນ ຫຼວງປະດິດ ເບີໂທ 020 94095533 ແລະ ເບີ 020 55663579 ລາຍຊື່ລະອຽດຄື:ທ້າວໂລ້ ຈັນທະພູມ ອາຍຸ 27 ປີ; ທ້າວ ມີນຕາ ອາຍຸ 23 ປີ; ນາງນົກແກ້ວ ອາຍຸ 18 ປີ; ທ້າວ ວຽງໄຊ ຢູ່ບ້ານຍອດອູ ເມືອງຍອດອູ ແຂວງ ຜົ້ງສາລີ.


ໃຫ້ບຸກຄົນດັ່ງກ່າວຈົ່ງຮີບຮ້ອນໂຕໂທກັບເບີດັ່ງກ່າວ ຫຼື ແຈ້ງຕໍ່ອຳນາດການປົກຄອງບ້ານຂອງທ່ານເພື່ອຕິດຕໍ່ຫາພະນັກງານແພດໝໍດ່ວນ, ຖ້າຫາກທ່ານໃດຮັບຮູ້ແລ້ວບໍ່ຮີບຮ້ອນມາສະເໜີໂຕ ຫຼື ຈົງໃຈລົບຫຼີກແມ່ນຈະຖືກປະຕິບັດລະບຽບວິໄນຕາມກົດໝາຍບ້ານເມືອງ.

ສະໜັບສະໜູນຂ່າວໂດຍ