ລັດຖະມົນຕີ ກະຊວງສຶກສາທິການແລະກີລາ ອອກຄຳສັ່ງໃຫ້ພັກການຮຽນຊົ່ວຄາວ ໃນສະຖານການສຶກສາທັງພາກລັດ ແລະ ເອກະຊົນ ຢູ່ ນະຄອນຫຼວງວຽງຈັນ

ລັດຖະມົນຕີກະຊວງສຶກສາທິການ ແລະ ກິລາ ໄດ້ອອກຄຳສັ່ງ ເລກທີ421/ສສກ ນະຄອນຫຼວງວຽງຈັນ, ວັນທີ 21 ເມສາ 2021ວ່າດ້ວຍການຜັນຂະຫຍາຍຄໍາສັ່ງນາຍົກລັດຖະມົນຕີ ສະບັບເລກທີ 15/ນຍ, ລົງວັນທີ 21 ເມສາ 2021 ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ-19 ພາຍໃນຂະແຫນງການສຶກສາ ແລະ ກິລາ ເຖິງ :  ບັນດາທ່ານ ຫົວຫນ້າຫ້ອງການ, ຫົວຫນ້າກົມ, ຜູ້ອໍານວຍການສະຖາບັນ, ສໍານັກພິມສຶກສາ ແລະ ກິລາ ແລະ ສູນ, ອະທິການບໍດີມະຫາວິທະຍາໄລແຫ່ງຊາດ, ຫົວຫນ້າພະແນກສຶກສາທິການ ແລະ ກິລາ ນະຄອນຫຼວງ, ຜູ້ອໍານວຍການສະຖານການສຶກສາ ແລະ ກິລາ ທັງພາກລັດ ແລະ ເອກະຊົນ.

ອີງຕາມ ຄໍາສັ່ງນາຍົກລັດຖະມົນຕີ ສະບັບເລກທີ 15/ນຍ, ລົງວັນທີ 21 ເມສາ 2021 ວ່າດ້ວຍການເພີ່ມທະວີ ມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ-19; ເພື່ອເປັນການສືບຕໍ່ເພີ່ມທະວີມາດຕະການສະກັດກັ້ນ ຄວບຄຸມ ແລະ ກຽມພ້ອມຮອບດ້ານເພື່ອຕ້ານພະຍາດ ອັກເສບປອດຈາກເຊື້ອຈຸລະໂລກສາຍພັນໃຫມ່ (ໂຄວິດ-19) ໃນສໍານັກງານ, ສະຖາບັນ, ສໍານັກພິມ, ສູນ ແລະ ສະຖານ ການສຶກສາ ແລະ ກິລາ.ລັດຖະມົນຕີກະຊວງສຶກສາທິການ ແລະ ກິລາ ອອກຄໍາສັ່ງ:

1. ໃຫ້ຜູ້ບໍລິຫານການສຶກສາ ແລະ ກິລາ ທຸກຂັ້ນ ສືບຕໍ່ເພີ່ມທະວີການໂຄສະນາເຜີຍແຜ່, ສຶກສາອົບຮົມ ຢ່າງກວ້າງຂວາງ ແລະ ເລິກເຊິ່ງ ດ້ວຍຫຼາຍຮູບແບບ ແລະ ວິທີການ ເພື່ອເຮັດໃຫ້ພະນັກງານ, ຄູອາຈານ, ນັກຮຽນ,ນັກສຶກສາ, ນັກກິລາທຸກຄົນ ເຫັນໄດ້ໄພອັນຕະລາຍຂອງພະຍາດ COVID-19 ທີ່ມີການກາຍພັນ ແລະ ຮຸນ ແຮງເພີ່ມຂຶ້ນ ພ້ອມທັງຮູ້ຈັກວິທີສະກັດກັ້ນ, ຄວບຄຸມ ແລະ ແກ້ໄຂພະຍາດນີ້ດ້ວຍຕົນເອງ ພ້ອມທັງເຫັນໄດ້ ຄວາມຈໍາເປັນຂອງລັດຖະບານ ໃນການປະກາດມາດຕະການດັ່ງກ່າວເພື່ອປົກປ້ອງສຸຂະພາບ ແລະ ຊີວິດຂອງປະຊາຊົນລາວ ແລະ ຄົນຕ່າງປະເທດ ຢູ່ ສປປ ລາວ;

