ບໍ່ລອງບໍ່ຮູ້! 6ວິທີ ເພື່ອກ້າວສູ່ຄວາມສໍາເລັດ

338

ທ່ານເຄີຍຖາມຕົວເອງແນ່ບໍ່ວ່າ ຕອນນີ້ ທ່ານໄດ້ເຮັດຕາມຄວາມຝັນຂອງຕົນເອງ ຫຼື ສິ່ງທີ່ຕັ້ງໃຈໄວ້ແລ້ວບໍ່, ທ່ານປະສົບຄວາມສໍາເລັດແລ້ວບໍ່ ແຕ່ທັງນີ້ທັງນັ້ນກໍມີຄົນຈໍານວນບໍ່ໜ້ອຍທີ່ກ້າວໄປຮອດຈຸດນັ້ນໄດ້ ແລະ ກໍ່ມີຄົນຈໍານວນບໍ່ໜ້ອຍເຊັ່ນກັນທີ່ລົງມືແລ້ວແຕ່ໄປບໍ່ຮອດຝັ່ງ ລົ້ມເເຫຼວກາງທາງ ເຮັດໃຫ້ສູນເສຍໂອກາດຄັ້ງສໍາຄັນໄປ.

ແນວໃດກໍ່ຕາມ ອີກຄໍາຖາມໜຶ່ງທີ່ຜູ້ຂຽນຢາກຖາມໃນມື້ນີ້ຄື ທ່ານເຄີຍສົງໄສບໍ່ວ່າຄົນທີ່ປະສົບຄວາມສໍາເລັດ ພວກເຂົາມີແນວຄິດແບບໃດ, ໃຊ້ຊີວິດແບບໃດ ແຕກຕ່າງຈາກຄົນທົ່ວໄປບໍ່;ມື້ນີ້ຜູ້ຂຽນໄດ້ຮິບໂຮມເອົາຂໍ້ຄິດທີ່ຈະພາໃຫ້ທ່ານກ້າວສູ່ເປົ້າໝາຍທີ່ວາງໄວ້.

Slider

1 ປ່ຽນກິດຈະວັດປະຈໍາວັນ ໃຫ້ກາຍເປັນນິໄສ
ທ່ານຮູ້ຫຼືບໍ່ວ່າຄວາມແຕກຕ່າງລະຫວ່າງຄົນທີ່ປະສົບຄວາມສໍາເລັດ ກັບຄົນທີ່ລົ້ມເເຫຼວແມ່ນຫຍັງ ປັດໄຈສໍາຄັນອາດເກີດຈາກກິດຈະວັດປະຈໍາວັນຂອງຄົນເຮົາເອງ ພຽງແຕ່ທ່ານໃສ່ໃຈເລື່ອງເລັກໆນ້ອຍໆ ກໍສາມາດປ່ຽນຊີວິດໄດ້ ຖ້າຕອນນີ່ທ່ານຮູ້ວ່າຕົນເອງຕ້ອງປ່ຽນນິໄສໃດ ນັ້ນຖືເປັນຂັ້ນຕອນທໍາອິດຂອງການກ້າວສູ່ຄວາມສໍາເລັດຂອງທ່ານ ເຊັ່ນ

– ທຸກມື້ນີ້ທ່ານໃຊ້ເວລາເບິ່ງໂທລະພາບມື້ລະຫຼາຍໆຊົ່ວໂມງ ກໍ່ປ່ຽນມາເປັນເບິ່ງມື້ລະ 1ຊົ່ວໂມງ

– ປົກກະຕິທ່ານຈະບໍ່ຈື່ຊື່ໃຜໄດ້ ຫຼື ບັນທຶກໄວ້ໃນໂທລະສັບມືຖື ກໍ່ປ່ຽນມາຈົດບັນທຶກໄວ້ໃນປື້ມ ຫຼື ເຈ້ຍເພື່ອໃຫ້ຈື່ໄດ້. ຖ້າທ່ານລອງເຮັດແບບນີ້ 30ວັນແລ້ວ ເຊື່ອວ່າທ່ານຈະໄດ້ນິໄສຕິດຕົວອັນໃໝ່ທີ່ດີຂຶ້ນກວ່າເກົ່າ ແລະ ເຂົ້າໃກ້ຄວາມສໍາເລັດຫຼາຍຂຶ້ນ.

