ກົມຄຸ້ມຄອງແຮງງານຈັດກອງປະຊຸມວາງແຜນຄວາມຍືນຍົງ ແລະ ພິທີປິດໂຄງການຄວາມປອດໄພ ແລະ ສຸຂະພາບແຮງງານໃນຕ່ອງໂສ້ການຜະລິດຢູ່ ສປປ ລາວ ພາຍໃຕ້ໂຄງການກອງທຶນ ເພື່ອສົ່ງເສີມຄວາມປອດໄພ ແລະ ສຸຂະພາບແຮງງານ.
ກອງປະຊຸມໄດ້ຈັດຂຶ້ນໃນວັນທີ 26 ມີນາ 2021 ຢູ່ໂຮງແຮມລາວພລາຊາ ນະຄອນຫຼວງວຽງຈັນ ເຂົ້າຮ່ວມຂອງ ທ່ານ ພົງໄຊສັກ ອິນຖາລາດ ຫົວໜ້າກົມຄຸ້ມຄອງແຮງງານ, ກະຊວງແຮງງານ ແລະ ສະຫວັດດີການສັງຄົມ ( ຮສສ ), ທ່ານ ນາງ ສຸໄພວັນ ທ່ຽງຈັນໄຊ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດ, ທ່ານ ຄຳຈັນ ສີວັນທອງ ຜູ້ຕາງໜ້າສູນກາງສະຫະພັນກຳມະບານລາວ ພ້ອມດ້ວຍຜູ້ຕາງໜ້າຈາກອົງການຈັດຕັ້ງສາກົນ, ແຂກທີ່ຖືກເຊີນເຂົ້າຮ່ວມ.
ທ່ານ ນາງ ວຽງໄຊ ສຸກສະຫວັດ ຫົວໜ້າພະແນກຄວາມປອດໄພ ແລະ ສຸຂະພາບແຮງງານ ກ່າວວ່າ: ກອງທຶນ Vision Zero Fund Project ເປັນຂໍ້ລິເລີ່ມຂອງປະເທດອຸດສາຫະກຳ 7 ປະເທດ ຫຼື G7 ໃນປີ 2015 ແລະ ມາເປັນ 20 ປະເທດ ຫຼື G20 ໃນປີ 2017 ອົງການແຮງງານສາກົນເປັນຜູ້ບໍລິຫານກອງທຶນ ແລະ ຈັດຕັ້ງປະຕິບັດໂຄງການ ໂດຍຜ່ານໜ່ວຍງານ Vision Zero Fund Project ເພື່ອຫຼຸດຜ່ອນການບາດເຈັບທີ່ບໍ່ຮຸນແຮງ ແລະ ຂັ້ນຮຸນແຮງທີ່ກ່ຽວຂ້ອງກັບການເຮັດວຽກ ແລະ ເຮັດໃຫ້ກາຍເປັນສູນໃນຕ່ອງໂສ້ການຜະລິດໂດຍສະໜັບສະໜູນໃນການຈັດຕັ້ງປະຕິບັດ ແລະ ການປັບປຸງຄວາມປອດໄພ ແລະ ສຸຂະພາບແຮງງານໃນບັນດາຫົວໜ່ວຍແຮງງານ, ສະໜັບສະໜູນບັນດາອົງການຈັດຕັ້ງສາກົນທີ່ກ່ຽວຂ້ອງກັບວຽກງານຄວາມປອດໄພ ແລະ ສຸຂະພາບຂອງແຮງງານ ແລະ ການປົກປ້ອງສັງຄົມ. ນອກນັ້ນ, ໂຄງການນີ້ຍັງໄດ້ຈັດຕັ້ງປະຕິບັດຢູ່ສອງຂະແໜງຄືຕັດຫຍິບ ແລະ ຂະແໜງກາເຟ.
ການຈັດຕັ້ງປະຕິບັດກິດຈະກຳຂອງໂຄງການ ເລີ່ມແຕ່ເດືອນມິຖຸນາ – ທັນວາ 2018, ກິດຈະກຳຫຼັກແມ່ນໄດ້ສຶກສາອັນຕະລາຍ ແລະ ຄວາມສ່ຽງໃນຕ່ອງໂສ້ໃນການຜະລິດກາເຟ ແລະ ຂະແໜງຕັດຫຍິບ, ສົ່ງເສີມການຮ່ວມມື ແລະ ການເຮັດວຽກຮ່ວມກັນຫຼາຍຝ່າຍໃນວຽກງານຄວາມປອດໄພ ແລະ ສຸຂະພາບແຮງງານ.
ທ່ານ ພົງໄຊສັກ ອິນຖາລາດ ກ່າວເຖິງຜົນສຳເລັດໃນແຕ່ລະກິດຈະກຳຂອງໂຄງການດັ່ງກ່າວ ເຊິ່ງມັນໄດ້ເຮັດໃຫ້ວຽກງານຄວາມປອດໄພ ແລະ ສຸຂະພາບແຮງງານຢູ່ປະເທດພວກເຮົາເປັນທີ່ຮັບຮູ້, ເຂົ້າໃຈ ແລະ ໃຫ້ຄວາມສຳຄັນຫຼາຍຂຶ້ນຈາກທຸກພາກສ່ວນຂອງສັງຄົມ ໂດຍສະເພາະແມ່ນຜູ້ລົງທຶນໃນສອງຂະແໜງການດັ່ງກ່າວ. ພ້ອມດຽວກັນນີ້, ໂຄງການຍັງໄດ້ສ້າງໃຫ້ພະນັກງານວິຊາການຂອງສາມຝ່າຍພວກເຮົາມີຄວາມເຂັ້ມແຂງເພີ່ມຂຶ້ນໃນການເຮັດຫຼ້ອນໜ້າທີ່ວຽກງານໃນດ້ານນີ້ ທັງໃນລະດັບສູນກາງ, ທ້ອງຖິ່ນ ແລະ ໃນບັນດາຫົວໜ່ວຍແຮງງານທີ່ເຂົ້າຮ່ວມໂຄງການພວກເຮົາ.