2. ໃຫ້ພັກຮຽນຊົ່ວຄາວ ໃນສະຖານການສຶກສາທັງພາກລັດ ແລະ ເອກະຊົນ ຢູ່ ນະຄອນຫຼວງວຽງຈັນ ປະກອບມີ:ໂຮງລ້ຽງເດັກ, ໂຮງຮຽນອະນຸບານ, ໂຮງຮຽນປະຖົມສຶກສາ, ໂຮງຮຽນມັດທະຍົມສຶກສາ, ໂຮງຮຽນສຶກສາສົງ, ໂຮງຮຽນສຶກສາພິເສດນະຄອນຫຼວງ, ໂຮງຮຽນກິນນອນ, ສູນຝຶກອົບຮົມວິຊາຊີບວິທະຍາໄລ, ສະຖາບັນ ແລະມະຫາວິທະຍາໄລແຫ່ງຊາດ;

3. ມອບໃຫ້ສະຖານການສຶກສາ ແລະ ກິລາທີ່ລະບຸຂ້າງເທິງຈັດການຮຽນ-ການສອນໃນຮູບແບບທາງໄກ ຕາມຄວາມເຫມາະສົມ ເລີ້ມແຕ່ການສຶກສາກ່ອນໄວຮຽນ ເຖີງ ມັດທະຍົມສຶກສາ ໃຫ້ໃຊ້ຖານການຮຽນຮູ້ (Teaching-Learning Platform: ຄັງປັນຍາ (ໃນລະບົບປະຕິບັດງານແອນດຣອຍ) ຫຼື https://laos.learningpassport.unicef.org), ສ່ວນ ອາຊີວະສຶກສາ, ການສຶກສາຄູ, ມະຫາວິທະຍາໄລ ໃຫ້ໃຊ້ຊ່ອງທາງການຮຽນທາງໄກ ເຊັ່ນ: Whatsapp, Messenger, Line, Zoom, Webex, Skype, Microsoft Team ແລະ ອື່ນໆ ຕາມຄວາມເຫມາະສົມ;

4. ມອບໃຫ້ພໍ່ແມ່ຜູ້ປົກຄອງ, ສະມາຄົມພໍ່ແມ່ນັກຮຽນ, ຜູ້ອໍານວຍການ ແລະ ຄະນະພັດທະນາການສຶກສາຂັ້ນບ້ານຈົ່ງອໍານວຍຄວາມສະດວກ ແລະ ແນະນໍາລູກ-ຫຼານ ຂອງຕົນໃຫ້ໄດ້ຮຽນຕາມການແນະນໍາຂອງສະຖານການສຶກສາ ແລະ ກິລາ ຢ່າງເຂັ້ມງວດ;

5. ສໍາລັບສໍານັກກະຊວງ, ພະແນກສຶກສາທິການ ແລະ ກິລາ ນະຄອນຫຼວງ ແລະ ສະຖານການສຶກສາທົ່ວນະຄອນຫຼວງວຽງຈັນ ໃຫ້ຜັດປ່ຽນກັນມາປະຈໍາການ ແລະ ປ້ອງກັນ-ເວນຍາມໃນແຕ່ລະວັນບໍ່ ໃຫ້ຂາດ,ຈໍານວນຫນຶ່ງແມ່ນໃຫ້ເຮັດວຽກຢູ່ເຮືອນ ຫຼື ທີ່ພັກອາໄສ ໂດຍ ຜ່ານລະບົບສື່ອີເລັກໂຕຣນິກ ແລະ ເຄື່ອຂ່າຍອິນ ເຕີເນັດ ເຊັ່ນ: ໂທລະສັບ, ອີເມວ ແລະ ລະບົບກອງປະຊຸມທາງໄກ, ເພື່ອຫລຸດຜ່ອນຄວາມແອອັດໃນສະຖານທີ່ ເຮັດວຽກໃຫ້ປະຕິບັດດັ່ງນີ້:

5.1 ສໍານັກກະຊວງ ເຂດຊຽງຍືນ, ສີສະເກດ, ເຈົ້າອານຸວົງ ແລະ ຫຼັກ 8 (ທ່າເດືອ); ຄະນະຫ້ອງການ/ຄະນະກົມ/ຄະນະອໍານວຍການສະຖາບັນ, ສໍານັກພິມ ແລະ ສູນ 1- 2 ຄົນ/ມື້ ແລະ ວິຊາການ 3 ຫາ 5 ຄົນ/ມື້;