2 ຕັ້ງເປົ້າໝາຍໃນແຕ່ລະມື້

ສໍາລັບຜູ້ທີ່ປະສົບຄວາມສໍາເລັດແລ້ວ ແນ່ນອນວ່າພວກເຂົາເຫຼົ່ານັ້ນຕ້ອງມີເປົ້າໝາຍທີ່ຈະເຮັດໃຫ້ຂັບເຄື່ອນຊີວິດໃນແຕ່ລະມື້ໄດ້ ພວກເຂົາສ້າງເປົ້າໝາຍຕະຫຼອດເວລາ ວາງແຜນວ່າໃນແຕ່ລະມື້ຈະຕ້ອງເຮັດຫຍັງແນ່ ຈົດລາຍການສິ່ງທີ່ຕ້ອງເຮັດລະອຽດ. ແຕ່ສໍາລັບຄົນທີ່ຫາກໍ່ສ້າງເປົ້າໝາຍ ຄວນເບິ່ງຫາຄວາມສໍາເລັດໃນໄລຍະຍາວ ວາງແຜນແບບລາຍວັນ, ລາຍອາທິດ, ລາຍເດືອນ ຫຼື ລາຍປີ ເຊິ່ງການວາງແຜນຢ່າງດຽວອາດບໍ່ພຽງພໍ ຖ້າບໍ່ລົງມືເຮັດໄປພ້ອມ ທ່ານຕ້ອງມີຄວາມຮັບຜິດຊອບຕໍ່ເປົ້າໝາຍທີ່ຕົນເອງຕັ້ງໄວ້ ເພື່ອໃຫ້ບັນລຸເປົ້າໝາຍໃນແຕ່ລະຂັ້ນໄດ່້ສໍາເລັດ.

3 ໃຫ້ຄໍາໝັ້ນສັນຍາກັບຕົນເອງ ວ່າຕ້ອງພັດທະນາຕົນເອງທຸກມື້

ໃນກຸ່ມຄົນທີ່ປະສົບຄວາມສໍາເລັດ ພວກເຂົາຈະເບິ່ງຫາວິທີພັດທະນາຕົນເອງຕະຫຼອດເວລາ ບໍ່ວ່າຈະເປັນການອ່ານໜັງສື ຫຼື ຄິດວ່າຕົນເອງເປັນນັກຮຽນທີ່ພ້ອມຈະຮຽນຮູ້ສິ່ງຕ່າງໆຢູ່ສະເໝີ ພວກເຂົາຈະໃຊ້ເວລາທີ່ມີທັງໝົດ ເພື່ອພັດທະນາຕົນເອງເພື່ອໃຫ້ເຂົ້າໃກ້ເປົ້າໝາຍຫຼາຍຂຶ້ນ. ທັ້ງນີ້ ວິທີງ່າຍໆຄືທ່ານຕ້ອງຫາຊ່ອງທາງທີ່ຈະເພີ່ມຄວາມຮູ້ໃຫ້ຕົວເອງ ເຊິ່ງມັນອາດບໍ່ແມ່ນເລື່ອງງ່າຍ ແຕ່ຖ້າເບິ່ງວ່າເປັນຄວາມທ້າທາຍໃໝ່ ທີ່ຈະເຮັດໃຫ້ທ່ານເຕີບໂຕຂຶ້ນ ກໍ່ລອງຫາໂອກາດທີ່ຈະພັດທະນາຕົນເອງລອງເບິ່ງ.

