ໜັງສືພິມປະຊາຊົນ, ເມື່ອວັນທີ 2 ເມສາ 2021 ທີ່ອົງການໄອຍະການປະຊາຊົນສູງສຸດ (ອອປສ) ໄດ້ມີພິທີມອບ-ຮັບໜ້າທີ່ເລຂາຄະນະບໍລິຫານງານພັກ, ຫົວໜ້າອົງການໄອຍະການປະຊາຊົນສູງສຸດ ລະຫວ່າງ ສະຫາຍ ຄໍາສານ ສຸວົງ (ຜູ້ເກົ່າ) ແລະ ສະຫາຍ ໄຊຊະນະ ໂຄດພູທອນ ກຳມະການສູນກາງພັກ ເລຂາຄະນະບໍລິຫານງານພັກ ຫົວໜ້າອົງການໄອຍະການປະຊາຊົນສູງສຸດ (ຜູ້ໃໝ່), ເປັນກຽດເຂົ້າຮ່ວມ ໂດຍ ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ ຮອງປະທານປະເທດ ແຫ່ງ ສປປ ລາວ, ພ້ອມດ້ວຍພະນັກງານ-ລັດຖະກອນຫຼັກແຫຼງ ອອປສ ເຂົ້າຮ່ວມຢ່າງພ້ອມພຽງ.
ສະຫາຍ ຄໍາສານ ສຸວົງ ໄດ້ລາຍງານຜົນສໍາເລັດໃນການຊີ້ນໍາ-ນໍາພາວຽກງານ ໃນໄລຍະ 5 ປີ ຜ່ານມາ ໂດຍໄດ້ຖືເອົາວຽກງານສຶກສາອົບຮົມການເມືອງ-ນຳພາແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ ເປັນວຽກງານສໍາຄັນຕົ້ນຕໍ ໂດຍຕິດພັນກັບການນຳພາວຽກງານວິຊາສະເພາະ, ໄດ້ຈັດຕັ້ງເຊື່ອມຊຶມມະຕິກອງປະຊຸມໃຫຍ່ ຄັ້ງທີ X ຂອງພັກ, ບັນດາມະຕິຂອງກອງປະຊຸມຄົບຄະນະບໍລິຫານງານສູນກາງພັກ, ມູນເຊື້ອຂອງພັກ, ຂອງຊາດ, ຂອງກອງທັບ, ກົດໝາຍ ແລະ ນິຕິກຳຕ່າງໆຂອງລັດ ໂດຍສະເພາະມະຕິກອງປະຊຸມ ສະບັບເລກທີ 013/ສພຊ ຂອງສະພາແຫ່ງຊາດຊຸດທີ VIII, ມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກ ອົງການໄອຍະການປະຊາຊົນສູງສຸດ ໂດຍໄດ້ວາງ 6 ຄາດໝາຍ, 5 ແຜນງານ, 21 ໂຄງການ ຊຶ່ງຜ່ານການສຶກສາອົບຮົມການເມືອງ-ນຳພາແນວຄິດ ແມ່ນສາມາດຕີຖອຍໄດ້ແນວຄິດ, ທັດສະນະທີ່ບໍ່ຖືກຕ້ອງ, ເຮັດໃຫ້ສະພາບແນວຄິດຂອງສະມາຊິກພັກ, ພະນັກງານ-ລັດຖະກອນ ມີຄວາມສະຫງົບ ແລະ ມີບັນຍາກາດດີ; ສະມາຊິກພັກ, ພະນັກງານ-ລັດຖະກອນພາຍໃນກະຊວງຍຸຕິທຳ ສ່ວນຫຼວງຫຼາຍມີຄວາມເຊື່ອໝັ້ນຕໍ່ການນຳພາຂອງພັກ ແລະ ອຸດົມການສັງຄົມນິຍົມຢ່າງໜັກແໜ້ນ, ມີຄວາມສາມັກຄີເປັນເອກະພາບພາຍໃນ, ມີຄວາມຮັບຜິດຊອບຕໍ່ໜ້າທີ່ວຽກງານ, ຮັກສາໄດ້ຈັນຍາບັນ, ຈັນຍາທຳ ຂອງນັກກົດໝາຍ, ເຮັດໃຫ້ການຈັດຕັ້ງປະຕິບັດໜ້າທີ່ການເມືອງຂອງຂະແໜງໄອຍະການ ມີການຫັນປ່ຽນທີ່ຕັ້ງໜ້າ.