5.2 ມະຫາວິທະຍາໄລແຫ່ງຊາດ- ຄະນະອະທິການບໍດີ 1-2 ຄົນ/ມື້, ຄະນະບໍດີ 1-2 ຄົນ/ມື້, ຄະນະຫ້ອງການ 1- 2 ຄົນ/ມື້, ຄະນະພາກວິຊາ
1-2 ຄົນມື້, ວິຊາການ 3-5 ຄົນ/ມື້;

5.3 ພະແນກສຶກສາທິການ ແລະ ກິລາ ນະຄອນຫຼວງ – ຄະນະພະແນກ 1-2 ຄົນ/ມື້ ແລະ ວິຊາການ 3 ຫາ 5 ຄົນ/ມື້;

5.4 ຫ້ອງການສຶກສາທິການ ແລະ ກິລາເມືອງພາຍໃນນະຄອນຫຼວງວຽງຈັນ- ຄະນະຫ້ອງການ 1-2 ຄົນ/ມື້ ແລະ ວິຊາການ 2 ຫາ 3 ຄົນ/ມື້; 5.5 ສະຖານການສຶກສາ ແລະ ກິລາພາຍໃນນະຄອນຫຼວງວຽງຈັນຄະນະອໍານວຍການ 1-2 ຄົນ/ມື້ ແລະ ຄູ-ອາຈານ 1-2 ຄົນ/ມື້; 5.6 ສະຖານການສຶກສາ ແລະ ກິລາອື່ນໆ ແມ່ນໃຫ້ພິຈາລະນາຕາມຄວາມເຫມາະສົມກັບປະລິມານວຽກທີ່ຈະຕ້ອງແກ້ໄຂຮີບດ່ວນ ພ້ອມກັນນີ້ ໃນໄລຍະມາປະຈໍາການໃຫ້ລ້າງມືດ້ວຍນໍ້າສະອາດໃສ່ສະບຸ ຫຼື ເຈວລ້າງມື, ໃສ່ຜ້າອັດປາກ-ດັງ,ວັດແທກອຸນຫະພຸມ ແລະ ອະນາໄມສະຖານທີ່ບ່ອນເຮັດວຽກເປັນປົກກະຕິ;

6. ຫ້າມບໍ່ໃຫ້ການຈັດຕັ້ງທຸກພາກສ່ວນຂອງຂະແຫນງການສຶກສາ ແລະ ກິລາ ຈັດກອງປະຊຸມ, ການສໍາມະນາ, ຝຶກອົບຮົມ ແລະ ກິດຈະກໍາອື່ນໆ ທີ່ມີຜູ້ເຂົ້າຮ່ວມເກີນ 20 ຄົນ ໃນກໍລະນີຈໍາເປັນແມ່ນໃຫ້ປະຕິບັດມາດຕະການຂອງຄະນະສະເພາະກິດວາງອອກໃຫ້ເຂັ້ມງວດ;

7. ເພື່ອຮັກສາໄລຍະຫ່າງທາງສັງຄົມ ຫ້າມເຄື່ອນໄຫວກິດຈະກໍາກິລາກາຍຍະກໍາ ແລະ ການແຂ່ງຂັນກິລາ ກາງແຈ້ງ ແລະ ໃນຮົ່ມທຸກປະເພດ;

8. ສໍາລັບການເຂົ້າ-ອອກສໍານັກງານ, ກົມກອງ ແລະ ສະຖານການສຶກສາ- ກິລາ ທຸກຂັ້ນທຸກພາກສ່ວນ ແມ່ນໃຫ້ ເຂົ້າ-ອອກປະຕູດຽວ, ພ້ອມທັງມີການຈັດຕັ້ງວັດແທກອຸນຫະພຸມ, ລ້າງມື, ໃສ່ຜ້າປິດປາກ-ດັງ ກ່ອນເຂົ້າ ຫ້ອງການຂອງຕົນ ແລະ ໃຫ້ປະຕິບັດຢ່າງເຂັ້ມງວດ ແລະ ເປັນປົກກະຕິທຸກໆມື້; ໃນກໍລະນີກວດພົບພະນັກງານ, ຜູ້ທີ່ມາພົວພັນວຽກ ຫຼື ນັກຮຽນ-ນັກສຶກສາ ທີ່ມີອຸນຫະພູມ 37,5 •c ອົງສາເຊ ຫຼື ສູງກວ່າ ຫຼື ມີປະຫວັດການ ສໍາພັດກັບຄົນໃນຄອບຄົວ-ຫມູ່ເພື່ອນທີ່ຕິດໂຄວິດ ໃຫ້ຄະນະຮັບຜິດຊອບບັນທຶກລາຍຊື່ ແລະ ນາມສະກຸນ ແລະ ບ່ອນປະຈໍາການໃຫ້ລະອຽດແລ້ວແນະນໍາໃຫ້ຜູ້ກ່ຽວກັບບ້ານເພື່ອຕິດຕາມອາການ ແລະ ໄປກວດຕາມໂຮງຫມໍ ຫຼື
ສະຖານທີ່ກວດໂຄວິດ-19 ທີ່ລັດຖະບານກໍານົດໄວ້.