4 ສ້າງຄວາມສໍາພັນກັບຄົນອື່ນໆແນ່

ການສ້າງຄວາມສໍາພັນ ຫຼື ເຄືອຂ່າຍຕ່າງໆ ຖືເປັນເລື່ອງຈຳເປັນໃນການດໍາເນີນທຸລະກິດ ເພາະດ້ວຍຄວາມສໍາພັນໃນໄລຍະຍາວ ຈະຊ່ວຍໃຫ້ທ່ານຫຼຸດພົ້ນຈາກບັນຫາໄດ້ ແລະ ເມື່ອໄດ້ຮັບຄວາມຊ່ວຍເຫຼືອແລ້ວ ທ່ານກໍຄວນຈະຍື່ນມືຊ່ວຍເຫຼືອພວກເຂົາກັບຄືນເຊັ່ນກັນ. ການສ້າງຄວາມສໍາພັນຢ່າງງ່າຍໆ ຄືການຈົດຈໍາຊື່ຄົນ ເຊິ່ງຈະເປັນການສ້າງຄວາມປະທັບໃຈໄດ້ເປັນຢ່າງດີ.

5 ເຮັດທຸກຢ່າງໃຫ້ເໝາະສົມ ແລະ ພໍເໝາະພໍດີ

ການສ້າງຄວາມສົມດູນໃຫ້ຊີວິດໃນການເຮັດກິດຈະກໍາຕ່າງໆນັ້ນໝາຍເຖິງການຮັບປະທານອາຫານ, ການອອກກໍາລັງກາຍ ການດື່ມແອວກໍຮໍ, ການເບິ່ງໂທລະພາບ, ການຫຼິ້ນອິນເຕີເນັດ ແລະ ອື່ນໆ. ຖ້າທ່ານເຮັດທຸກຢ່າງໃຫ້ຢູ່ໃນຄວາມພໍດີ ບໍ່ຫຼາຍເກີນໄປ ຫຼື ບໍ່ໜ້ອຍເກີນໄປ ກໍຈະສົ່ງຜົນໃຫ້ຄົນອ້ອມຮອບຕົວທ່ານຮູ້ສຶກດີໄປນໍາ ໃນດ້ານທຸລະກິດກໍ່ເຊັ່ນກັນ ການທີ່ທ່ານເຮັດຫຍັງດ້ວຍຄວາມພໍດີກໍຈະຊ່ວຍໃຫ້ທ່ານຄົ້ນຫາຄູ່ຄ້າທາງທຸລະກິດໄດ້ງ່າຍຂຶ້ນ.

6 ຢ່າຢ່້ານ

ປະຕິເສດບໍ່ໄດ້ວ່າທຸກຄົນຍ່ອມມີຄວາມຢ້ານກົວຢູ່ໃນຕົວເອງ ແຕ່ຄົນທີ່ຈະປະສົບຄວາມສໍາເລັດໄດ້ນັ້ນ ຕ້ອງບໍ່ອະນຸຍາດໃຫ້ຄວາມຢ້ານກົວເຂົ້າມາຈໍາກັດສິ່ງທີ່ຈະເຮັດ ເພາະເມື່ອທ່ານກ້າວໄປສູ່ຈຸດສູງຂຶ້ນ ແນ່ນອນວ່າທ່ານອາດຮູ້ສຶກກັງວົນ ບໍ່ໝັ້ນໃຈ ທ່ານສາມາດຖາມຈາກທີ່ປຶກສາໄດ້ວ່າພວກເຂົາຜ່ານຄວາມຢ້ານກົວນັ້ນມາໄດ້ແນວໃດ ຫຼື ເບິ່ງແບບຢ່າງຈາກຄົນທີ່ປະສົບຄວາມສໍາເລັດແລ້ວກໍ່ໄດ້ເຊັ່ນກັນ.

ໂດຍ: ເອຢິບ
ທີ່ມາ: https://www.marketingoops.com/exclusive/how-to/21-ways-achieve-wealth-success/