ໃນໂອກາດດັ່ງກ່າວ ສະຫາຍ ນາງ ປານີ ຢາທໍ່ຕູ້ ໄດ້ໃຫ້ກຽດໂອ້ລົມບາງຕອນສຳຄັນວ່າ: ໃນຕໍ່ໜ້ານີ້, ຄະນະພັກ-ຄະນະນໍາ ອົງການໄອຍະການປະຊາຊົນສູງສຸດ ຕ້ອງສືບຕໍ່ເພີ່ມທະວີວຽກງານສຶກສາອົບຮົມການເມືອງ-ແນວຄິດ ໃຫ້ແກ່ຖັນແຖວສະມາຊິກພັກ, ພະນັກງານ-ລັດຖະກອນ ໃນທົ່ວຂະແໜງການຂອງໄອຍະການໃຫ້ເລິກເຊິ່ງ ແລະ ເນື່ອງນິດລຽນຕິດ, ເອົາການສຶກສາອົບຮົມການເມືອງ-ແນວຄິດ ຕິດພັນກັບການແກ້ໄຂທັດສະນະ-ແນວຄິດທີ່ບໍ່ຖືກຕ້ອງ ແລະ ປະກົດການຫຍໍ້ທໍ້; ເອົາໃຈໃສ່ພັດທະນາກົງຈັກການຈັດຕັ້ງໃຫ້ມີຄວາມໜັກແໜ້ນ, ເຂັ້ມແຂງ, ຮອບດ້ານ ໂດຍສະເພາະຢູ່ອົງການໄອຍະການຂັ້ນຕົ້ນ ຕ້ອງຮັບປະກັນໃຫ້ປະຊາຊົນເຂົ້າຫາການບໍລິການຂອງໄອຍະການ ມີຄວາມສະດວກ; ປະສານສົມທົບກັບພາກສ່ວນທີ່ກ່ຽວຂ້ອງ ເພື່ອແກ້ໄຂຄະດີໃຫ້ມີຄວາມວ່ອງໄວ ແລະ ມີຄຸນນະພາບ ໂດຍສ້າງລະບຽບກົນໄກແກ້ໄຂ ໃຫ້ເຂົ້າສູ່ລະບົບຕາມກົດໝາຍກຳນົດ; ເອົາໃຈໃສ່ໂຄສະນາ, ເຜີຍແຜ່ກົດໝາຍ ແລະ ວຽກງານຂອງໄອຍະການໃຫ້ກວ້າງຂວາງ, ທົ່ວເຖິງ ເພື່ອຈຳກັດ, ສະກັດກັ້ນການລະເມີດກົດໝາຍ ທັງເປັນການແກ້ໄຂບັນຫາທີ່ເປັນຕົ້ນເຫດ; ຕ້ອງຖືສຳຄັນຕໍ່ວຽກກວດກາ, ປະເມີນຜົນພະນັກງານໄອຍະການປະຊາຊົນ, ພະ ນັກງານ-ລັດຖະກອນ ຂອງອົງການໄອຍະການປະຊາຊົນຢ່າງເປັນປົກກະຕິ; ປະສານສົມທົບກັບບັນດາກະຊວງ-ອົງການ ແລະ ທ້ອງຖິ່ນ ບໍາລຸງຍົກລະດັບຄວາມຮູ້ທາງດ້ານກົດໝາຍ ວິຊາສະເພາະ ແລະ ເອົາໃຈໃສ່ຕິດຕາມກວດກາການປະຕິບັດກົດໝາຍຂອງແຕ່ລະພາກສ່ວນໃຫ້ມີຄວາມເຂັ້ມແຂງ, ຮັບປະກັນ ແລະ ມີປະສິດທິຜົນ.
(ຂ່າວ: ຈະເລີນສິນ)