9. ໃຫ້ພະນັກງານ, ຄູ-ອາຈານ, ນັກຮຽນ-ນັກສຶກສາ, ແລະ ນັກກິລາທຸກຄົນ ໃນຂະແຫນງການສຶກສາ ແລະ ກິລາສືບຕໍ່ຈັດຕັ້ງຂະບວນການໄປສັກວັກຊິນກັນພະຍາດ COVID-19 ຕາມເຂດບໍລິການທີ່ທາງການກໍານົດໃຫ້ສໍາເລັດໂດຍໄວ;

10. ໃຫ້ການຈັດຕັ້ງ ແລະ ບຸກຄົນຈົ່ງມີຄວາມລະມັດລະວັງການລາຍງານຂ່າວ (ປອມ) ໃນສື່ສັງຄົມອອນລາຍ ສໍາຄັນທີ່ສຸດໃຫ້ຕິດຕາມຂ່າວສານທີ່ຫນ້າເຊື່ອຖືໄດ້ຂອງທາງການ ທາງເພສບຸກໃຫ້ຕິດຕາມ: ສູນຂ່າວສານການແພດສຸ ຂະສຶກສາ Centre of Information and Education for Health, ທາງເວັບໄຊ: www.govid19.gov.la ແລະ ແຫຼ່ງຂ່າວຂອງລັດຖະບານ;

11. ມອບໃຫ້ພະແນກສຶກສາທິການ ແລະ ກິລາແຂວງ/ນະຄອນຫຼວງ ປະສານສົມທົບກັບຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂການລະບາດພະຍາດອັກເສບປອດຈາກເຊື້ອຈຸລະໂລກສາຍພັນໃຫມ່ໂຄວິດ-19 ຂັ້ນ ແຂວງ/ນະຄອນຫຼວງ ໃນການປະຕິບັດມາດຕະການສະກັດກັ້ນ ຄວບຄຸມ ແລະ ແກ້ໄຂ ຕາມສະພາບການລະບາດ ແລະ ຄວາມສ່ຽງຢູ່ພາຍໃນຂອບເຂດຄວາມຮັບຜິດຊອບຂອງຕົນ ແລ້ວລາຍງານໃຫ້ກະຊວງສຶກສາທິການ ແລະ ກິລາ ຮັບຊາບ; ໃນການປະຕິບັດຕົວຈິງຖ້າມີຄວາມຈໍາເປັນ ແລະ ຮີບດ່ວນມອບໃຫ້ພະແນກສຶກສາທິການ ແລະ ກິລາແຂວງ/ນະຄອນຫຼວງ ແລະ ສະຖານການສຶກສາ ເປັນຜູ້ອອກນິຕິກໍາແນະນໍາລະອຽດຕາມພາລະບົດບາດ ຫນ້າທີ່ ແລະ ຂອບເຂດສິດຂອງຕົນ;

2. ໃຫ້ທຸກພາກສ່ວນທົ່ວຂະແຫນງການສຶກສາ ແລະ ກິລາ ໃຫ້ປະຕິບັດຄໍາສັ່ງຂອງນາຍົກລັດຖະມົນຕີ ສະບັບເລກ15/ນຍ ລົງວັນທີ 21 ເມສາ 2021 ຢ່າງເຂັ້ມງວດ;

13. ຄໍາສັ່ງສະບັບນີ້ມີຜົນສັກສິດນັບແຕ່ເວລາ 06:00 ໂມງ ຂອງວັນທີ 22 ເມສາ 2021 ຫາ ເວລາ 24:00 ໂມງຂອງວັນທີ 05 ພຶດສະພາ 2021. ໃນກໍລະນີທີ່ມີການປ່ຽນແປງ ກະຊວງສຶກສາທິການ ແລະ ກິລາ ຈະແຈ້ງໃຫ້ ຊາບຕື່ມ ເປັນແຕ່ລະໄລຍະ.